Vaega 12

Taeao manuia i le alafa’i mai o le atunu’u i fanuga lelei o lenei aso fou, o se aso e fa’aopoopo i lo outou soifua, fa’apea ma si o’u nei ola vivai, ae ao ai ona o tatou fa’apea ifo, “Le Atua e, ia E alofa ma fesoasoani mai i a i matou i lenei aso, ina ia sao ma uli mea uma, ae maise o o matou fa’amoemoe, a ma’ea, ona o matou fa’apea ifo lava lea, o i matou o ni tagata le aoga, a’o le vi’iga ma le fa’amanu matou te fa’afo’i atu ma le agaga maualalo i Lau Afio e fa’avavau, amene.

Na muta la tatou tala, ina ua ta’atiatia nei Keisi i luga o le sima, ae ua alu ‘ese le ta’avale na lavea ai, ae se i o tatou tulituliloaina po’o fea o le a o’o i ai Keisi, ma ona mafatiaga ua i ai nei.

I lea lava taimi, na taumafai lava Keisi, ia ‘aua nei fa’atu lona loto, ‘aua fo’i ne i popole pe fefe, ae o lana manava, o lo’o lelei fo’i lana manava i lea taimi. Na te le o lagona fo’i se tulaga e fa’apea ai ua malulu lona tino, e leai, ua matua’i le lagona lava se mea e tasi. Na i’u ai ina fa’apea Keisi, atonu ua oti. O se mea e le tatau ona tupu i a te ia, pe afai e fa’ato’ato’a lelei lona mafaufau.

A’o ta’atia pe Keisi i luga o le sima, o le taimi lea, ua lagona le popole, e ui lava ina taumafai ia ave’ese, ae ua le mafai. Na toe mafaufau ai lava i lea taimi, i si ona tama, ae maise fo’i o lona tina. E ui lava ina fa’apea  ua le mafai ona toe minoi lona tino atoa, ae o lo’o malamalama pea lona mafaufau. O lea la e ta’atia nei, ae ua fa’asolosolo pea ona mafaufauga, i lona aiga, ae maise ai o lona to’alua, o Loleni. Sa i ai lona manatu, atonu o sana miti lea ua fai nei, ma e tatau ona ala loa i luga. O le isi itu sa manatu i ai Keisi, atonu o lo’o la momoe pea ma lona to’alua, ae ua tatao ia e Loleni, fua i le le mafai ona gaioi lona tino. Na ta’atia ai lava Keisi, ua leai se isi e lavea’i i lea taimi, ma fa’atalitali pe o le a le iuga o le a o’o i ai ia.

A’o ta’oto pea, sa mafaufau i lona tama, i le aso na a’o ai e lona tama i le ta’aloga o le tapolo. Fai mai, na ia manatua lava le fiafia o lona tama ina ua va’ai atu, e lelei tele lana tapolo. Na ia toe manatua i lea taimi, lona uso la’ititi o Lulu, fai mai, e le fiafia Lulu i le ta’aloga o le tapolo. Ae e otegia lava e lona tama ia lona uso la’ititi lea, ona e fa’alogogata, e le fiafia lava i so’o se ta’aloga.

A’o fa’asolosolo mafaufauga o Keisi, o le taimi lea, ua taoto i totonu o le falema’i. O ana miti ia o lo’o fai nei, ma ona mafaufauga, e fa’atatau i lona tama, ona e fai mai le tala, e sili atu le alofa o le tama o Keisi ia Keisi, na i lona uso la’ititi. Na maua le lavea’i o Keisi, aua o lea ua taoto nei i totonu o le falema’i mo ona togafitiga, ae o le leo o lo’o ia fa’alogo nei i ai, o le leo o le ali’i foma’i e igoa ia Linikone.

E faia pea….