Vaega:8

Fa’atalaofa atu i lou alafa’i mai i le manuia i lenei taeao fou, i le alofa ma le agalelei o lo’o tatou Tama oi le lagi, e ao ai ona o tatou fa’apea ifo, “Le Atua Mamana e, o ai ea o le a o matou o i ai o lo’o i a te Oe upu o le ola, ia e alofa, foma’i le loto onosa’i ma le fa’apalepale ia i matou i lenei aso, ina ia mafai ai ona o matou tali atu i fa’afitauli o le olaga nei, a’o le vi’iga ma le fa’afetai matou te fa’afo’i atu i Lau Afio, e fa’avavau, fa’avavau, amene.

Na muta mai la tatou tala, a’o faia pea le fetufaa’iga i le va o uo nei e to’atolu, lea o lo’o i ai ma le tama’ita’i o Keisi Masela, fai mai, na tau tu a’e nei i luga Keli i lea taimi, ona ua tau pipi’i le ofu ae i le nofo, ua atoa le itula ma le ‘afa o fai le latou taumafataga. ia o mea lava fa’apenei, a feiloa’i loa le itu vaivai, o lona uiga e ‘ese le gutu e tausami ai, ‘ese le isi gutu e tautala ai, ona fa’apea lava lea ona fai.

Fai mai le tala, o le taimi lea, ua gasolosolo atu i totonu o le falea’iga le anoano o tagata, ona fai mai, o se fale’aiga ua sili ona matagofie, e le gata la i le lelei atoatoa o meatausami, ae ua fa’apena fo’i le mama manaia o totonu o le fale atoa. O le fale’aiga lea, na teuteu ma fa’atulaga lelei e le tama’ita’i o Keisi ma lana kamupani, o lea la ua va’ai nei i ai ana uo, o se galuega ua sili ona matagofie.

Na a’apa ane nei Lenina ma faitau le aofa’i o le latou pili, e uma ane ua limasefulu fitu tala ona fa’aopoopo lea i ai ma le meaalofa mo le tagata na galue e fa’ataino le tautua i le latou laulau. Na a’apa ane nei Keisi ma se’i le pili mai le lima o Lenina, “Tu’u mai i a te a’u le pili, o au na vala’au atu ia oulua e te lua o mai, tu’u mai i a te a’u le pili.”

Fai lava le tala a Keisi ma tu a’e lava i luga, a se’i ‘ese mai le pili ma savali loa i le potu e totogi ai pili o le fale’aiga. Ua le tautala Lenina ae ua tilotilo ane i a Keli ma tomumu, “Keli, se o uiga o Keisi e pei o le teine fo’i lele….” Na motusia fa’afuase’i le tomumu a Lenina ina ua fa’apea ane Keli, “Nina, va’ai oe, se fa’afetai pau le na, aua e leai ma se tupe oi totonu o la’u ‘atu, o le mea lea e i ai, na o le amo lava o le ‘ato, a’o se mea fo’i lea o lo’o i i ai i totonu, ia e matua fiu e su’e e te le maua.”

Ua ‘ata Lenina ma tilotilo ane i si ana uo o Keli, “ia ua lelei ali’i Keli, se i iloa ai fo’i lou fa’atamala.” Ua tali e nei ma savavali atu i le mea o lo’o tu mai ai Keisi, e totogi a latou mea’ai. A’o tutu e fa’atalitali le au mai o le sui a Keisi, na toe liliu ane nei Keisi ma fesili i a Lenina, po’o a ana mea o le a fai i le fa’aiuga o le vaiaso, na sau le tali a Lenina, o lo’o i ai le tama na fai a la tu’uga tala e fetaui i le fa’aiuga o le vaiaso, o le tama e faigaluega i le faletupe i totonu o le a’ai lea o lo’o nofonofo ai nei.

O le tama e pei ona fa’amatala e Lenina i ana uo o Kenisi ma Keli, e fiafia tele si ali’i i le ta’aloga o le pasiketipolo, o lea la ua uma ona ia fa’atauina ia a la pepa e ulufale ai i le ta’aloga, a’o le mea ua tupu, e le fiafia Lenina i ia ituaiga ta’aloga fa’apea.

E faia pea….