[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea ua tuli ai e le toeaina le tamaloa o Pegi i fafo ma le fale ma lana faaupuga, e le toe fia vaai i ona foliga e oo mai le oti.]

E lei uma lelei atu le talosaga a le teine i ona matua ae na pei ua toe agi mai le afa o Ofa i le masau mai o le tala a le olomatua ma uu ona puimanava, “E a lau kala siaula Ligeka, e sa’o oe o maua ga filifilia Pegi e avea ma ou koalua, ae le o se mea o le a e fesiligia ai le ma pule faamakua eh, aua le kausi kausi oe ua e ola ma e aulelei oga e kaukala mai lea faapega ia maua, e sa, eke malaia ai, faaekeeke lou guku lega o le a sopo la’a ma au faamakalaga ga ua lafo mai...,” o le sa’i lea a le olomatua i le tiga tele o lona loto ona o upu ia ua lafo atu e Lineta ia te i laua e uiga i lona toalua, peitai o le toeaina, sa to’a pea le tai i lona mafaufau, aua o loo malamalama lona loto, e sa’o uma tala ia o loo sa’i mai ai si ona afafine, o laua lava na filifilia le tagata lea ua avea nei ma ona to’alua, ae o lea foi ua ese uiga ua faaali atu e lenei tagata ia te i laua o matua.

Na motu faafuasei felafolafoaiga i le va o le olomatua ma le teine o Lineta mo sina taimi, ma ua faigofie ai ona manino i le faalogo a le aiga le faaumuumu a le tamaloa o Pegi ma tauvalaau mai upu mataga i le latou aiga ma lana tala, “ou ke le kea i ga mau folafolaga ua fai mai, ou ke le koe fo’i aku fo’i i le kou aiga, e le o a’u fo’i o se vale.” Na ona taia lava o taliga o Lineta i tala ia o loo lafo atu e Pegi, tu loa i luga ma savali i fafo ma tamo’e atu loa i luma o le auala lea o loo tauvalaau ane ai lona toalua peitai o le olomatua i le taimi lea, ua le malolo foi lona fofoga i le tali atu i upu a Pegi, ma fai ai lava le taugaupu i lo la va ae ua agai atu ina tuneva le po, ua amata foi ona tofafa le nuu. “Sole Pegi, Pegi, e i ai sou faiai, e ke malamalama ea ua leva le po, o lea foi ua momoe le guu, ae o lega e sooga ee i luga lou guku, kuu gei lava lou le mafaufau magu e lei o mai kaulele’a o le guu e fasi oe eh,” o le ote atu lea a Lineta i lona to’alua ma soso atu ai lava i ona tafatafa, o iina faatoa ia iloa ai, o loo ‘ona lona toalua, atonu o le mea foi lea ua atili ai ona tupu le vevesi i lo latou va ma ona matua.

Na motu faafuasei le valea a le tamaloa o Pegi o loo fai ina ua ia faalogoina leo o tagata ua pisa mai, ona ia vaaia lea o moli uila o loo ki solo i lalo o toganiu a le aiga o Lineta. “Ligeka, Ligeka, o ai lea e pisa faapegei ua leva le po,?” o le fesili lea a le talii o Meki ma savali atu lava i le mea o loo tu mai ai le teine, ae o Lineta i le taimi lea, ua fefe ma ua tagi ona ua tonu i lona mafaufau, e le toe i ai se avanoa e tuua e le aumaga ia Pegi ona ua ova lona le mafaufau. “Malie uncle o le alii lea o Pegi na vevesi ma le olomatua ma le toeaina, ae o lea ua uma fo’i ona faatoa filemu le vevesi,” e le’i uma lelei atu le tala lea a Lineta ona faalogoina loa se pao, ma lona faasaga atu i tua, o Pegi ua taatia i lalo o le auala ua togi e le tagata i le maa.