Pago Pago - AMERIKA SAMOA

VALA’AU E LE FAATAUOLOA IA LEOLEO I SE ALII NA ALU ATU FAAMISA I TOTONU O LE FALEOLOA

O le te’a o le 10 i po o Mati 30, 2026, na o’o atu ai se valaau i le Ofisa a Leoleo i Tafuna, mai i se tamaitai faatauoloa, o se faleoloa i Kokoland, ona o se alii na alu atu ma fa’amisa atu, i totonu o le faleoloa.  O le susuga ia Agape Faumuina na molia I se taimi mulimuli ane, ona o lenei faalavelave.

E tusa ai ma fa’amaumauga a le faamasinoga, na alu atu Agape (le na molia) i totonu o le faleoloa, ae o le a tapuni le faleoloa.  Ma na fiu le faatauoloa e tuli i fafo, ae na musu le alii ma o le mafua’aga lea na valaau ai e le faatau oloa ia leoleo.

I se faatalanoaga a leoleo ma le tamaitai faatauoloa, a’o faitau tupe o faatauga, pe a ma le 9:45, i lea po, ma sauni e tapuni le faleoloa, sa ia va’aia se alii o tu mai i fafo i le pakaga taavale ma se pate pesipolo.  O se taimi mulimli ane, na ia fa’alogoina ai se pa’o tele ma ina ua tilotilo le tamaitai faatau oloa, i le masini pu’e ata a le faleoloa, sa ia va’aia lea lava alii, o lo’o sasa se ‘bumper’ samasama a le pakaga, i le pate.

A’o faatino pea galuega a le tamaitai fa’atau oloa ma loka le tupe i totonu o se sefe, sa ia va’aia lea lava alii, ua i totonu o le faleolo, i luma tonu lava o le masini e totogi ai fa’atau, ae ua tapuni le faleoloa.

Ina ua fesiligia e le tamaitai fa’atau oloa, ia le alii, po o iai se mea o manaomia, na amata ona talanoa mai lea alii, i se auala sa le’i tulaga lelei i le fa’alogo a le tamaitai faatau oloa.  Ma sa faapea ona fai atu lea alii i le tamaitai faatau oloa, e so so tele atu ma ia taumafai e faatonu le tamaitai faatau oloa, e tuli i fafo se tagata na iai foi i totonu o le faleoloa, i le taimi lea e tasi.

O iina na fa’ateteleina ai le fefe o le tamaitai fa’atau oloa.  Sa fa’ailoa atu foi e le tamaitai faatau oloa, i leoleo, le fesili faafia atu o le na molia, po o ola ia masini pu’e ata a le faleoloa.  E ui ina sa taumafai le tamaitai faatau oloa, e tuli i fafo, ia le na molia, ae sa fa’aauau pea ona ia fai atu ni faamatalaga e  le lelei i le faalogo a le tamaitai faatau oloa.

Ina ua a’apa le tamaitai faatau oloa i le telefoni, e vala’au ia le pule o le faleoloa, na agai loa i fafo ia le na molia ma alu ‘ese atu.

Ina ua mae’a ona matamata leoleo i le ata sa pu’eina i le masini pu’e ata a le faleoloa, sa o latou taumafai e saili le na molia, i fale ma tagata na latalata ane.  Sa mafai ona maua e leoleo ia le nofoaga o iai le fale a le na molia ma o latou agai atu loa iai.  Na faamaonia e se tagata o le aiga, a le na molia, ia lona fa’ato’a taunu’u atu i le fale.

Ina ua ave faapagotaina e leoleo, ia le na molia, sa lagonaina le malosi o le manogi ‘ava malosi mai i le alii.  Ma ina ua o latou taunu’u i le ofisa a leoleo i Tafuna, na taumafai leoleo e fa’atalanoa le na molia, ae peitai, sa amata ona ‘e’e ma faapea mai, e leai sana mea sese na faia, ma musu e tali ni fesili a leoleo, pe faia sana faamatalaga e tusa ai ma le faalavelave na tupu.

O moliaga na faia fa’asaga ia Agape Faumuina, na aofia ai:

Faitauga 1:  Fa’ao’olima i lona tulaga e tolu – O se vaega ‘I’ i solitulafono mama, e mafai ona nofosala ai i le falepuipui, e le silia ma le 15 aso, po o se sala tupe e le silia ma le $300; po o faasalaga uma e lua.

Faitauga 2:  Faatupu vevesi i nofoaga lautele – O se vaega ‘E’ i solitulafono mama, e mafai ona nofosala ai i le falepuipui, i le le silia ma le ono masina, po o se sala tupe e le silia ma le $500; po o faasalaga uma e lua.

Faitauga 3:  Solivale o fanua - O se vaega ‘E’ i solitulafono mama, e mafai ona nofosala ai i le falepuipui, i le le silia ma le ono masina, po o se sala tupe e le silia ma le $500; po o faasalaga uma e lua.

Na lokaina le na molia, e aunoa ma se vaegatupe fa’atulagaina, e mafai ona toe tatalaina ai i tua, a’o fa’agasolo lona faamasinoga.

FA’AI’U SE TAUGA’UPU A SE ULUGALII I LE PA’I LIMA

O se fe’ese’esea’iga  a se aiga, i le aoauli o Mati 30, 2026, na lokaina ai se alii 25 tausaga, ina ua fa’ateteleina le tauga’upu i le pa’i lima ma le fa’aaogaina o se aga’ese.

O le 4:50 i le afiafi, na o’o atu ai se vala’au i le Ofisa a Leoleo i Tafuna, e tusa ai ma se alii o lo’o laulauvavale ma lafoina ni faaupuga taufa’amata’u, ma faamia, i le fale a se aiga.

Ina ua taunu’u leoleo, sa va’aia le na molia, o tamo’e agai atu i tua o le fale, i le fa’ato’aga, a se aiga.  Na feosofi i fafo leoleo ma amata ona tuliloa ia le na molia ma ina maua o ia, sa ave faapagota loa o ia.

E tusa ai ma fa’amaumauga a le faamasinoga, a’o ta’ita’i ‘ese atu e leoleo ia le na molia, na feosofi atu nisi o le aiga e taumafai e fasi o ia.  Ae na mafai ona tu’uina e leoleo ia le na molia, i totonu o le taavale, ma aveina atu i le ofisa a leoleo, mo le fa’aauauina o a latou su’esu’ega.

I ulua’i su’esu’ega a leoleo, sa ta’ua ai le amata o lenei fa’alavelae, i se tauga’upu, i le va o le na molia ma lana uo teine, ona o se telefoni feavea’i, ua leiloa.  Ae na vave lava ona liua ia le tauga’upu, i se tulaga pagatia, ina ua tu’i e le na molia, ia lana teine.  Ma feosofi atu ai tagata o le aiga, e taumafai e vaovao le misa.

Ae na ta’ua i fa’amaumauga a le malo, ia le mamulu o le na molia mai i tagata sa taumafai e taofiofi, ona ia oso atu lea i le u’u mai se aga’ese ma fa’alala agai i tagata o le aiga, sa i totonu o le fale.

O le tulaga na matua’i faapopoleina ai i latou sa iai i lea taimi, ona na iai ni fanau iti, i totonu o le fale, i le taimi na tupu ai le faalavelave.  Ma o le mafua’aga lea sa vala’auina ai loa leoleo, mo se fesoasoani.

Ina ua taunu’u leoleo ma le na molia, i le ofisa a leoleo i Tafuna, sa vala’auina le vaega a le EMS e siaki ia manu’a, a le na molia, mai i le taimi na sola ‘ese ai, ina ua taunu’u leoleo, faapea ma manu’a na maua i le fasiga o ia, e tagata o le aiga.

Sa musu le na molia, e faia sana faamatalaga e tusa ai ma le faalavelave na tupu.  Ae peitai, sa faamatala e se tasi o tagata o le aiga, i leoleo, sa iai se fa’atonuga fa’aletulafono a le malo, e faasa ai le na moia, ona o’o atu i le latou fale, pe latalata i tagata na a’afia.  

Na fa’aalia foi i leoleo, ia le fai ma masani a le na molia, o le alu atu i le fale a le aiga na a’afia, e aunoa ma se fa’ailoa atu.

O moliaga na faia e faasaga i le na moila, na aofia ai:

Faitauga 1:  Fa’atupu Vevesi i nofoaga tuma’oti (sauaga i totonu o le aiga) – O se vaega ‘I’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu (sauaga i totonu o le aiga) – O se vaega ‘A’ i solitulafono mama, e mafai ona nofosala i le falepuipui, e o’o atu i le tasi tausaga, po o se sala tupe e $1,000; po o faasalaga uma e lua.

Faitauga 3 & 4:  Fa’ao’olima i lona tulaga e tolu (sauaga i totonu o le aiga) – O se vaega ‘I’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

Faitauga 5:  Solivale o fanua (sauaga i totonu o le aiga):  O se vaega ‘E’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

Sa lokaina le na molia, e aunoa ma se vaegatupe faatulagaina, e mafai ona toe tatalaina ai i tua, a’o faagasolo lona faamasinoga.