Pago Pago - AMERIKA SAMOA

O le 9:10 i le po o Fepuari 26, 206, na o’o atu ai se vala’au i le Ofisa a Leoleo i Tafuna, mai i se tamaitai, e ripotia lona ‘uncle’, le susuga ia Penita Togafau, ua fa’asua’ava ma faamisa i totonu o le fale a le latou aiga.

E tusa ai ma fa’amaumauga a le faamasinoga, na ta’’ua ai le ‘e’e ma palauvale o le na molia, ma lona tuli solo o lona tuafafine, ma lafo iai ni fa’amatalaga tau fa’amata’u.

Sa ta’ua e le tamaitai na valaau atu i leoleo, ia sona popolega i le saogalemu o tagata uma o lona aiga.

E taunu’u atu leoleo i le nofoaga na tupu ai le fa’alavelave, o lo’o tu mai i fafo le tamaitai loto mafatia, na valaau atu i le ofisa a leoleo ma na ia faailoa atu i leoleo, le iai o tagata o lona aiga, i totonu o le fale.  Ma e savali atu leoleo i le fale, na o latou lagonaina ia le ‘e’e leotele ma le palauvale a se tagata, mai i totonu o le fale.

Ina ua o latou latalata atu i totonu o le fale, sa molimauina e leoleo, ia le na molia, o lo’o ia palauvale ma lafoina ni faamatalaga tau fa’amata’u, i tagata o lona aiga

Sa taumafai leoleo e fa’ato’ato’a le mataupu, ae peitai, na fa’aauau pea ona fa’aalia uiga tau fa’amata’u a le na molia.  Na ia (le na molia) savali atu agai i leoleo ma u’u ana moto.  Ina ua taumafai leoleo e ave faapagota o ia, sa tete’e mai le na molia ma o’o ai lava ina ona tu’iina le fatafata o se tasi o leoleo.

Ae na i’u ina mafai ona lokaina le na molia, e leoleo ma ave atu o ia i le taavale a leoleo mo le aveina atu i le ofisa a leoleo.

 Isi leoleo sa amata ona o latou fa’atalanoaina ia molimau na iai i le taimi na tupu ai le faalavelave.  Na fa’ailoa atu e tagata o le aiga, i leoleo, ia le faaleagaina o nisi o faitoto’a i totonu o le fale, ona o le na molia. 

Sa faamatalaina e molimau, ia le sulufa’i o nisi o le aiga, na aofia ai ma le fanau, i totonu o potu ma loka mai faitoto’a.  Ae peitai, sa taumafai le na molia, e tatala fa’amalosi ia faitoto’a o potu.

Ma na ta’ua foi e le tamaitai na valaau i le ofisa a leoleo, e faapea, e le o se taimi muamua lea ua faia ai e le na molia, ia lea tulaga.  Sa iai foi nisi taimi ua tuanai, na fa’amata’u ai e le na molia ia tagata o le aiga, ma faaleagaina mea totino a le aiga, a’o fa’asua’ava.  Ae e le’i failaina se ripoti o ia faalavelave.

Sa ta’ua foi e le tamaitai na valaau Ii leoleo, ia le sauaina e le na molia, o sona ‘nephew’ e 22 tausaga, i lea lava afiafi, ae na fai mai le na molia, o sa la taaloga na fai.

Na fa’atalanoaina foi e leoleo ia le to’alua a le na molia.  Ma na ia faamatalaina ia le alu o le aso atoa, o fai se inuga pia a le na molia ma ana uo, ma fa’aauau ona inu pia le na molia, ina ua toe fo’i atu i le fale.  Ma sa amata ona fa’aalia uiga saua o le na molia, i lea afiafi.

Ae na amata ia le latou pisa, ina ua fesiligia e se tasi o le aiga, ia le na molia, e tusa ai ma lanai nu pia.  Na liliu atu ai le na molia ma lafoina ni faamatalaga le talafeagai ma palauvale i lona tuafafine ma isi o le aiga.

Na ta’ua foifaapea foi ona e le to’alua a le na molia, ia le fua atu o le tau fasiga o ia ma na avea lea sa faapopoleina ai o ia, ona o lana fanau.

I le fa’atalanoaga o seisi foi tamaitai na iai i le taimi na tupu ai le faalavelave, sa ia ta’ua e faapea, e le o se taimi muamua lea ua tupu ai se tulaga faapea, ma faamata’u ai o ia ma lo latou aiga, e le na molia.  Ma e faateteleina uiga saua o le na molia, pe a tagofia ai le ‘ava malosi.

E tusa ai ma le ripoti a leoleo, o i latou uma na a’afia i lenei fa’alavelave, e nonofo uma i totonu o le fale e tasi, faatasi ai ma se tama ma tina matua.

Ina ua taunu’u leoleo ma le na molia, i le ofisa a leoleo, na molimauina ia ni uiga fa’aalia a le na molia, e fa’ailoa mai ai le fa’asua’ava, e pei o le talanoa fa’atosotosololoa, mumu o mata ma le malosi o le manogi o le ‘ava malosi.

O moliaga na faia faasaga i le na molia, na aofia ai:

Faitauga 1:  Faatupu Veevsi i nofoaga tuma’oti (sauaga i totonu o le aiga) – O se vaega ‘I’ i solitulafono mama, e mafai ona nofosala ai, e o’o atu i aso e 15, po o se sala tupe i le va o le $150 ma le #$300; po o faasalaga uma e lua.

Faitauga 2:  Tete’e atu i leoleo – O se vaega ‘A’ i solitulafono mama, e mafai ona nofosala ai i le falepuipui, e le silia ma le tasi tausaga, po o se sala tupe e le silia ma le $1,0000; po o faasalaga uma e lua.

Faitauga 3:  Faaleagaina o mea totino, i lona tulaga e tolu (sauaga i totonu o le aiga) – O se vaega ‘E’ i solitulafono mama, e mafai ona nofosala ai i le falepuipui, e le silia ma le ono masina, po o se sala tupe, e i le va o le $150 ma le $500; po o faasalaga uma e lua.

Faitauga 4:  Fa’ao’olima i lona tulaga e tolu (sauaga i totonu o le aiga) – O se vaega ‘A’ i solitulafono mama, e mafai ona nofosala ai I le falepuipui, e le silia ma le tasi tausaga, po o se sala tupe, e le silia ma le $1,000; po o faasalaga uma e lua.

E $2,000 le tinoitupe sa faatulagaina, e mafai ona tatalaina ai le na molia, mai i le falepuipui, a’o faagasolo lona faasalaga.