Apia - SAMOA

SOLOFUA MOLIAGA FAASAGA I LE PALEMIA

O le aoauli o le aso Faraile o le vaiaso ua tuanai, na lauina ai le faaiuga a le faamasinoga, e fa’atatau i moliaga na faia e faasaga i le Afioga i le Palemia, Laaulialemalietoa Leuatea Polataivao Schmidt, ma nisi e to’alima, i le faia o faamatalaga le faamaoni, faia o faamatalaga tau faaleaga, ma le taupulepule e faalavelave i le tulafono.

E faalima ona tolopoina, e le Afioga i le Faamasino Sinia o Faamasinoga Faaleitumalo, ia Talasa Atoa Saaga, o le faaiuga a lenei faamasinoga, talu ona faamae’aina o ona tauaofiaga, ia Iuni o le tausaga ua mavae.

Na afua mai moliaga faasaga i le Palemia ma isi, ona o su’esu’ega sa faia e faatatau i le maliu o se tamaititi a’oga o le Iunivesite a Samoa, ia Aperila 2021.

I le faaiuga a le tamaitai faamasino, sa ia ta’ua ai le su’esu’ega mo le aoina o ripoti ma mau, e mafai ona fesoasoani i leoleo i a latou su’esu’ega, i le faalavelave na tupu. 

O le tagata sa masalomia i lea faalavelave, le Afioga i le Faipule, ia Lealailepule Rimoni Aiafi, na solofua moliaga sa faasaga ia te ia, i le mae’a o su’esu’ega a leoleo i le 2021.  Ae peitai, na fa’ato’a faatalanoa o ia e leoleo, ina ua faia fa’asalalauga a Sam Su’a, i luga o upega tafa’ilagi, i le tausaga e 2023, ma tuuaia Leala, i le faalavelave na tupu, ma tu’ua’ia ai su’esu’ega sa faia e leoleo. 

I le faaleoina o lana faaiuga, sa ta’ua ai e le tamaitai faamasino, ia le talosagaina o ia e le itu a le malo, ina ia fa’a mama le vaai, i le leai o ni tusi fa’amaumau ma ripoti a leoleo, i le taimi o le faatinoga o a latou su’esu’ega.

Ma sa saunoa ai Sa’aga, o le Matagaluega a leoleo, e tu’u iai le faatuatuaga a tagata o le atunu’u, mo puipuiga, ma e iai se faamoemoega, o le a o latou faatinoina o latou tiute ma le faamaoni ma mulimuli i tulafono a lo latou ofisa.

Ma i le solofua ai o moliaga e faasaga i le Palemia, sa fautuaina ai e le tamaitai faamasino, ia le toe faatinoina o seisi su’esu’ega fou, i le mafua’aga o le maliu o le alii a’oga.  Ma o lea su’esu’ega, e tatau ona faatino e nisi, i fafo atu o le ofisa a leoleo.

FAAMAVAE LE SUI PALEMIA IA TOELUPE ONESEMO

O le aso ananafi (aso Gafua i Samoa), sa faaleoina ai le fa’amavaega a le Afioga i le sui Palemia ia Toelupe Maoiautele Poumulinuku Onesemo, ona o le faaiuga a le faamasinoga palota, i le vaiaso ua mavae, ua toe avanoa ai le tofi Faipule mo le itumalo a Falealili numera1.

I luma o sui fa’asalalau, sa saunoa ai Toelupe e faapea, o lana faaiuga mo le tu’ua o le tofi, sa faia ina puipuia le amiotonu a  le malo ma le kapeneta ma lana faiga faaiuga.

Ae peitai, e lua ni ana tagi ua fuafua nei, e faavae i le Faavae ma le taofia o le faaiuga a le Faamasinoga tau Palota, lea ua fa’aleaoga ai lona tofiga, se’ia mae’a uma faamasinoga.

I le faai’uga a le Faamasinoga tau Palota, sa ta’usalaina ai Toelupe i le totogitupe o palota, ona o se tinoitupe e $150 sa tu’uina i se ulugalii, e le i mafai ona maua mai, e tutulai e molimau i luma o le faamasinoga.

Na faaalia e le Afioga i le Palemia, Laaulialemalietoa Leuatea Polataivao Fosi Schmidt, ia le tele o se lusi ia te ia ma le malo, ona o lenei faaiuga ua ave’esea ai le tofi mai ia Toelupe, aemaise ai galuega faatino a le sui Palemia mo le faaleleia o le atunu’u.

Na ta’ua e La’auli ia le faailoaina atu o le fa’amavaega a Toelupe, i le Afioga i le Fofoga Fetalai, e tusa ai ma le tulafono.