Ads by Google Ads by Google

Fa’asa ona faia tagata faigaluega a le malo - Kemupeni


[ata: SN]

Na umi se saunoaga a Kovana Lolo Moliga e tusa ai o le vaitau nei o Faiga Kemupeni ma le a’afia ai o taimi faigaluega o tagata faigaluega a le Malo, ma le isi itu, o mea totino a le Malo e fa’aaogaina ai.

 

O lana saunoaga lenei sa faia i le latou fonotaga fa’apitoa ma lana Kapeneta i le aso Faraile ua te’a.

 

Tuu sa’o mai fo’i le fa’atonuga a Kovana Lolo Moliga i lana susuga le fa’atonu o Fefa’ataua’iga, Fuiavalili Keniseli Lafaele, ona o lo ua va’aia le fa’aaogaina o eleele o le Malo e fa’atutu ai fa’ailo a paga o loo tauva mo le tofi Kovana ma le Lutena Kovana i le palotaga o lo’o lumana’i nei. Ua a’afia uma paga tauva i le taimi nei i lena solitulafono.

 

Ua manino le tulafono, ma e tatau fo’i i paga o lo’o tauva nei, ona malamalama lelei i tulafono e ao ina fa’atutuina ai latou laupapa o fa’ailo mo latou taumafaiga.

 

“Ua le mafai ona outou fa’aaogaina mea totino a le malo, ma ou taimi o totogia ai oe e le malo i le faiga o tatou kemupeni o lo’o ua tatou fa’atautaia i lenei vaitau, e faia i taimi ua manava ai mai tiute o le ua fa’afaigaluega ai oe e le Malo o Amerika Samoa.”

 

Na saunoa sa’o atu le Kovana ia Malemo, le ta’ita’i komiti a Lemanu & Talauega, “Na oo atu le au fai kemupeni a Lemanu ma Talauega e fa’aoo atu mea ‘ai ma nai meaalofa mo le pa’ia o le aufaigaluega a le Ofisa o Leoleo, i le vaiaso fa’apitoa mo le auaunaga a Leoleo o le atunuu, o le fai kemupeni le mea lena, ma e fa’asa lea tulaga ona faia i tagata faigaluega a le Malo i taimi o faigaluega a le malo, ua taumafai fo’i e una’ia mai palota.”

 

Sa te’ena lea savali e le Komesina o Leoleo lea foa’i, ona o le agaga tonu lea ua saunoa i ai Kovana Lolo Moliga.

 

Ua saunoa sa’o fo’i le Kovana e tusa o foa’i na fa’ao’o ane e le Kemupeni a Lemanu & Talauega fa’apea fo’i le Kemupeni a Gaoteote & Faiivae mo le vasega o i latou e siakia le ulufale mai o tagata ma meaola uma i totonu o le atunu’u faapea fo’i le vasega o e galulue i potu o suesuega eseese ina ia sailia ai le gasegase cornavirus, Sa fa’ailoa manino mai e Kovana Lolo Moliga, ua solia fo’i e outou uma le tulafono i lena faiga.”

 

“O faigamalo lelei ma le tonu, e amata mai i le sailia o ta’ita’i lelei ma e tausia le tulafono ua mae’a fa’ataoto e le Malo ia fa’atautaia ai le malo i taimi uma. Ia leai se mea e mata’uleagaina ai. O le ala tonu fo’i lena e mafai ona filifilia ai i latou. Ia masani ma usitai i tulafono uma.”

 

Ua fa’ailoa mai e Lolo, ua mae’a talanoa atu nisi ia te ia ona o lo’o i ai taimi ua va’aia ai le Loia Sili ma isi fa’atonu o auai atu i Kemupeni, ma taimi ua faia ai kemupeni faalaua’itele.

 

“E i ai le aia tatau a i latou o tula’i i nei tofiga e auai ai i Kemupeni a i latou ua manatu e latou te sapaia, peita’i e te le alu ai e faaaoga lauta’avale a le Malo lena e te fa’aaogaina. Tuu lelei a le ta’avale a le Malo i lou fale, ae savalivali e fai lau kemupeni.”

 

Ua ia fa’ailoa fo’i i le mamalu lautele, “Ou te le mafai ona fa’asaina le Komesina o Leoleo mai lona auai i Kemupeni ma po’o ai fo’i e palota i ai, aua a oo loa i ona taimi ua le totogia ai e le Malo, o lana lea aia tatau e filifili ma sapaia lana filifiliga.”

 

Na saunoa fo’i Lolo i le vaega o lo’o ta’ita’ia Kemupeni eseese, “Ia outou fai malu le faiva, ma ia fa’aaloalo le isi i le tasi i nei taumafaiga ua fai nei. Ia filemu fo’i le taumafaiga a le atunuu e saili ni ta’ita’i lelei mo le isi folauga fa’aauau a le tatou malo o loma nei.”

 

Ua ia fa’ailoa mai, ua va’aia lava le fa’atutu loa o fa’ailo a lea kemupeni i se ogaeleele, o atu fo’i le isi komiti, fa’atutu ai ma latou fa’ailo, ua toetoe a pupuni e le tasi le isi. O fa’ailoga na e le o galulue fa’atasi outou kemupeni uma ua fa’atautaia i le atunuu.

 

Ua ia tima’ia le vasega o fa’atonu eseese, ia amata ia te outou ona fa’atula’ia mai le filemu ma le anoanoa’i i fa’ata’ita’iga lelei ma le tonu i le atunuu ma a outou kemupeni o fa’atasi i ai.