Ads by Google Ads by Google

7 Masina o le tautua a le Hope Dialysis


O le falema’i e fa’apitoa le tautua mo gasegase o le fa’amama toto, ua mafai fo’i ona latou talia so’o se talosaga mai fafo mo i latou uma ua fa’amama o latou toto ae fia asiasi tafafao mai i aiga i le tatou nei malo - Hope Dialysis Center. [ata: Leua Aiono Frost]

O Me 7 ua atoa mai i ai le fitu masina  talu ona tatala lenei tautua mo le mamalu o le atunuu ua fa’amama toto i le teritori, ae le’i fa’atumulia lava latou avanoa mo gasegase e tautuaina. Peitai e le o se fa’amuamua lea i le latou tautua.

 

“Ua ave lava le fa’amuamua i le auaunaga ia matua lelei ona va’aia ma togafitia i latou e gasolo mai i le Hope Dialysis ina ia malolosi lelei tino pe a mae’a togafitiga, ma ia fa’aitiitia fo’i le taimi e fa’amama ai le toto i aso ma itula ua atofaina mo i latou,” o se tala lea a le Hope Dialysis.

 

“I le taimi nei, ua leai se isi ua matou tautuaina o loo fa’asea ona o le tiga e lagona e i latou pe a fa’amama le toto, ua agai foi ona sologa lelei le latou fa’alogo i o latou tino, ua le fa’alogoina se vaivai i le tele o taimi e oo lava ina toe sau e fa’aauau le togafitiga o lo’o malolosi lava i latou. Ma ua fa’aitiitia atili ai le taimi mo le togafitiga e soso’o mai.”

 

O mea mautinoa e ao ina silafia e le vasega o i latou e fa’amama toto e tusa o le tautua o otoina mai e le Hope Dialysis, o le i ai lava lea o le foma’i fa’apitoa e va’aia lelei oe a’o lei amatalia lou togafitiga i so’o se taimi e te oo atu ai mo lou talavai.

E fa’atalanoa fo’i oe pe i ai se suiga ua e fa’alogoina i lou tino e tusa ai o lou gasegase. Afai e i ai, e mafai ona siakia mea uma lava tau lou togafitiga a’o le’i toe fa’aauauina lou togafitiga.

 

O nei tautua uma e le totogia fo’i. E oo foi i le auaunaga a le “Dial a Ride” ua fa’aaogaina nei mo tagata uma e fia aga’i mai mo talavai fa’amama toto. Ua i ai foi tatou nofoa fa’ata’avalevale mo le fa’atinoga o le auaunaga i lou toai mai i le falema’i ma le toe ave’esea atu o oe i lou aiga.

 

E fa’afeiloa’ia muamua lava oe e le vasega o tamaitai laufofoga fiafia ua mae’a i ai agava’a fa’apitoa e fa’atalanoa ai oe i tulaga o au mea tausami paleni e tausia lelei ai oe ma lou fa’atafa gasegase.

 

Soo se taimi e fia fa’afesiligia ai se fa’aletonu o e fa’alogoina, e i ai le foma’i fa’apitoa o Fatuga’o e mafai ona talanoa ia e oe ma fautuaina oe i so’o se mea e te fia malamalama ai tau lou ma’i ma le afuaga o lou a’afia ai i lea ma’i. Mai lenei 7 masina ua tuana’i o le auaunaga a le Hope Dialysis, e leai lava se tasi o latou gasegase o tautuaina ua maumau le soifua, ae ua fa’afiafiaina fo’i i latou uma i le auaunaga. Ua tele fo’i se suiga ua molimauina e i latou uma mai latou togafitiga ma o se suiga lelei lea ua fa’afiafiaina atili ai le Hope  Dialysis.

 

“Ona o lenei vaitau o lo ua taofia foi femalagaiga i le va o le tatou teritori nei ma le Malo Tele lea sa to’atele i latou na talosaga mai ni avanoa e asiasi mai ai i o latou aiga ae ua toe solofua nei, ua tele ai avanoa i le tatou tautua.  Peita’i ua lava saunia foi i matou uma, mo le taimi e toe tatala ai femalaga’iga, e fa’aauau pea le tautuaina o i latou e fia ulufale mai ma togafitia a’o tafafao mai,” o se talaotooto lea a Chris Fisher e tusa o le auaunaga i lea foi itu o le vai, e ese mai lea i le auaunaga i le Fa’amama Toto i le LBJ Medical Center.

 

E talia lava so’o se tasi e sulufa’i mai pe afai ua lagona lava le tigaina, ina ia talanoa ma fetufai i auga o lea fo’i gasegase tiga.