Ua mae’a nei le vaega muamua o le Polokalame mo Fanau i le tuuaga o aoga, e pei ona faagasolo ai le Baseball Summer League mo fanau e 4 tausaga e oo atu i le 10 tausaga le matutua, lea na taualuga i le tufatufaina o fa’ailog i le fa’aiuga o le vaiaso na te’a nei.

I le taualugaina ai o lenei polokalame mo fanau laiti, na tula’i mai ai le ‘au a le Little Rascal i le siamupini, ma latou maua ai le Ipu autu o le ta’amilosaga.

I se pepa o fa’amatalaga sa tuuina mai i le Asosi Baseball sa faatautaia lenei ta’amilosaga, na taua ai le mataina a le maualuga o le tomai ma le iloa o fanau i le faatinoina o le ta’aloga.

O le alii o Payton Fuimaono, 9 tausaga mai Iliili ma Futiga na ia maua le fa’ailoga o le tama taalo o le ta’amilosaga o lenei tausaga (2015 MVP).

O le alii laititi o Fuimaono sa taalo i le tulaga o le ‘baseman’, lea fo’i sa vaaia ai le lelei o lana taalo i le ta’amilosaga atoa. Ina ua fesiligia o ia e tusa ai o le avanoa ua avea ai o ia ma MVP, sa taua e lenei alii talavou lona fiafia, atoa ai ma lona naunau e fai meaalofa i lona grandfather o Myron Thompson, i lona fesoasoani malosi ia te ia i soo se taimi e alu ai i ana koleniga, ma auai fo’i i taimi uma e taalo ai.

Na faafetaia fo’i e le ali’i laititi lenei ana faiaoga e toalua ia Vili Faapouli na Quijano Taotua, ona o le avanoa sa laua aoaoina ai o ia i le ta’aloga.

Na taua e le ali’i faiaoga o le ‘au a le Little Rascal sa manumalo ia Faapouli i se pepa o fa’amatalaga e fa’apea, o le galulue faatasi o alii ma tamaitai o le ‘au atoa ai ma le lagolago a matua, o le mafuaaga lea na ala ai ona manuia taumafaiga a lana ‘au i lenei ta’amilosaga.

“Avea ai fo’i lenei avanoa e fa’afetai atu ai le ‘au a le Rascal i matua ma faapea uo ma i latou sa lagolagoina lenei fa’amoemoe, faapitoa i le afioga i le Fofoga Felalai ia Savali Talavou, afioga i alii faipule e aofia ai Larry Sanitoa, Fetu Fetui Jr ma le kamupani a le Solar Inc, e tusa ai o lo outou lagolagoina o le fa’amoemoe a le fanau,”  o le saunoaga lea a Fa’apouli.

O le vaiaso lenei ua faamoemoe e amata aloaia ai loa le vaega lona lua o lenei polokalame, o le ta’amilosaga lea a fanau matutua, ona o le agaga maualuga lava ia mafai pea ona atina’e le ta’aloga Baseball i fanau talavou.

“O le agaga maualuga o le polokalame, ia maua le avanoa e atina’e ai pea le ta’aloga Softball mo fanau laiti, ina ia faaopoopo ai pea lo latou tomai i le ta’aloga mo le lumana’i,” o le saunoaga lea a Faapouli.