Pago Pago, AMERICAN SAMOA — O le taeao ananafi na fa'ataunu'u ai le sauniga o le Fa'au'uga a le Aoga Maualuga a Kanana Fou, lea na fa'au'u mai ai le to'a 20 o fanau aoga.

O le susuga Mali'oli'o Ailima, le sui pulea'oga, sa ia saunoa fa'afeiloa'i ia i latou na auai i le sauniga.  Na muaimalae le saunoaga a le tama'ita'i Pule A'oga Sinata'aga Gaoteote Tufele e momoli le fa'afetai ma le agaga fa'agae'etia i a latou sa auai.

O le sini po'o le a'ua'u o le aso patino i le fanau fa'au'u: "I miti, e tatou te ulufale atu ai i se lalolagi fou a tatou lava!"

I le saunoaga a Tufele sa ia fa'alauiloa le Sui ua avea le tulaga lua o le vasega fa'aiuaso 2018, le ali'i talavou o Ualesi Mua. O lana GPA e le'i fa'alauiloaina lea i le fa'au'uga, peita'i o ia o le alo o Fetuao ma Sunema Mua, ma o i la'ua fo'i o lo'o a'otauina i le Kanana Fou Seminare.

Na fa'afetaia e Ualesi Mua le avanoa fa'asikolasipi na ofoina e le EFKAS ina ia totogia ai lana a'oga, ina ua talosaga lona tama fa'aleagaga, Rev. Toma mo lea avanoa ona o lo'o a'o'oga fo'i nai ona matua i le Seminare. O lea sana fe'au taua, ma ua ia fa'ailoa, "E le fa'agaloina le agalelei o le Atua ua ala mai i le Ekalesia ua mafai ai ona ia tepa i 'ula ma sa'a i ma'a o malie le tama mai le Alataua."

O le ua avea ma togisilia i le vasega fa'ai'uaso o le tama'ita'i o Sootaga Vaiava Utu mai le afio'aga o Amouli. Na faau'u mai le vasega 8 i Kanana Fou lava i le 2014, e fa lelei tausaga a'o i ai i Kanana  Fou High sa avea ai o ia ma sui e tauva i le Numera a le Teritori. E fa fo'i tausaga o manumalo i le tulaga muamua i Kosi fa'apisinisi a Kanana Fou. O ia o se alo o Setefano ma Patricia Siamu. E le'i fa'aalia fa'alaua'itele fo'i le GPA a le tama'ita'i togisilia. Ua talia o ia i le Southern Oregon University, e mafai ona ulufale i ai i le tausaga aoga fou.

Matagofie le lafolafo a le tama'ita'i lea sa ia matua fa'afetaia o latou matua, o latou matua fa'aleagaga, o latou aiga, uo ma e masani, i latou sa faia le faiva o le sapai o mea uma e fa'atino mo le latou ola a'oa'oina, ina ia to'ai taunu'u i le aso nei, o le aso sa latou moemiti i ai.

"Ua taunu'u se tasi vaega o le miti, ae tulitulimatagau pea le autu ma le sini o le miti, aua e fia maua le manuia e fia tepa fo'i i mea ua mae'a folafolaina mo le taugata tausinio ma le loto, ae ua mata'u lava i lona Atua."

O le sao o le malo, o le saunoaga a le afioga le Lutena Kovana Lemanu Sialega Mauga ma sa ia fa'apea ai, "Ia tautuana ma outou le mau a le tou a'oga na fa'atula'ia e outou matua ‘Mata'u i le Atua o le amataga lea o le poto’.

O le fofoga fa'apitoa na filifili e le au  fa’au’u, o le Failautusi o le Council of World Missions mai le latou Ofisa Autu i Fiti mo Atumotu o le Pasefika, le susuga Rev. Dr. Cliff Bird. O ia lea sa ia tima'i i le vasega fa'ai'uaso, "Ia outou miti e pei ona miti o Iosefa, lea sa matua maualuga lona fa'amoemoe ma ia iloa lelei lona vala'auina i mea tetele.

O i latou na taua'aoina o latou tusi pasi fa'atasi ai ma Tusi taualoa a le Konekeresi na saunia e le Faipule o Amerika Samoa i le Konekeresi, Aumua Amata, e aofia ai: Alisi Moa, Christian Simi Tupuola, Fiapa'ipa'i Lualua, Finora Ikaterina Sai, Foa'imalelotoatoa Ray Tautala, La'ala'ai Taisia Ale, Luania Steffany Sitovi Fa'avae, Malcolm Hans Afoa, Naomi Tuafale Siaosi, Nepo Donnyberacah Tuailemafua, Niles Penaia Seniti Tuamoheloa, Pearlnina Malo, Peleise Senetenari Ale, Penny Arieta Pine, Shermaiah Gerry Peretania, So'otaga Vaiava Utu, Ualesi Mua, Victoria Tilomai Ifopo ma Vili Mati Feagaimali'i.

O i latou na lautogia i fa'ailoga fa'apitoa e aofia ai le fa'ailoga fa'apitoa na saunia e le Rotary Club of Pago Pago na maua lea e Penny Arieta Pine. O le ali'i o Malcolm Hans Afoa ua talia nei o ia i le US Army.

Talia i le Southern Utah University o Victoria Tilomai Ifopo. O i latou ua talia i le Southern Oregon University: So'otaga V. Utu, Ualesi Mua, Victoria Tilomai Ifopo, Fiapaipai Lualua, Nepo D. Tuailemafua ma Pearlnina Malo.