SAILI PEA E LEOLEO TUPULAGA FA’ATUPU VEVESI I PAVA’IA’I

E to’alua isi ali’i talavou mai Pava’ia’i o lo o tau sailia pea e Leoleo, talu mai le fa’alavelave lea na tula’i mai i le amataga o le vaiaso nei, ina ua fa’atupu e nei ali’i talavou misa ma vevesi e ono save’u ai le nonofo filemu o tagata lautele o le atunu’u.

E na o le to’atasi le ali’i talavou na mafai ona pu’e fa’apagota mai e leoleo i Pava’ia’i, e na o le ali’i o Paea Paea, 22 tausaga le matua, lea ua toe tatala i tua e aunoa ma se na totogi e fa’atali ai lana ulua’i iloiloga lea ua fa’atulaga i le aso 3 Novema 2016.

O le malu ifo o le afiafi na logo ai e ni aiga tuaoi le Ofisa o Leoleo mo se fesoasoani, ina ua fa’alogo ni tagata o lo o fa’aumuumu ma pisapisao i totonu o le nu’u, e aofia ai ma le latou lafo o upu masoa i le taimi o faigalotu o le afiafi.

Na avea uiga le migao o ali’i talavou nei ma itu na laga atu ai loa isi tupulaga o le nu’u ma fasi fa’amo’amo’a loa ma latou, ma sosola ese ai le isi to’alua ae maua ai e Leoleo na o Paea i le latou fale, ma taofia fa’apagota ai loa o ia.

I luma o le fa’amasinoga fa’aitumalo i le aso Lua na te’a nei, na teena ai e Paea le moliaga o le faatupu vevesi i nofoaga faitele fa’asaga ia te ia. Na taua e le itu a le malo i le fa’amasinoga e fa’apea, o loo taumafai pea Leoleo e saili mai isi ali’i sa a’afia i lenei fa’alavelave, ona ua molimauina le fa’atele ona tula’i mai o uiga le manuia ia i totonu o le afioaga e ono lepeti ai le nonofo filemu o tagata.

O ni isi o poloaiga a le fa’amasinoga ua tatala ai i tua Paea, o le fa’asa lea ona ia toe tagofia le ava malosi, fa’asa ona ia toe soli se tulafono a le malo, a ia avea o ia o se tagatanu’u e tausisi i tulafono i taimi uma.

AMOSA LOMIGA

O le vaiaso fou lea ua faamoemoe e tuuina atu ai le faaiuga a le faamasinoga maualuga faasaga ia Amosa Lomiga, i le mae’a ai lea ona ia ta’utino i luma o ali’i fa’amasino, e fa’amaonia tu’uaiga o lona le usitaia o poloaiga o lana nofovaavaaia, e mafua mai i le fa’alavelave lea na ia faaoolima ai i se isi ali’i sa faia sa latou inugapia, atoa ai ma lona fa’atamala e totogi lana salatupe e $500.

O Lomiga na ta’usala e le fa’amasinoga maualuga i le 3 tausaga talu ai i le moliaga o le fa’aoolima i le tulaga lua, ma poloaina ai loa lona tuliina o masina e 20 i le toese i Tafuna, o se tasi lea o tuutuuga o lana nofovaavaaia e 5 tausaga.

O isi poloaiga e aofia ai le faasa ona ia toe tagofia le ava malosi, fa’asa ona ia toe solia se tulafono, a ia avea o ia ma tagatanu’u lelei e tausisi i tulafono a le malo, ma totogi lana salatupe e $500 i le fa’amasinoga.

O le masina na te’a nei na faila ai e le Ofisa faanofovaavaaia sa latou talosaga i le fa’amasinoga maualuga, mo se poloaiga e faaleaoga ai le nofovaavaaia a le ua molia, i le mae’a ai lea ona ta’usala o ia e le fa’amasinoga faaitumalo i le moliaga o le fa’aoolima i le tulaga tolu, e mafua mai i le fa’alavelave lea na ia fa’ao’olima ai i se ali’i sa latou inupia fa’atasi.

Na ioe fo’i Lomiga i lona fa’atamala lea e totogi lana salatupe, atoa ai ma lona tagofia o le ‘ava malosi.