Ads by Google Ads by Google

Tala otooto mai le Fono Faitulafono

ausage@samoanews.com

TALIA MAOTA O SUI SUIGA A LE SENATE

 

Na fa’ai’u le fonotaga a Komiti Teuteu a maota e lua i le taeao ananafi, i le taliaina lea e le Komiti Teuteu a le maota o sui o suiga ua mae’a ona pasia e le Senate, i le pili sa talosagaina e le faigamalo a Lolo ma Lemanu, e tu’u atu ai le malosi i sui o le Ofisa o Tiute latou te sailia ai uta mai fafo, e fa’aaoga i ai masini fa’ata (scanner), atoa ai ma le fa’ae’e lea o totogi mo pisinisi ma tagata ta’ito’atasi, mo le siakiina o a latou uta mai fafo.

 

Na malolo tauaofiaga a maota e lua i le taeao ananafi, ae tu’u le avanoa e feiloa’i ai Komiti Teuteu a maota, ina ua teena e le maota o sui suiga a le Senate sa faia i le latou tulafono.

 

O le komiti teuteu a le maota o sui e aofia ai Fatulegae’e P. Mauga, Puleleiite T. Li’amatua ma Timusa T. Lam Yuen, ae o le komiti teuteu a le maota maualuga e aofia ai Gaea P. Failautusi, Laolagi F. S Vaeao ma Magalei Logovi’i.

 

E silia i le 15 minute o fono komiti teuteu a maota e lua, ma tasi ai loa le fa’aiuga ina ia talia suiga a le senate, ae ina ua tu’uina atu le ripoti a le komiti teuteu i luma o le maota o sui, sa i ai ni isi o afioga i faipule na latou fesiligia le fa’aiuga ua faia, ui o lea, na fa’ai’u felafolafoaiga i le taliaina lea e le maota o suiga a le senate.

 

O suiga e pei ona pasia e aofia ai tulaga nei, mo le su’eina o uta e aumai i container e ta’i 40 futu le uumi pe sili atu, sa manatu le malo e tatau ona totogi e pisinisi ma tagata ta’ito’atasi le totogi e $350, peita’i ua suia e le Senate i le $200. Mo le su’eina o uta e aumai i container e ta’i 20 futu le uumi, sa manatu le malo e tatau ona totogi e pisinisi ma tagata ta’ito’atasi le totogi e $250, peita’i ua suia e le Senate i le 150.

 

Mo le su’eina o uta e aumai i pailate, sa manatu le malo e totogi e pisinisi ma tagata ta’ito’atasi le $100, peita’i ua suia e le Senate i le $50. Ae mo ta’avale afi poo mea faigaluega mamafa, sa manatu le malo e totogi le $75 e saili ai, peita’i ua suia e le Senate i le $50. O lo o tumau pea le totogi mo le su’eina o afifi e aumai e pisinisi i le $10 e pei ona fuafuaina e le malo, atoa ai ma isi lava totogi e mafai ona fa’ae’e atu e se sui o le Ofisa o Tiute i le taimi e fa’atinoina ai lenei auaunaga.

 

LUA TULAFONO UA SAINIA E LE ALI’I KOVANA

 

O le vaiaso nei na tauaao ai e ta’ita’i o le Fono Faitulafono ni tusitusiga mai le afioga i le ali’i kovana ia Lolo Matalasi Moliga, e fa’ailoa mai ai lona sainia o tulafono e 2 ua mae’a ona pasia e le Fono Faitulafono ina ia aloaia ma avea loa ma tulafono.

 

O ia tulafono e aofia ai suiga i le tulafono na fa’avae ai totino o le Komiti Fa’afoe o le Ofisa o Femalagaaiga, ina ia suia mai le to’a 5 i le to’a 4 sui e mafai ai ona faia fa’aiuga a le Komiti Fa’afoe i soo se taimi e usuia ai ana fonotaga, ma le tulafono e fa’aitiitia ai tulaga o lafoga e totogi e pisinisi i le malo, ma toe fa’atulaga ai auale e fa’amalosia ai le aoina mai o lafoga e totogi e pisinisi i le fa’aiuga o tausaga fa’aletupe.

 

O le tulafono i tulaga o lafoga, ua fa’aitiitia mai ai i le 44% i le 34% le maualuga o le tupe e totogi e pisinisi uma e silia i le $650,000 a latou tupe maua i le tausaga.

 

Na taua e le ali’i kovana i lana tusi i ta’ita’i o le fono faitulafono e fa’apea, o le pasiaina e le fono o tulafono nei e lua, o le a fa’a faigofie ai i le faigamalo ona fa’atino lana pito laau mo le atina’eina lea o le malo i soo se vaega.