Ads by Google Ads by Google

Tala otooto mai le Fa’amasinoga

ausage@samoanews.com

TOFU MATAUPU A SAKOPO MA GASOLO FA’AMASINOGA MAUALUGA

 

O le masina o Novema lea ua tolopo i ai mataupu i le va o le malo ma ali’i e to’alua, lea o lo o tuuaia i le fa’alavelave lea na maua ai ia te i laua vaega o fualaau fa’asaina, atoa ai ma se aupega e le i lesitalaina.

 

Na tutula’i i luma o le fa’amasinoga maualuga i le taeao ananafi le ali’i o Wayne “Ueni” Gasolo ma Ioane Sakopo ma la teena tu’uaiga fa’asaga ia te i laua. O Gasolo o lo o tu’uaia i le moliaga mamafa e tasi o lona umia fa’asolitulafono lea o vaega o le pauta fa’asaina o le aisa, ae o Sakopo o lo o tu’uaia i moliaga e lua, o lona umia fa’asolitulafono o vaega o le pauta fa’asaina oona o le aisa, ma le moliaga mama o le umia fa’asolitulafono o se a’upega mata’utia.

 

E pei ona taua i fa’amaumauga a le fa’amasinoga, na osofa’i e Leoleo le fale tu’ufua sa fa’amautu i ai i laua e to’alua ma ni isi o tama’ita’i, ma maua atu ai e leoleo vaega o fualaau fa’asaina, fa’apea ai ma ni tama’ita’i talavou.

 

O le ali’i lona tolu lea o lo o tau sailia nei e Leoleo, o ia o lo o tu’uaia i lona fa’aaoga o tama’ita’i talavou mo feusuaiga ae fefa’afesuia’i ma fualaau fa’asaina, e pei ona taua i fa’amaumauga a le fa’amasinoga.

 

E le o mafai ona tatalaina i laua e to’alua i tua mai le toese i Tafuna, se’i vagana ua totogi le vaega tupe e $10,000 lea ua fa’atulaga e le fa’amasinoga e totogi ona fa’atoa mafai lea ona tatala i tua.

 

TU’UAIA ALI’I I LONA FA’AO’OLIMA I LONA TO’ALUA

 

Na teena e se ali’i pe a ma le 34 tausaga le matua moliaga mama e 2 o le fa’atupu vevesi i nofoaga faitele, atoa ai ma le fa’ao’olima i le tulaga tolu, ina ua tula’i i luma o le fa’amasinoga fa’aitumalo ananafi.

 

O moliaga e pei ona tu’uaia ai le alii’ ua molia na afua mai i le fa’alavelave lea na tula’i mai i le fa’aiuga o le vaiaso na te’a nei, ina ua ia ‘ona atu i le fale ma ia fa’ao’olima i lona to’alua e ala i lona futi o lona ulu ma ta tu’i ona foliga.

 

Na fa’ailoa e le fafine i Leoleo e fa’apea, o le vevesi i le va o ia ma lona to’alua na afua mai ina ua taumafai lona to’alua e su’esu’e o ia i tupe sa tu’u atu e fa’atau ai mea e mana’omia mo le aiga aemaise ai le la fanau.

 

O le taimi na moe ai le ua molia, na tago ai loa le fafine i le telefoni ma vili Leoleo, ma aga’i atu ai loa Leoleo ma pu’e mai le ua molia i le fale.

 

Ua fa’asa e le fa’amasinoga le ua molia ona toe alu i le fale o lo o nonofo ai lona to’alua ma lana fanau, se’i vagana ua tu’uina atu se isi poloaiga a le fa’amasinoga.

 

TOE A’AFIA FO’I FINAU WILSON I LE TULAFONO

 

O le fa’atamala o le ali’i o Finau Wilson i le fa’aiuga o le vaiaso na te’a nei, na mafua ai loa ona toe a’afia o ia i le tulafono, ina ua maua o ia e Leoleo o lo o ia fa’afoeina se ta’avale ae o lo o se’i lona laisene.

 

Ae o le itu e pito sili ona matuia ai le fa’alavelave fou lea ua toe a’afia ai Wilson, o lona fa’afoeina lea o le ta’avale a o ‘ona. O le taeao ananafi na tula’i ai Wilson ma ia teena le moliaga mama e tasi o le ave ta’avale ‘ona, ma le fa’amoemoe o le malo o se taimi o lenei vaiaso latou te failaina ai le moliaga mamafa o le ave ta’avale a o se’i lona laisene e le fa’amasinoga.

 

E pei ona taua i fa’amaumauga a le fa’amasinoga, na avea le tifa solo o le ta’avale a Wilson i luga o le auala ma itu na vili ai loa e se isi ta’avale le Ofisa o Leoleo i Tafuna, ma ripoti i ai le fa’alavelave na semanu e a’afia ai lana ta’avale.

 

Na tuliloa e ta’avale a Leoleo le ta’avale sa masalomia o lo o fa’afoeina e le ua molia, ma latou maua atu ai i luma tonu o le malae taalo i Tafuna, le Veterans Stadium, ma fa’atonuina ai loa le ua molia e afe i tua lana ta’avale.

 

Na taua i fa’amaumauga a le fa’amasinoga le vaaia fo’i e Leoleo sa malaga atu i le ta’avale le tifa solo o le alu o le ta’avale a le ua molia, ma latou fa’atonuina ai loa o ia e afe i tua lana ta’avale.

 

O le tau le manino o le tautala a le ua molia atoa ai ma le mumu o ona mata, o ni isi ia o vaega sa fesoasoani ai i Leoleo e fa’amaonia la latou mau, sa matua ova le ‘ona o Wilson i le taimi na taofia ai o ia, ae ina ua fesiligia lona laisene ave ta’avale, sa ta’utino le ua molia i Leoleo e fa’apea, o ia e le tatau ona toe fealua’i i se ta’avale i luga o le auala, ae talu ai ua leai se isi e sau e fai atu le fa’atau a lana fanau, o le mafua’aga lea na ia manatu ai loa e fa’agalo le poloaiga a le fa’amasinoga e fa’asa ai ona ia toe aveina se ta’avale.

 

I le aso na ta’usala ai e le fa’amasinoga fa’aitumalo ia Wilson i le moliaga o le ave ta’avale ‘ona i le tausaga na te’a nei, na poloaina ai o ia ina ia aua ne’i ona toe aveina se ta’avale i totonu o le 2 tausaga lea ua se’i ai lana laisene ave ta’avale, aua fo’i ona ia toe tagofia se ‘ava malosi i le umi e 12 tausaga o lana nofovaavaaia

 

O le moliaga o le ave ta’avale a o se’i le laisene, e mafai ona fa’asala ai se tasi i le toese mo le umi e le silia i le 5 tausaga, ae fa’amalosia ai le tuli o aso e 90 i le falepuipui, pe fa’asala fo’i i le salatupe e le silia i le $5,000.