Ads by Google Ads by Google

Tala I Vaifanua


Vaega o Fa'amaumauga Solitulafono Tau Feusuaiga i le Ofisa o le Loia Sili a le malo. [ata: Leua Aiono Frost]

O Bruckner Chase ua fa'ailoa mai, "E opeopea popo, ae a le tagata ua faia lona ofu a'au?" Fa'asao oe fa'aaoga le ofu a'au peita'i, e sili lava lou iloa lelei a'au. ata: Leua Aiono Frost]

VAEGA FA’AMAUMAU SOLITULAFONO FA’ALEITUAIGA

 

O le vaiaso na te'a na fa'atula'ia ai se isi vaega fou i le Ofisa o le Loia Sili, e taua o le "Vaega Fa'amaumau Solitulafono Fa'aleituaiga" [American Samoa Sex Offender Registry - ASSOR] ma ua tofia fa'apitoa fo'i nisi e faigaluega tumau ai. O le vaega tupe mo lea ofisa mai le fetarale.

 

O lea ofisa e fa'amaumau suafa o i latou na fa'amaonia e le Fa’amasinoga solitulafono tau feusua'iga le tatau ma fanau e le'i uma le pule fa'aletulafono a matua, fa'ataumaoia fa'aleituaiga o fanau i faiga fa'asotoma, fa'amalosi tama'ita'i, fa'amanu'alia o fanau ma tama'ita'i i le tino ma le mafaufau, ma le ave fa'amalosi se isi tagata.

 

O le tautua lenei, ua leva ona i ai le lisi o i latou mo le silafia ma le fa'aaogaina e le tatou Malo iinei, peita'i o le fa'auia o ala o feso'ota'iga i laina o le Initeneti, e le'i fa'ataunu'uina.

 

Lea la ua fa'amalosia nei lea itu, ona o le aiaiga tamau o le alagatupe ua fa'aleleia atili ai lea tautua, ina ia silafia e tagata lautele suafa o i latou e pei ona fa’amaonia solitulafono.

 

Ua amatalia nei ona fa'amaumau nei sui uma mai le tausaga 2015 ma aga'i mai i luma, ae i ai le taimi e mae'a loa le lisi lea e tulituli ia vave ona mae'a, toe fa'asolo loa aga'i i tua atu o le 2014 ma aga'i i tausaga talu ona fa'avae le tatou malo.

 

ALAGATUPE SAPAIA A’OA’OGA TAU FAITAU TUSI

 

Ua fa'ailoa e le Faipule i le konekeresi, Aumua Amata ua agava'a le Matagaluega o A'oga a le malo mo le tinoitupe e $250,447 e fa'aleleia atili ai a'oa'oga tau le faitau tusi ma le tusitusi i le atunu’u.

 

"Ou te fiafia tele pe a o'o ina maua fesoasoani fa'apenei mo tatou faia'oga i le matagaluega o a'oga, ina ia mafai ona fa'aleleia atili le tomai o fanau e faitau tusi ma fesoasoani fo'i i faia'oga i la latou matafaioi i le potu a'oga, o le a'oa'o o le fanau ia lelei le faitau tusi ma ia malamalama ai,” o a Amata lea.

 

"O le taumafaiga a le tamaititi e ao ina ausia e ia ona una'ia lana taumafaiga ia mafai ona pasi mai a'oga maualuluga, ma agai atu ia fa'atino ana miti o le avea ma se tasi e tautua i se galuega e ala mai ai sona lumana'i manuia, ae amatalia mea uma i le faitau ma le malamalama!"

 

O lea vaega tupe mai le USDOE Striving Readers Comprehension Program, mo le fanau o lo'o taumafai e a'oa'o le faitau tusi ma le malamalama lelei. O le polokalama ua pasia e le Konekeresi a le Malo tele ina ia fa'aaoga tatau e a'oa'o atili le fanau talavou a le Iunaite Setete, "ia faitau ma le malamalama lelei." A mae'a ona toina mai lea seleni ona taumafai lea o le Malo o lo ua toina i ai le tinoitupe lea, e fa'atula'ia se latou "Polokalama Fa'ataoto mo le Faitau & Le Malamalama Lelei."

 

"O le una'ia e fa'aleleia atili le "Faitau ma le Malamalama Lelei" e aoga tele mo le isi tupulaga faia'e o le atunu'u,” o se toe upu lea a Amata.

 

TOE FO’I MAI BRUCKNER CASE - VAIASO GATAIFALE

 

Le ali'i a'au mamao ma ua lauiloa fo'i i Amerika ma le teritori nei, Bruckner Chase, lea ua toe malaga mai mo le fa'amoemoe e auai i le fa'atauaina fo'i o le tatou Gataifale i lenei tausaga atoa ai ma le pu'eina o se ata tifaga lea e fa'atautaia e le National Weather Service Ocean Today. O lenei le ali'i a'au sa ia 'a'au mai  le motu o Aunuu e o'o mai i le tatou Malae o Suigaula i le fa'ailogaina fo'i o le vaiaso mo le Gataifale i le tausaga 2011.

 

O le ata tifaga ua fa'atulaga e fa'amae'a lelei ia Setema 25 i Leone, aua o lo'o i ai fo'i fa'asao o le Gataifale o lo'o fa'atautaia ai, ma ua faia nei ata ina ia avea ma ala o a'oa'oga aoga mo tupulaga fai a'e o le Iunaite Setete o Amerika, e ala o se tautua a le National Weather Service.

 

Ua avea Chase ma sui e va'aia toto'a le saogalemu ma ua fa'atautaia ai nei ata fa'asolo ua fa'aigoaina o le "Surf Zone Safe" e fa'amatala ai le sami ma ituaiga o meaola o lo'o ua ola ai e ono aafia ai le soifua o i latou o ta'e'ele i ona matafaga lea e aofia ai Amerika Samoa ma fa'asolo atu i Kalefonia i Saute, le talafatai i sasa'e o Amerika ma le talafatai i Matu o le Pasefika faapea Hawaii.

 

O lea fo'i vaega o ata fa'asolo ua avea o se vaega o le Polokalama a le Oceani Today's Full Moon, lea ua mafai ona fa'ao'o mai ai ni lapata'iga mo le saogalemu ma a'oa'oga tau le sami ma le gataifale mo so'o se atunu'u i le lalolagi atoa.

 

Fa'ato'a tuua e ia Amerika Samoa i le aso 2 Oketopa pe a ma’ea ona talanoa i nisi o a'oga i le atunu'u, o matagaluega ma ofisa fo'i e fetufa'i ma i latou i ala e mafai ona fa'aleleia atili ai le saogalemu i matafaga ma le gataifale i taimi o fagotaga po'o ta'elega fo'i.

 

O Chase o lo ua iloga lona tomai i le tulaga o le saogalemu i le sami ma vaitafe. Ua i ai ona agavaa e fautuaina setete ma teritori i ala e fa'amalositino, tauva i ta'aloga i luga o le sami ma vai, agava'a i tu'uga aau ma ala e fa'aleleia ai tomai i na fo'i fa'agatama. Ua tele lona sao i nisi atunu'u e aofia ai Denmark, Poland ma Ausetalia.

 

Talu mai lana asiasigai le 2013, ua avea nei o ia ma sui sili ona ta'uta'ua i le sefeina o le ola o tagata fa'ase'e i le sami ma vai i le lalolagi. Ua na'o ia lava le tagata Amerika ua umia se pine fa'amau mai le tauvaga Fa'asee i Ausetalia o le Coolangatta Gold Surf Lifesaving Iron Man. I le tausaga 2016 na toe tauva ai o ia i le sailiga o le siamupini a le Lifesaving World Chmapionships ma sa avea o ia ma se tasi o le to'a 10 muamua na mau tulaga.

 

E le'i leva atu ona tauva o ia i le USLA National Championships ma na fesoasoani fo'i i le East Coast Monmouth County e maua ai le Siamupini i lea ta'amilosaga. O ia na ta'ita'ia lea au ta'aalo mo le USLA ma o le fautautua fa'apitoa mo le 2018 Lifesaving World Championships e faia i Adelaide, Ausetalia.