Ads by Google Ads by Google

Tala I Vaifanua


O tina o le galuega lea ua sauni mo le taliga o malo fa'aaloalogia i vasega o le aufaigaluega totofi a le Atua i Pago Pago fa'apea ma i latou o le AOG fa'atasi ai ma fa'asuaga o le afio'aga o Pago Pago sa auai. [ata: Leua Aiono Frost]

Tina o le galuega California Tarrant Ae sa ia ootia le lipine o le faitoto'a i le malumalu fou, ae o le Tina Ta'ita'i o lo'o galulue i le Ekalesia i Kalefonia Mrs Filigata Tarrant sa ia tatalaina le faitoto'a e ulufale atu ai le mamalu “Sina Siufaga” i Pago Pago. [ata: Leua Aiono Frost]

O se va'aiga i le mamalu o fa'afeagaiga sa auai i le sauniga o le fa'apa'iaga o le Malumalu fou o le All People's Pentecostal Church i Sina Siufaga i Pago Pago. [ata: Leua Aiono Frost]

MALUMALU PENETEKOSO AVEA PAGO PAGO MA “JESUS TOWN”

 

Sa saunoga le afioga le Ma'oputasi Mauga T. Asuega ma ia fa'ailoa lona agaga fiafia, aua o le vaega o lona afio'aga sa lauiloa i se igoa "China Town" lea ua ia fa'aigoaina nei, "Ua Jesus Town, ma ua le toe iloa lava lea igoa o le China Town sa masani ona faaleo ai lagona o tagata, ona e matua'i atu ai mea fa'aletonu i le soifua o tagata sa alaala ai ma faia ai feso'ota'iga fa'a-China Town!"

 

O lana tuleiga lea i le sauniga o le fa'apaiaga o le Malumalu Penetekoso lea ua mae'a lelei, sa fausia lava e lona fa'afeagaiga Rev. Lagofa'atasi Ae ma lana ekalseia mo le tausaga ma le 7 masina.

 

O le galuega lenei, o se toe a'apa a le susuga le Ta'ita'i Rev. Elder Vi'iga Tarrant ma le faletua o Filigata Tarrant ina ua la'ua tu'ua le galeuga sa galulue ai i Aua AOG i le tausaga e 2004, ae toe taliu mai i Pago Pago.

 

"Na manatu lasi le ma'ua taiiu mai ua manatu ua mae'a tautua mo le Atua, ae fai sina malologa ma tau amata ai se pisinisi mo le fanau ma le aiga, peita'i, sa le o lena se fa'aaliga na fa'ailoa mai,” o se tala lea a Tarrant i lena vaitau ua fai si leva ua te'a atu.

 

"Ae ina ua fa'aalia fo'i se vavega ma fesiligia nisi o ia te a'u, po'o le a sa'u mea e fai i ai, na toe amatalia ai loa le malumalu i le faletuai sa mua'i fa'amautu i ai le "Day Care" mai le tausaga 1996.

 

Mai ia Rev. Lagofa'atasi Ae, o le fa'afeagaiga i le Pago Pago  All People's Pentecostal Church, ua ia fa'ailoa ai, o lenei galuega e amatalia mai na'o le to'a fitu nai matafale, ae ua atoa lelei nei le to'a 24 o matafale fa'amauina.

 

O le aofai fo'i o le seleni sa aoina mo le malumalu e $120,000. peita'i o le tau aofai o le maota e sili la'ititii i le $117,000.

 

E le to'atele nisi e aofia i le galuega lenei i aso ta'itasi, ae mautinoa, sa galulue a'ia'i i latou i le po ma le ao. Lea ua tula'i ma ua avea ma nila o le Atua i lea a'ai. Ua moni ai le tautalaga a le afioga le Ma'oputasi, " O lenei a'ai ua le toe China Town, ae ua lisia nei i le mafaufau o Jesus Town."

 

Sa saunoa Mauga e tima'ia “tupulaga atoa o lea va'aia, ia galulue i ai, aua e alu aso e toe sau aso, ia outou iloa e manumalo lava Iesu i mea uma. O le Atua e manumalo ai, tatou galulue ina ia fa'afetaia ma vi'ia lona suafa i mea uma lava."

 

O lana fa'amalo sa ia fofogaina mo le "Faife'au talavou ma tino la'ititi a'o mea tetele ua e fa'atino mea e maofa ai le tagata malosi ma le tino lelei. Le Ekalesia, fa'afetai aua e le'i fausia Roma i se aso e tasi, ae sa outou fausia lava i aso ta'itasi. Ua tula'i lenei malu, ona ua outou fa'atuatua e tupu le mea lenei ma mafala e ofaga fo'i i ai le to'atele ae a le ola e fa'avavau ma ia maua manuia o le Atua. Malo lava le galulue."

 

FIAFIA TAGATA MATUTUA I LE FA’ASAO O LE GATAIFALE

 

O le aso ananafi sa va'aia ai le fiafia tele o sui o le TAOA po'o tagata matutua o le atunu'u e asiasi i le Tauese Pita Sunia Marine Center ina ia latou iloa patino le agaga tonu o fa'asao o le gataifale.

 

"Masalo e manatu i tatou o nai o tatou matua matutua ua le toe agava'a ina toe faia ni fe'au mamafa i le olaga, ae o le fautuaina o le fanau iti e o'o i o latou lava fanau ua avea ma matua i le taimi nei, e matua mau'oa ai i latou nei o tama ma tina matutua,” o se tala lea a se tasi o le aufaigaluega iloga i lea nofoaga.

 

O se mea na iloga mai, e matua tele na'ua fesili sa fa'aleo mai e i latou i le aufaigaluega sa fa'atautaia folasaga, e pei o le fa'amatalaina auiliili tulaga o mauga mu i lalo o le sami, Vailulu'u. Ua fa'apena fo'i ona maofa i latou ma fa'ailoa o latou manatu ina ia fa'ailoa atu le Amu sili ona tele i le lalolagi, i Ofu Manu'a, ma ua fa'ailoa ia i latou le ogasami ua aofia uma i fa'asao o le gataifale ma ua fa'amauina nei.

 

"Aoga tele le asiasiga lea, aua o ia lava tagata matutua, e le'i o'o mai lava e fa'alogo ma maimoa i nei mea uma, ae ou te iloa, e tatau ona auauai mai i latou e asia lenei nofoaga, e fa'apoto atili ai mafaufauga, ma toe fautua atu ai i fanau ia tautuana nei fe'au lelei a'o ola pea i lo tatou siomaga,” o se tala fiafia lea a Tivena.

 

I le taimi nei, ua suia e le Fa'atonu o le TAOA, Evelyn Satele, le fa'atautaiga o polokalama mo tagata matutua, ua amata ona faia e ia avanoa lelei e avatu ai i latou e asiasi i le tele o isi tautua a le Malo, ae maise lava i ona vaega o lo'o matele ina fa'amamafa ai fe'au lelei e ao ina lau silafia e le mamalu lautele o le atunu'u e fa'atutu lea aga'i i le siomaga ma tulaga pagatia o lo ua i ai, ma ala fo'i e fa'aleleia ai.

 

SUIGA US ARMY RESERVE - 411TH ENGINEER BATTALION

 

Mai le pulega sa tutula'i ai le susuga Cpt Langford, Michael i lea palatuni i le US Army Reserve i Tafuna ua suia nei i le susuga Cpt. Tuiolosega T Galo, o se tasi lava o alo o le atunu'u.

 

I le taimi nei e to'a 106 fitafita fa'aagaaga o lo'o ua aofia i lena Palatuni Fa'ainisinia, ma ua fiafia fo'i le agaga o nisi o i latou o lo'o aofia ai, ona o se tasi lava o uso po'o tama fanau a le atunu'u ua siitia atu i lea tulaga. Na fa'ae'e lea tofiga fou mo Capt.Tuiolosega i le aso 5 Aukuso, 2017.