Ads by Google Ads by Google

Tala I Vaifanua


O se va’aiga i se tasi o aiga fiafia fa’atasi ma Tina ona o taumafaiga ua fa’ai’u ma le manuia a si o latou sui fa’au’u, fa’amalo le tauivi. [ata: Leua Aiono Frost]

Se tasi o aiga na fiafia fa’atasi ina ua faaiu manuia mai aoaoga a le fanau. [ata: Leua Aiono Frost]

AU FA’AU’U LONA 66 A LE KOLISI TU’UFA’ATASI

 

E to’a 116 i latou na savavali e talia o latou tusi pasi i le fa’au’uga lona 66 a le Kolisi Tu’ufa’atasi i le aso Faraile na te’a, Me 19, 2017. O le aotelega lea o fanau sa taua’aoina i ai o latou tusi pasi Associate of Arts, Associate of Science, Bachelors of Education, Certificate of Proficiency mo i latou ua tau’avea a’oa’oga tau matata eseese fa’ainisinia, Kamuta, Palama ma Lipea o Masini laiti.

 

Peita’i o lo’o aofia ai ma le vasega o i latou na taua’aoina o latou tusipasi maualuluga, sa tausa’ilia i Iunivesite i fafo, ae fa’aaogaina lenei fa’au’uga e taua’aoina ai latou tusi pasi Masters of Art in Homeland Security ma le toalua na maua la’ua fa’ailoga o le Masters of Education.

 

I le polokalama fa’asolo o le fa’au’uga sa tofu sao ai i latou na vala’aulia mo lauga fa’apitoa, lea sa saunoa ai le tama’ita’i Peresetene o le Kolisi, Dr. Rosevonne Makaiwi-Pato ma fa’afetai i le vasega o matua, le vasega o faia’oga mo le latou pitola’au sa a’oa’oina ai le fanau, lea ua fua mai gauluega sa latou faia, ae maise o le vasega fa’auu i le latou tutumau i a latou taumafaiga ina ia fa’au’u ma o latou fa’ailoga.

 

“O le fautuaga mo outou, aua nei gata ai i lau taumafaiga, ae una’i pea ma le fa’atuatua e te gafatia ona fa’alautele lou atamai,” o a Makaiwi-Pato lea.

 

O le ali’i Presetene Sonny Aiono o le Pago Pago Malaeimi Stake, o le Ekalesia Mamona sa siitia le tatalo e amata ma fa’ai’u ai le fa’au’uga. Peita’i, i le saunoaga fa’apitoa a le Sui Kovana Lemanu Peleti Mauga mo le fanau fa’au’uina, sa ia fa’ailoa atu ai,  “Malo le finau, malo le onosa’i ae silisili malo le fai o le faiva, fa’afetai ma fa’amalo i o outou matua, ona o le fesoasoani sa outou maua mai nei tausaga sa outou a’o’oga ai, i le tele o mea e ao ina fa’atino mo tou vasega, ae sa latou tula’i ma lagolagosua a outou taumafaiga.”

 

Sa ia toe fa’amanatu fo’i ia i latou, “Ao outou taumafai i a outou sailiga mo fa’ailoga maualuluga, o outou fo’i o le lumana’i o Amerika Samoa.”

 

Na tula’i le sui na tofia fa’apitoa mo le upu fa’amalosi mo le vasega fa’au’u, Elinor Lutu M. McMoore. Sa ia tula’i mai ma se fa’atulagaga matagofie mo le vasega fa’au’u e tatau ona fesoasoani e fa’atautaia ai le latou soifua aga’i i luma i tulaga lava tau a’oa’oga.

 

E tolu lava sitepu sa ia fa’aleo maia:  “Fa’amaoni e tausaili le atamai, Tutumau ma onosa’i i ai ae aua le vave fiu, Fiafia i lou tagata taumafai.”

 

“A fita le ala o lau sailiga, aua e te vaivai ai, ae tutumau i le kosi na e manatu e uia i le amataga mai o lau taumafaiga, tatalo e fa’amalosi mai le Atua ia te oe, tau’avea fa’atasi mea uma, ae aua lava ne’i e alu ese ai i lau kosi na fa’ataoto mai le amataga, Taumafai ma Onosa’i.”

 

Na fa’amae’a lana fautuaga i le Fa’ataoto 3: 5-6: “Ia e fa’atuatua i le Alii ma lou loto atoa, ae aua e te fa’alagolago i lou lava atamai. Ia e manatua o Ia i ou ala uma, ona fa’atonuina ai lea e Ia lava ou ala.”

 

O le to’atolu o sui na taua’aoina latou fa’ailoga “Masters” ma na tomuli fo’i i ai le lisi o i latou na taua’aoina fa’ailoga: Lisa Tuato’o i lona fa’ailoga Masters of Arts ‘Homeland Security’. O Le’emo Susitina Fua o lona Master of Arts in Education ma le tama’ita’i o Alexandra Faiane Sooa’emalelagi - Fuimaono Master of Arts in Educational Leadership.

 

O fa’ailoga uma o le Bachelors of Education - Elementary Education e to’a fitu i latou e aofia ai: Herthalina Muaitofiga Aumoeualogo, Valasi Renita Finauga, Mereane Laumatia, Pual Ryan Manuma, Tofoipupuelemeise Lilian Magalei-Pula, Hillary Ta’ase Purcell ma Jessebeth Lynn Ropati.

 

O le tama’ita’i na maua le togisilia i le vasega fa’au’u uma sa ao’oga i le Kolisi Tu’ufa’atasi i lenei fa’au’uga na maua lea e le tama’ita’i Vaimalu Rosita Vaiau, [3.90-4.0 GPA.] O le sui na tulaga lua o latou togi: Lusia Sei Va’aiga, Leilani T. Vili, Irene Tan, John I. Scanlan, JeanJi Jung ma Motutama Nogotau Sipelii [3.75-3.89 GPA].

 

VIRGIN SAMOA FA’AMAEA TAUTUA IA TESEMA 2017

 

O le kamupani va’alele sa iloga ona pa’u ai pasese mo femalaga’iga i le va o Apia ma Niu Sila fa’apea ma Ausetalia, lea ua fa’ailoa mai, o le a motusia lana auaunaga fa’apa’aga ma le Polenisia, le Kamupani Va’alele a Samoa pe a o’o ia Tesema 2017.  Ona o le tautua le fa’aoleole ma le iloga na fa’atino e le Virgin Australia, lea sa latou tuu atu atoa i tagata o Samoa fa’apea ma le malo Samoa Tuto’atasi, ua iloga ai ona tapena e le afioga le Palemia o Samoa, Tuilaepa Malielegaoi, se tusi e tali atu ai i le Virgin Australia, mo le latou tautua matagofie mo lona atunuu ma ona tagala femalaga’i.

 

Ua fa’alauiloa fo’i le tatalaga aloa’ia o le malae va’alele fa’avaomalo “Faleolo Airport” ua fuafua e fa’ato’a va’aia ai le va’alele fou a le Polenisia ua mae’a fa’atulaga e fa’aaogaina mo feoa’iga i le va o Samoa ma isi malo tetele, e aofia ai Amerika po’o Hawaii, Niu Sila ma Australia.

 

I le tusi lava lea a Tuilaepa i le CEO o le Virgin Australia, John Borghetti, ua fa’ailoa ai se mafuaga o le taofia o lea auaunaga, “Ona ua au fa’atasia finagalo o le Kapeneta e fa’amuta ai le toe fa’afouga o lea so’otaga fa’apisinisi sa fa’atautaia ma le Virgin Samoa.”

 

O le auaunaga fa’apa’aga a le Polenisia Samoa ma le Virgin Australia, na amata ia Oketopa 31, 2005, ma fa’ailoa ai o le Polynesia Blue, ae na toe va’ai toto’a i lea feagaiga i le tausaga e 2011 ma fa’aigoaina ai o le Virgin Samoa e pei ona i ai e oo mai i lenei tausaga. Pe afai ae le toe i ai se isi va’alele e fesoasoani e fealua’i i le va o Ausetalia ma Niu Sila fa’apea ma le va ma Samoa ma nei malo e lua, o le a na’o le Air New Zealand latou te fa’ataunu’uina lea tautua.