Ads by Google Ads by Google

Tala I Vaifanua


O se va'aiga lea i se vaega o le Level 8 Gagana Ma Tu Fa'asamoa, ua latou agaga i le fa'amamaina ma fa'amatagofie le Siomaga o Amerika Samoa. Ua i ai fa'atasi i latou ma lo latou faia'oga Miracle Sene. [ata: Leua Aiono Frost]

FA'AMAMA SI'OMAGA VASEGA 8 MANULELE TAUSALA

 

O le vasega valu o le A'oga a Manulele Tausala i Nuuuli, na faia le latou galuega fa'amama i totonu lava o le latou lotoa i le aso Lulu, ma ua finagalo le tama'ita'i Faia'oga o Miracle Sene ina ia fa'atino le a'oa'oga o lo'o faia pea i totonu o le potu a'oga, ia va'ai ma faia e le fanau a latou fa'aupuga o tusigatala sa fa'aulutala - Fa'amama ma Fa'amatagotie Amerika Samoa lou Si'omaga!

 

"Ina ia mau se fe'au taua i o latou mafaufau, e ao ina fa'atino tusitusiga, e ao fo'i ina fa'atino le mau ua tauloto, po'o le solo sa latou tusia e fa'atatau i le fa'amama,” o se tala lea a Sene.

 

"Ua ou fiafia e fa'atino lenei fo' galuega fa'amama, aua e i ai tamaiti e talanoa lava ma tusi solo i le ta'alao o le lapisi, atigi fagu vai, apainu alamini, ma le anoanoa'i o pepa i'ila o so'o se ituaiga, ma fa'amama mai ese oloa mai tatou tafatafa fale, ae le faia e i latou. Ae aoga le mea ua fai nei a le matou faia'oga, ua velevao ai nisi pe fa'amama lapisi ai nisi o i matou mo le ulua'i taimi i latou olaga. E ese ese lava le fa'atino ma le na'o le tautala i ai,” se tala lea a le ali'i o Zynbad Tama e tusa ai o le latou galuega fa'amama i le a'oga.

 

"O lea la ua ese le sau o tala tusia lea ua i ai nei a le fanau, aua o lea ua o e fa'atino. Ua mau upu fo'i i latou i le fa'aupuga o latou solo ma latou mafaufauga ua le tau mafaufau, ae o lea ua tusi mai ua vave ma malie fa'aupuga o solo ua tusia,” se tala lea a Sene, faia'oga o le vasega 8.

 

FO’AI BLUESKY COMMUNICATIONS $1,000 I LE SPECIAL OLYMPICS

 

Na vala'aulia fa'apitoa e le Kamupani a le Bluesky Communications sui o le Special Olympics i le vaiaso ua te’a e taua'aoina fa'apitoa ia i latou se meaalofa $1,000 e fesoasoani i le fa'amoemoe o le auina atu lea o le auta'a'alo i le Special Olympics i Abu Dhabi, Alapi.

 

Ma sa auai le tama'ita'i Taitaifono o Tafaimamao Tupuola ma le tama'ita'i ta'alo o Sina Falaniko mai le ASCC fa'apea ma Hanipale.

 

I lea fa’atasiga na saunoa ai Sherry Sele, le Customer Service Manager ale Bluesky ia i latou, "Ua matou fiafia e foa'i mo le fa'amoemoe maualuga o nei fo'i alo o le atunu'u. E le gata i lea, ae ua matou va'aia le fiafia tele o outou uma o lo'o aofia i lenei Komiti e tou te galulue fa'atasi ma le fiafia e saili ma le tinou seleni e auina atu ai tatou au ta'a'alo.”

 

Na tali Tupuola e fa'afetaia le foa'i e fesoasoani i le au ta’alo o le a avea ma sui o Amerika Samoa i Abu Dhabi.

 

LEISITALA I LE FEMA MO FESOASOANI A LE FETARALE

 

Ua toe fa'ailoa mai e le susuga Victor Inge o le FEMA, "Afai e te le'i lesitala mo se fesoasoani a le FEMA i mea sa fa'aleagaina ia Gita, o lou avanoa lenei, sau sa'o loa i le FEMA DRC i Pago Pago DYWA.”

 

O le tapunia o galuega ia Me 1, 2018 e fa’agata ai ona talia talosaga i le DRC.

 

Talu mai le aso 23 o Aperila, e tusa ma le $14.2 miliona ua ma’ea fa’amonia e le FEMA mo i latou sa talosaga fesoasoani mo aiga. Mai lea aofaiga, e $9.7 miliona e toe fa'aleleia o fale nofo ae $4.5 miliona mo isi meatotino e aoga i le aiga ae ua fa'aleagaina ia Gita.

 

O le aotelega o i latou ua ma’ea lesitala i le DRC e 7,246.

 

Mai le itu a le US Small Business Administration (SBA) lea sa fa'auluulu ai le tama'ita'i o Yolanda Stokes, ua fa'ailoa ai, ua atoa le $2.3miliona ua mae'a fa'aalu mo Aufaipisinisi, tagata taito'atasi, ma fa’alapotopotoga sa afaina i le ‘afa o Gita. O i latou nei talosaga nonogatupe i lalo o le polokalama a le SBA.

 

FANAU MANUMALO TUSIGA ATA ‘MALOFIE’

 

Ua mae'a taua'aina fa'ailoga fa'apitoa e tolu i fanau a'oga sa tauva i le tusiga ata - ata vali sa fa'aigoaina lea tauvaga o le Malofie Congressional Art Competition, ma sa fa'atautaia fa'atasi e le Ofisa o le Faipule o Amerika Samoa i le Konekeresi ma le Matagaluega o A'oga a le tatou Malo.

 

O i latou ua lautogia:

 

• fa’ailoga muamua, Katie Godinet mai le a'oga maualuga a Samoana. O lana ata fa'aigoaina "O LO'U LAEI SAMOA MONI!"

 

• fa'ailoga lua mo Da In Myung mai le South Pacific Academy i lana ata ua fa'aigoaina, "O la'u Fu'a - La'u Amerika Samoa!"

 

• fa'iloga lona tolu iaTrish Buenavista mai le Fa'asao Marist High i lana ata lea na fa'aulutala, "La'u Aganu'u Fou!"

 

Saunoa le sui o Amerika Samoa i le Konekeresi, Aumua Amata, “O lenei ata o le a avea ma se tasi o ata e fa'atautau lea i le puipui o le alasavali i totonu o le Maota o le Konekeresi, ma o se fiafiaga a'o se fa'amanatu ia te a'u le va'ai pea i lea ata, a'o i ai e fa'atino tiute e tautuaina ai le tatou atunu'u pele ma ona tagatanu'u uma lava. Fa'afetai ma fa'amalo ia i latou uma o alo talavou sa tauva i lenei tauvaga tusi ata fa'aletausaga. E o'o fo'i i isi ata e lua ua mae'a lautogia, o le a i ai le avanoa e fa'atautau ai i lo'u Ofisa i le Konekeresi, ina ia fai ma va'aiga i e gasolo atu i ai mo ni a latou mataupu, ae maise fo'i o tagata lava o si o tatou malo e asiasi atu ia i matou i le laumua i Uosigitone."

 

I lenei tausaga ua tolu nei pa'aga ua galulue fa'atasi mo lea fa'amoemoe, ua fa’aopoopo i ai le Sosaiete o Fa'afafine i Amerika Samoa po'o le SOFIAS.

 

O le lona fa ai lenei o tausaga talu lava ona faia lenei tusiga ata fa'atauva i fanau a'oga maualuluga i le teritori. I lenei tausaga e to'a 28 i latou na fa'aulu a latou ata e fa'atauva.

 

Ua sauni le Hawaiian Air e taua'aoina mai le Pepa Malaga mo lenei sui ua manumalo e malaga atu ai i le malae va'alele e o'o mai i ai faigamalaga a le Southwest Airlines, lea ua tu'u feagaiga na te fa'ao'oina atu le sui i Uosinitone mo le 'aiga tele ma fa'aalia uma ai ata ua manumalo mai setete ma teritori o Amerika.

 

E ese mai fa'ailoga fa'apitoa nei e tolu, ua tofusia uma le fanau na tusia ata ma meaalofa na taua'aoina e le Buesky Communications o latou ato penitala ua mae'a ona fa'atumu i peni eseese. O latou tusi pasi mai le Sui i le Konekeresi. O i latou fo'i na lautogia mai fa'ailoga muamua se'ia o'o i le faailoga 10,  pusa Wahoo, na tofu ma fa'ailoga tupe, o latou meaalofa o pepa e talafua ai oloa mai le Happy World, na taua'aoina mai e le Niel Ace Hardware American Industries.