MANUMALO SAMOANA - AOTELEGA SPEECH FESTIVAL 2018

A'OGA MAUALULUGA 2018:

I lenei tausaga i le fa'aaliga Lauga Fa'aperetania - Speech Festival - a aoga maualuluga i le teritori, ua le auai ai Fagaitua High ma Kanana Fou High, peita'i o nei fo'i a'oga maualuga, e matua iloga ana taumafaiga ma fa'aaliga i faaaliga taleni ma tomai i taimi na tauva ai i tausaga ua te'a.

Ona o le le auai o Fagaitua ma Kanana Fou, ua iloga fo'i la ona sailia avanoa o isi a'oga maualuluga e tauva ai i vaega eseese e fitu na fa'amau mo lenei tausaga. O le 'au'au o le fa'amoemoe i lenei tausaga e fa'aauga i ai taumafaiga uma "O lou Tofi le Lalolagi Atoa!" po'o le "All The World's A Stage!"

O le vaega muamua na fa'atauva ai le fanau i Lauga ta'ito'atasi ae tu'uina mai lava le ulutala e te saunoa i ai, po'o le Impromtu Speech. O lea vaega e le faigofie, aua e tapena lava le sui i le auau e pei ona fa'ailo, ae ua filifilia lava e le vasega o fa'amasino le ulutala e te saunoa i ai, i le taimi e fa'amasinoina ai le sui filifilia.

O le fa'ailoga lona tolu na maua lea e le sui mai le a'oga a Tafuna High, lona lua o le sui tauva mai le a'oga a Leone High, peita'i o le sui na tulaga muamua i lea vaega o le tauvaga, mai Samoana High, le tama'ita'i sa ia mauaina le fa'ailoga a John Kneubhul's Award i le tausaga talu ai, ina ua fa'atolu ona ia mauaina le tulaga togisilia i lea lava vaega o Lauga, Karlinna Sanchez.

O le ulutala o lana tautalaga sa ia tautalagia ai a'afiaga e tele i tulaga o tagata ua tafana solo a'oga i Amerika ma ona a'afiaga i le teritori.

O lenei tama'ita'i ua atoa ai nei le fa o ana fa'ailoga i le Impromtu Speech ma ua atoa lelei i ai tausaga o lona nofo a'oa'oina i le a'oga maualuga a Samoana.

O le vaega lona lua o le tauvaga lea o le Oral Interpretation Literature, ma ua fa'atulagaina e fa'amasino le galuega na fa'atino e sui mai Leone High i le tulaga lona tolu. O le galuega na tapena i ai Tafuna High na tulaga lua, ae o le fa'atinoga fo'i a le sui a'oga mai Samoana na togisilia i lea fo'i vaega, le tama'ita'i o Danielle Taiula.

O le vaega lona tolu Original Script Writing, po'o le tusigatala fatu ma ua tulaga tolu ai le tala na tusia e le sui mai Tafuna High, tulaga lua ai le tala na tusia e le alo mai Leona High ae tulaga muamua fo'i le tala tusia mai le Sui na tauva mai Samoana High.

O le galuega lea sa fa'atino e Jarom Fuimaono, Anthony Feala, Tina Poasa ma Valomanaia Elisarrarz  i le latou tala "Please Belive Me."

O le vaega lona fa o le tauvaga na maimoaina ai Tala Fa'amatala po'o Fagogo fa'amatala i le gagana peretania. Ma ua tulaga tolu Tafuna High, tulaga lua Leone High ae togisilia Samoana High.

O le galuega a le sui mai Samoana na togisilia tutusa ai ma Leone o le galuega lea a Eseta Ta'i Savea i lana tala faamatala o le "The Boy Who Game with a Long Name." [Le Tama na Sau ma Lona Igoa Umi lava].

O le vaega lona lima o le Free Style Poetry - tusiga solo ma ua tulaga tolu ai le solo na tusia e le tamaititi aoga mai Nuuuli VocTech High, tulaga lua le solo tusia mai e le fanau na tutusa lelei togi Samoana High ma South Pacific Academy ae tulaga silia ai le isi fo'i to'alua mai Leone High ma Tafuna High.

I le vaega lona ono o le tauvaga ua taumafai ai ona fa'atino le solo ua filifilia e le tamaititi lava ia. O lea vaega ua fa'ailo o le Poetry Recitation. O le galuega na faatino e le sui mai Tafuna High na tulaga tolu, tulaga lua Leone, ae tulaga muamua Samoana.

I le vaega mulimuli o le tauvaga ua tauva to'atele ai le fanau a'oga i le Contemporary  Recitation ma ua tulaga tolu Samoana High, tulaga lua Leone High ae tulaga muamua Tafuna High i le galuega fa'aulutalaina - "A Rivalry in Letters: Mary & Elizabeth," na tusia e Ryan Hunter.

O le aotelega mo lenei tausaga ua togi silia Samoana e 5 lelei taimi ua maua ai le togisilia i vaega e 7 na tauva ai a'oga, tulaga lua Leone High e fa'alima ona tulaga lua i vaega e 7 na tauva ai, ae fa'atasi ona togisilia ma le tulaga tolu e tasi. Maua lea e Tafuna High le tulaga tolu i le aotelega o mea uma, aua e fa'alua ona togisilia, ae fa'afa ona tulaga tolu ae fa'atasi ona tulaga lua.

O isi aoga sa auai e aofia ai: Iakina Academy, South Pacific Academy, Nuuuli Voc-Tech High ma Manu'a High, ma sa mua'i fa'afetaia lava i latou e le Fa'atonu sili o A'oga, ona e taua tele i lona manatu, lou tula'i e fa'atino lou sao i lenei vaega o ituaiga a'oa'oga e sailia ai fo'i lumana'i o le fanau i matata eseese e agava'a ai.

"O le manumalo i lenei ituaiga tauvaga, e le o le togi ua tu'uina atu e le vasega o fa'amasino ua latou fa'amasinoina ma ua aotelega ai le laugatogi, ae o le manumalo ua taoto lea i lou gafatia ona e tula'i ma fa'atino lou sao e te tauva ai mo lau a'oga. Fa'afetai loto toa, fa'afetai le tauata'i,” o se tala lea a  le Fa'atonu sili o A'oga, Dr Ruth Matagi-Tofiga.

FA'AFUASE'I LE TOE MASAGI I LUGA LE HAWAIIAN AIR - ASO TOFI

E to'atele nisi sa fa'afesiligia le mea na tupu i le malaga mai a le Vaalele Hawaiian Air i le po o le aso Tofi, ona ua fa'alogoina le ese o le tatagi mai a le afi o le va'alele, i le taimi o le a tulaueleele mai ai.

"Ua matua ese lava le fa'alogo atu i le leo o le va'alele, e foliga mai ua fa'afuase'i ona masau ma u'u tetele e foliga mai e pei a pa'u,” o se fa'amatalaga lea na toe fesu'ea'i ai ni fa'amatalaga mautu, pe o le mea sa fa'aletonu le va'alele i le taimi e sese'e i le tatou malae va'alele.

E le'i maua se sui o le Hawaiian Air e fa'amautu ai mai ai se tali o lenei fa'afesili, ae to'atele na faauia mai fesili i le telefoni, ae maise fo'i o feso'ota'iga i le Facebook.

Ina ua maua le tali o lea fesili i le afiafi o le aso Faraile na fa'ailoa mai ai, "E leai, o le lipoti a pailate ua tusia nei, e aga'i mai i lalo le va'alele, ae e le'i kiina moli o le malae sese'e e tatau ona tulaeleele mai i ai. O le afuaga lea na toe mage'e ese atu ai, ae se'i faia le galuega a le pulega o le Malae Sese'e a le tatou Malae va'alele i Tafuna."

I le vasega fo'i o pasese sa malaga mai, ua fa'ailoa mai na matua tumu lelei fo'i aumalaga, ae na fa'ailoa mai e se tasi o le pasese, "O ita fo'i ua fiafia o le a sese'e mai le va'a ua leva ona tulituli mai le o'o i laufanua o le tatou atunu'u, ae fa'afuase'i lava le va'aia ma le fa'alogoina fo'i, ua toe masagi aga'i i luga le va'a, e leai se fa'aaliga na faia mai pe aisea, ae na'o na toe va'aia lava ua toe masagi i luga toe ta'amilo mai, fa'ato'a va'aia loa le ola mai o moli o le malae sese'e e tatau ona matou fa'aaogaina."