Ads by Google Ads by Google

SAVE: E na o le leoleo e i ai malosi fa’asala ai ave ta’avale luga auala

 Le Komesina o Leoleo ia Save Liuato Tuitele, ma le Fa’atonusili o le Ofisa e Puipuia aia tatau o tagata e i ai manaoga fa’apitoa o le tino ia Dr. Peter Tinitali  [ata AF]
ausage@samoanews.com

A o galulue ai le Fono Faitulafono mo le fa’amautuina o sa latou fa’aiuga, e fa’atatau i le tulafono taufa’aofi lea sa talosagaina e le faigamalo, e tu’u atu ai le malosi i Leoleo o le malo faapea ai sui o le Ofisa e Puipuia Aia tatau o i latou e i ai manaoga fa’apitoa o le tino (OPAD), latou te fa’asalaina ai ave ta’avale o ta’avale e maua o lo o paka i vaega fa’apitoa e paka ai na o i latou e i ai manaoga fa’apitoa o le tino, na fa’amanino ai e le Komesina o Leoleo i luma o le maota o sui i le taeao ananafi e fa’apea, e na o Leoleo lava o le malo ua mae’a ona fa’atauto o lo o i ai le malo i lalo o le tulafono latou te fa’asalaina ai se ave ta’avale e maua o lo o ia soli le tulafono.

 

Na taua e le faigamalo a Lolo ma Lemanu e fa’apea, o le mafua’aga ua ala ai ona latou talosagaina le Fono Faitulafono ina ia pasia suiga fou i le tulafono tuai o lo o i ai, e le gata ia fa’a faigofie ai ona fa’amalosia le tulafono, ae mafai ai fo’i ona fesoasoani le ofisa o le OPAD i le Ofisa o Leoleo mo le fa’amalosia o lenei tulafono.

 

O lo o taua fo’i i le tulafono fou lenei e fa’apea, afai e le maua e le Leoleo poo o le sui o le OPAD le ave ta’avale sa ia fa’afoeina le ta’avale e maua o lo o paka sese, e mafai ona tu’u le kopi o le ticket i luma o le ta’avale, po o le saili fo’i le tagata o lo o lesitala ai le ta’avale e fa’asala ona o lana ta’avale lea ua maua o lo o paka sese.

 

O molimau na fesiligia e le Komiti o le Puipuiga o le Saogalemu Lautele a le maota o sui e aofia ai le Komesina o Leoleo ia Save Liuato Tuitele, Fa’atonusili o le Ofisa o le OPAD ia Dr. Peter Tinitali, ma le Loia Sili a le malo ia Talauega Eleasalo Ale.

 

Saunoa Save e fa’apea, e le tete’e o ia i le agaga o le tulafono, pau lona popolega o lo o i ai, ina nei alu atu le tagata faigaluega o le OPAD ma le ticket lea ua ia fa’asalaina ai le ave ta’avale ae teena mai e le fa’amasinoga, ona o le fa’amasinoga o lo o i ai le malosi latou te fa’atonutonuina ai le taulimaina o ituaiga api tusitala (ticket book) o lo o fa’aaoga e Leoleo e fa’asala ai ave ta’avale i luga o le alatele.

 

E le gata i lea, afai e pasia le tulafono ma tu’u atu ai le malosi i sui o le Ofisa o le OPAD latou te fa’asalaina ai tagata, e mana’omia fo’i le faia o ni aoaoga (training) e a’oa’o ai tagata faigaluega i auala e tusi ai le ticket, e le o se galuega faigofie le fa’aaogaina o ituaiga api sala o le “UTC” o lo o fa’aaoga e Leoleo e tusi ai le ticket i le ave ta’avale, lona uiga e mana’omia le 2 tausaga e tau a’oa’o ai le tagata i le auala e tusi ai le ticket.

 

Na pau le fautuaga a Save, afai e pasia le tulafono, e tatau la ona i ai se isi ituaiga api sala e fa’aaoga e le Ofisa o le OPAD, e ese mai i ituaiga api sala o le “UTC” o lo o fa’aaoga e Leoleo e fa’asala ai ave ta’avale i luga o le alatele, ona o api sala ia, e na o Leoleo lava ua fa’auu e fa’ataga e le fa’amasinoga ona latou tu’uina atu ticket i ave ta’avale.

 

Na taua e le sui fofoga fetalai ia Fetu Fetui Jr e fa’apea, e na o Leoleo lava o le malo e i ai le malosi latou te fa’asalaina ai ave ta’avale i luga o le alatele, e leai lava ma se isi tagata.

 

Ae na saunoa le afioga i le tama’ita’i faipule ia Vui Florence Saulo e fa’apea, e leai se mafua’aga e fa’asala ai fua le tagata o lo o lesitala ai le ta’avale, pe afai e le maua le ave ta’avale sa ia fa’afoeina le ta’avale na maua o lo o paka sese.

 

Ae na fa’amanino e le Loia Sili e fa’apea, o le agaga o le tulafono, ia mafai ona fesoasoani sui o le Ofisa o le OPAD i Leoleo o le malo i le fa’amalosiina o le tulafono, ona e le o lava Leoleo e fa’atinoina le galuega i le taimi nei.

 

I le fa’aiuga o le iloiloga, na faia ai loa le fa’aiuga a le komiti, e sili pe a toe taoto lenei mataupu se’i toe iloiloina i se taimi o i luma.