Ads by Google Ads by Google

Onosa’i I Mea Tiga

Vaega: 66

 

Alo maia, o le a toe fa’aauau atu la tatou tala mo lenei aso, ae ia manuia lou alo atu i faiva ma tiute o le a feagai ai ma oe i lenei aso. Na muta mai la tatou tala, ina ua maua nei le avanoa e talatalanoa ai ma fetufa’ai ai Mose ma lona atali’i o Lilo. Ae manatua fo’i, o lea ua uma ona fai le tala a ona matua, ua tatau loa ona fai se feiloa’iga ma matua o Loleta e tusa ai ma le mana’oga ua ta’oto nei i malae.

 

E le i uma ane tala a le toeaina o Mose, ae ona va’aia le tafe ifo o loimata o si ona atali’i i lea taimi. Fai mai, na a’apa ane nei le toeaina ma soloi loimata o Lilo. “Lilo, ou te iloa lava o lo’o i ai le mea o lo’o mamafai i lou loto ma lou mafaufau, o le ala fo’i lea o lo’u mana’o ia ta talatalanoa lava na o ta’ua, ae sau se taimi ona o tatou feiloa’i lea ma lou tina, ae ia e tautala sa’o mai lava ia te a’u, po’o fea o i ai lou loto i nei mea uma.”

 

“Lo’u tama Mose, e muamua lava ona ou fa’ato’ese atu ia te oulua, ona o le tele o nei mea ua tutupu mai, e uiga ia te a’u ma si o’u mana’oga na ou tautala atu ai, ua avea lava nei mea ma ala ua fememea’i ai lo’u mafaufau.

 

“Ae ou te fa’afetai atu tama, ona o lou loto malamalama i mea uma, e moni lava oe, ua avea lava lenei mea ma se avega mamafa i lo’u loto ma lo’u mafaufau, ae ui i lea, a tonu e i ai se taimi e manino ai mea uma i la oulua silasila mai ia te a’u, “O a’u, sa ou mautinoa lava, o le a faigofie mea uma, a’o lea ua tula’i mai ai mea faigata, ua lagona  ai le mafatia o lo’u loto ma lo’u mafaufau e uiga ia Loleta, ae afai lava o tulaga ia e o’o i ai, ua ou malie lava, e tu’u loa, ‘aua ne i toe faia i ai se isi fuafuaga, Ae pau o lea, ua uma ona ou o’o i le aiga, ae ana ou iloa e tula’i mai ni mea fa’apenei, ou te le alu, ae ou te fa’afetai tele atu tama, fa’apea fo’i i si o’u tina, ona ua oulua le va’ai lava i nisi itu, ae ua ou talitonu, o lo oulua alolofa ia te a’u, ua mafua ai mea uma.

 

Ua le tautala le toeaina o Mose i lea taimi, ae ua na o le tilotilo ane i si ona atali’i e to’atasi e pele i lona loto ma lona mafaufau.

 

Fai mai le tala, o Lilo, ua uma ona fa’asuafa e le tama o Mose, e avea ma Sa’o o lo latou aiga, a’o le taimi lea ua na o le iva tausaga o Lilo. Fai mai le tala, na iloa lava e le toeaina o Lopati Lilomaiava, uiga tausa’afia o le atali’i o lona atali’i, o lea na naunau ai lava le toeaina ae e le i maliu, ina ia fa’asuafa Elia, ia Lilomaiava.

 

O le igoa muamua lea o le tama, o Elia, a’o lona igoa matai, o lea ua fa’apu’upu’u ia Lilo. Ua amata ona tau i’ite le tama i lona igoa, ae e le i ta’uina lava i ai e ona matua. O le tala a le toeaina o Mose, se iloa lava e la’ua, ua tatau ma ua onomea ona ta’u ia Lilo, ona fai lea. Pau le igoa o lo’o iloa e le tama, o Lilo, a’o ona tua atu, e le o malamala le tama i le taua o lona igoa.

 

“Lilo, ua lelei, afai o le tulaga lea ua i ai lou loto, o le fa’aiuga ua ma faia ma lou tina, o le a ma savali e talatalanoa ma matua o Loleta, o se mea ua ma’ua malilie fa’atasi i ai ma lou tina, “O a lava nisi mea i tua atu, ta’atia uma, se i sau se taimi, ae ua tatau ona fai loa sa matou feiloa’iga ma matua o Loleta, ona iloa ai lea o le mea o lo’o tupu, ma e fa’amama avega ai fo’i ia ma’ua ia tulaga uma, ae ‘aua e te tagi, ae ia e talia mea uma, pe afai lava o le a le fa’ai’uga o le a o’o i ai la matou talanoaga ma matua o Loleta.”

 

Ua fa’apea lava ona fai, ua o nei Mose, Malia, Lefefe ma Lilo i le fale o matua o Loleta mo le talanoaga e tusa ai ma le mana’oga o matua o Loleta, ia fai vave loa le fa’aipoipoga a Loleta ma Lilo.

 

E faia pea...