Ads by Google Ads by Google

Lauli’i Elementary “Taofi le Pito Maea” Asiasiga i le TAOA


O se vaaiga i le tama’ita’i o Tina o le TAOA o lo’o ia fa’amatala i le fanau a’oga Lauli’i Elementary ituaiga oloa eseese ua gaosia e tama ma tina matutua ina ia fa’atau atu i le mamalu lautele o le atunu’u. [ata: Leua Aiono Frost]

O le taeao ananafi sa asiasi ai le Vasega 8 a Laulii Elementary i le Ofisa Autu o Tagata Matutua i Pago Pago, ina ia latou toe tepa tasi i le sosia o agaifanua a Samoa ua toe fafagu mai e le vaega o tagata matutua i le TAOA.

 

E to’a 21 le fanau, fa’apea ma faiaoga i lenei asiasiga.

 

Ina ua fesiligia le ali’i faia’oga, Eekielu Foleni, i se mafuaga o le asiasiga, sa ia fa’ailoa mai, “O le matou mataupu taua ua oo nei i ai le a’oa’oga, o lou tala’aga, agaifanua ma lou tupuaga. O lea ua manatu, o le va’ai o fanau i matua matutua, o se mea taua, e toe fa’atepa ai i latou i le sosia o le aganu’u o lo’o teulilo ia i latou, ma o nei mea uma, lea ua toe taumafai lenei matagaluega, e toe fa’aa’e mai, ia toe fa’ailoa atu la ‘oa taua i fanau lalovaoa o le atunu’u, a’o le’i tu’ua le mafutaga, pe ua le toe gafatia fo’i e i latou ona gaoioi e fa’atino galuega alofilima nei.”

 

I le va’ai i le fa’asoa atu e tama ma tina matutua i le fanau talavou i lea asiasiga, o se mea sili ona taua lea ua va’aia ma fa’amauina. Sa va’aia le fa’aaloalo o le fanau, i le latou tautala ma le tu’ufesili, ua va’aia ai le fefa’asoa’i o latou taofi, ma le agaga fia iloa ona faia o galuega alofilima sa fa’atino e matua matutua a’o maimoa i latou.

 

I se tala a le ali’i o Jayden, se tasi o ali’i talavou o le vasega, “O se mea fiafia ia te a’u lo’u vasaia o le gaosiga e tina ma tama matutua o nei galuega taulima, e mafai fo’i ona ta alu e fa’ata’ita’i, ma aoga ai le tele o mea ua matele ina tia’i solo e pei oni lapisi ia i tatou uma lava. O atigifagu palasitika lea e inu ai vai, ua matua matagofie lava teu fugala’au lea ua mae’a gaosia ai.”

 

Ua vaaia le fiafia o tama’ita’i talavou e fa’ata’ita’i ona lalaga le fala, ae o ietoga fo’i aua e nini’i lava le tosiga o le laufala o ietoga e fetaui lava ma o latou tamatama’ilima. Peita’i, e tasi lava le tala a nisi o i latou, “E matua faigata lava toe umi o lalaga se ietoga! Ai lava se taugata.”

 

I le faiga o le elei ma le valiga fo’i o nei elei, na maimoa lelei i ai le fanau. Ua fesili i latou i le mamafa o le vaitusi po’o le vali e ao ina fa’asoa i le ie atoa. Ua tele ina maofa i latou i le tomai o tina matutua, e fa’asoasoa si vaitusi la’ititi ina ia le so’ona papanu le ie, ma vave fo’i ona uma le vaitusi, ae le’i lava ie ua mae’a valia ai, ina ia lava fo’i se tupe e maua mai le fagu vali e tasi.

 

“O le tele o ie e valia i le fagu vali e tasi, o le tele fo’i lena o le tupe e toe fa’atau ai le isi ie ma le fagu vali ma fa’atau ai le mea’i a le aiga atoa, ae maise le tele o mea e fai a le lotu ma le aiga,” o le tala ata lea a le tama o Devin lea sa matua matagofie lana ula na fa’atau i le faleoloa o oloa gaosi e tina ma tama matutua o le TAOA.

 

O le itu o ta fa’atagata, sa maimoaina e le fanau le taina o Upeti Samoa o mamanu mo elei Samoa, ma ua avea lea ma mamanu o le tele o ie lavalava, ie fai puletasi ua fa’atautauina i le latou faleoloa mo le fa’atau atu. Na faia fo’i fa’atauga a le fanau, na manana’o i latou ina ia tofu i latou ma ni mea e fa’amanatu ai le latou asiasiga taua lenei.

 

“O a’u lea ou te iloa, afai ae le maua se galuega, o lea lava le isi avanoa ua iloa atu e maua ai le tupe, o le ta fa’atagata, ta upeti, lalaga uma nei mea, ia saili ai le tupe mo le aiga,” o se tala lea a le tama’ita’i o Martha.

 

Ina ua va’ai le fanau i tau o oloa o fa’atau atu i le lautele, sa fai mai le tala a le ali’i o Jayden, “Sole matua taugofie lava oloa, ae umi le taimi o ta, pe lalaga fo’i, e le tutusa le umi ona fai ma le tau ua avatu ai nei oloa mo tama ma tina matutua.”

 

Peita’i, na tali le susuga Kuresa Puaopea, “O tau nei, e le o taumafai ia matua maua mai tupe, ae o le agaga tonu, ia fa’aosofia outou ina ia outou o atu, ma fiafia e fafau nei mea taulima ua outou va’ai ma fa’ata’ita’i ona fai i tua i tou aiga, ina ia le mou atu mai lo outou iloa, e mafai al i mea o maua i lo tatou siomaga ona tatou ola ai, ma fa’aaoga ma toe fa’atau atu, ia maua mai ai se tupe, e fai ai nisi mea o le fatuaiga.”

 

Na fa’aauau lana tima’iga ma fa’apea atu, “Ia outou ola sogasoga i mea taulima Samoa nei, e ono tua i ai pe a oo mai taimi ua le tagolima ai matua i ni mea e fa’aaoga mo tatou aiga, ae o mafaia e outou ona fa’amama avega i matua, gaosia salu lima mai tuaniu e fa’aaoga.”

 

I le agaifanua o fa’afiafiaga, sa pepese le fanau i fatuga Samoa moni ma ta ai kitara a le fa’aili a le TAOA, ma ua matagofie fo’i pesega i le sausaunoa ai le vasega ma faia’oga, fa’apea le pulega a le TAOA.

 

Ua faailoa mai e le tama’ita’i Fa’atonu Evelyn Lili’o-Satele, e talia so’o se a’oga e fia asia le latou nofoaga, ina ia fetufai ma tama ma tina matutua e ala i tomai o lo’o fa’aoaina ai i latou mai tausaga e tele na soifua ma galulue ai mo le atunu’u ma atia’e o latou aiga.