Ads by Google Ads by Google

E LE O OE O SE SULI MONI

Vaega 73

 

E le o se vaiaso filemu le vaiaso atoa lea i le mafaufau o le tamaloa o Meki, talu ona mae’a mai le la talanoaga ma le ali’i foma’i meauli lea na sulu atu i lona Ofisa mo se fesoasoani. O le itu o loo mamafa i le mafaufau o Meki, e foliga mai i lana fa’alogologo o loo tau saili e le ali’i foma’i lea lona tuafafine e pei ona fa’amatala i ai e le Toeaina o Pulusi, ma ua tau vavala mai fo’i i le mafaufau o le tamaloa, o loo naunau lava le ali’i foma’i na te sailia lona tuafafine ina ia maua. O le ripoti muamua lava na tu’uina atu e le vaega o Leoleonana i le Ofisa o le latou Ta’ita’i o Meki na manino mai ai, o se vailaau oona na a’afia ai le tino o le fafine meauli lea na ia fanauina le teineititi pologa o Ianeta, na mafua ai ona maliu o ia ina ua tuana’i aso e 2 talu ona fanau lana pepe, e leai fo’i se su’esu’ega sa faia e uiga i le mafua’aga o lona maliu, ona sa talosagaina e le tamaloa o Pulusi lea sa avea ma Faipule o le itumalo i lea taimi ina ia taofi le faia o se su’esu’ega fa’asaga i le mafua’aga o le maliu o le fafine meauli lea, ona o ia o se tagata pologa, e le ma’imauina fo’i tupe a le malo e fa’aalu e su’esu’eina ai mataupu e a’afia ai ola o tagata pologa i totonu o le malo. O le taulimaina ai e Meki o le ulua’i ripoti mai lana vaega fa’apitoa e uiga i le fafine pologa meauli lea na ia fanauina le pepe teine ae maliu loa, na manatu ai loa Meki o le a amata i le maliu o le fafine la latou su’esu’ega, se’i tau saili le mafua’aga tonu na ala ai ona maliu le fafine, ae pe sa i ai fo’i se ripoti na tusia e le falema’i e tusa ai o lona maliu.

 

O le falema’i lea o lo o galue ai le ali’i foma’i meauli lea sa sulu ia Meki mo se fesoasoani, o le falema’i tonu lena o loo taua i le ripoti na maliu ai le fafine meauli lea o loo autu i ai le ulua’i su’esu’ega ua amataina nei. O se tasi o taeao pisi lava i totonu o le falema’i tele lenei i totonu o le taulaga, ao pisi fo’i le ali’i foma’i meauli i le tau togafitiina o tagata ua lolofi atu ina ua pesi se tasi o fa’ama’i oti tele lava i totonu o le atunu’u, na ulufale ai loa sui e to’alua o le vaega o Leoleonana a Meki i totonu o le falema’i, ma fesili mo le Pule o le falema’i mo se feiloaiga, ae i le mae’a ai o le feiloaiga ma le Pule o le falema’i, na manino ai i sui e to’alua o le vaega a Meki, o le ali’i foma’i e igoa ia Lavi, o ia lea o le fom’ai sili i totonu o le falema’i, o se ali’i fo’i ua fa’atuatuaina i lona tomai atoa ai ma le poto o fa’aiuga na te faia ina ia fa’asao mai ai ola o tagata mama’i. Na fa’ateia le ali’i foma’i o Lavi ao pisi i le togafitiina o se tasi o ma’i tigaina ina ua eu eu atu e se teine tausima’i lona tauau ma musumusu atu i ai, “O loo i ai ni ali’i Leoleonana se to’alua o loo fia feiloa’i mai ia te ia”, ae sa toe tali atu i ai le ali’i foma’i o Lavi i le teine tausima’i, “Fa’ailoa atu i ali’i Leoleonana, fa’atoa ou avanoa i le isi itula ona o loo tau fa’amae’a togafitiga mo la’u ma’i tigaina o loo tau togafiti”. O se feiloaiga fiafia na maua e ali’i Leoleonana ma le ali’i foma’i sili ina ua mae’a le pisi o galuega o lea aso, ma fofola ai loa e ali’i su’esu’e le autu o le la savali, o le fia maua lea o ripoti e fa’atatau i se fafine meauli na fanau ma maliu ai lava i totonu o le falema’i lea i le 25 tausaga talu ai, ona o le ripoti lena o loo fia maua e fai ma au ivi o le su’esu’ega tele o loo latou galulue ai. “Tu’u mai ni nai aso e 2 se’i o’u galue ai e tau saili mai fa’amaumauga o loo oulua tau sailia nei, ona tatou toe feiloa’i ai lea i le taimi fa’apenei i lo’u ofisa, ma fofola atu ai ni isi o vaega e mafai ona fesoasoani i la oulua su’esu’ega. E te’a lava le 11 i le po o le aso lea o loo i ai pea le ali’i foma’i o Lavi i lona ofisa, o lo o tau tu’u fa’atasi uma fa’amaumauga o lo o mana’omia e ali’i Leoleonana, e le gata i ripoti ae o ata sa mafai ona maua i totonu o faila a le falema’i, sa ia tu’u fa’atasia uma ma le fa’amoemoe e tu’uina atu i ali’i Leoleonana, ae o totonu o se tasi o faila, na maua ai e le ali’i foma’i isi ata o le fafine meauli o loo autu i ai le su’esu’ega, o se ata o se tamaititi pe a ma le 10 tausaga o loo tu i ona tafatafa, ae o le taimi lea o loo mamafa le fafine meauli o lona ma’itaga.