Ads by Google Ads by Google

Atugalu fa’amasinoga auala taofia faapagota ai Leoleo tagatanu’u toese

ausage@samoanews.com

I le fa’aiuga o le mataupu fa’aumiumi sa fa’agasolo mai i luma o le Fa’amasinoga Faaitumalo talu mai le masina o Novema o le tausaga na te’a nei, fa’asaga i ni tagatanu’u se to’alua na taofia e Leoleo i le toese ona o solitulafono tau ta’avale afi, na fa’aleo ai e le afioga i le ali’i Fa’amasino ia Fiti Sunia atugaluga o le Fa’amasinoga e fa’atatau i lenei mataupu.

 

O le mataupu e fa’atatau i le fa’amasinoga o Dorah Sua, lea na taofia fa’apagota e se ali’i Leoleo mo le umi e 2 po i le toese i Tafuna, ina ua leai se pepa fa’amaonia e mafai ai ona fa’amaonia e lea tama’ita’i o ia i Leoleo, ina ua taofi a Leoleo lana ta’avale i le fa’aletonu o le moli i le po.

 

Ina ua le mafai e Sua ona tuuina atu sona pepa fa’amaonia i le Leoleo, sa faia ai loa le faaiuga e taofia o ia i le toese i le faaiuga o le vaiaso i se taimi o le masina o Setema o le tausaga na te’a nei, na tula’i ai o ia i luma o le fa’amasinoga.

 

Saunoa Sunia e fa’apea, e ese mai ia Sua, sa i ai fo’i le isi tagatanu’u na taofia faapagota e Leoleo i le toese i Tafuna, ina ua musu lea ali’i e saini lana pepa sala sa tuuina atu e le Leoleo.

 

Na faamanino e Sunia le i ai o le malosi i le Leoleo na te tuuina atu ai se tagatanu’u i le falepuipui, pe afai na te le usitaia le tulafono. Ae mo le mataupu e fa’asaga ia Sua ma le isi tagatanu’u na aafia fo’i i lea lava mataupu, le susuga Silafau Sioeli, na saunoa ai Sunia i le tatau lea i le Leoleo ona ia fa’atinoina se isi galuega faaopoopo e fesoasoani ai i le tau sailia o fa’amaumauga o loo latou mana’omia.

 

Mo se fa’ata’ita’iga e pei ona saunoa Sunia, o lea sa naunau le Leoleo na te fia maua ni pepa faamaonia e faamaonia ai i laua sa taofia. Ae i le silasila a le Fa’amasinoga, sa tatau i le Leoleo ona ia faatinoina se isi galuega faaopoopo e mafai ai ona sailia mai pepa faamaonia mai isi ofisa o le malo e fesoasoani ai i le faamaoniaina o Sua ma Sioeli.

 

O ia pepa faamaonia e aofia ai le faafesootai le Ofisa o Palota, aua o loo ia tei latou faamaumauga mo tagata palota e i ai Sua.

 

Ae mo Sioeli, o ia o se tagata mai fafo ua uma ona lesitala faaletulafono, sa tatau i le Leoleo ona faafesootai le Ofisa o Femalagaaiga, o iina e maua uma ai fa’amatalaga e fa’atatau i tagata mai fafo.

 

Saunoa Sunia e fa’apea, e i ai le malosi i le Leoleo na te fa’atinoina ai ona tiute i lalo o le Tulafono, ae tatau fo’i ona silasila toto’a i aia tatau o tagatanu’u o loo a’afia ona o le auala o lo o fa’atinoina e Leoleo e fa’amalosi ai le tulafono.

 

O se tasi o itu na taua e Sunia, talu ona alia’e mai taualumaga o le mataupu fa’asaga ia Sua, e lei toe i ai lava se tagatanu’u na taofia e Leoleo i le Falepuipui e mafua mai ona o lona le usitaia o solitulafono mama i luga o le alatele.

 

Ona o le naunau o le Fa’amasinoga e fia malamalama pe i ai ni tulafono ma ta’iala a le Ofisa o Leoleo e faafoe ai galuega a Leoleo i aso faisoo, na mafua ai loa ona valaauina le  afioga i le Komesina o Leoleo, tofa Le’i Sonny Thompson mo le fa’amaninoina o lea tulaga.

 

Ae i le mae’a ai ona iloiloina e le Fa’amasinoga o fa’amaumauga mai le Ofisa o Leoleo e tusa ai o ta’iala ma tulafono o lo o fa’atautaia ai galuega, na saunoa ai le Fa’amasino e fa’apea, e foliga mai e le o i ai ni ta’iala fa’ataoto e lima ta’ita’iina ai galuega fa’atino a Leoleo.

 

O le faaiuga la a le fa’amasinoga e uiga i lenei mataupu, afai ae toe tula’i mai se isi mataupu faapenei i le lumana’i, o le taofia lea o se tagatanu’u i le toese ona o loa le usitaiina o tulafono mama i luga o le alatele, o le a aami e le Fa’amsainoga le Leoleo sa ia faatinoina le faaiuga e fesiligia i le mafua’aga o lana fa’aiuga.