Ads by Google Ads by Google

Aloaia le lisi mo sui tauva uma o le palota

[ata: foa'i]
ausage@samoanews.com

O le afiafi o le aso Tofi o le vaiaso na te’a nei na tu’uina aloaia mai ai loa e le Komesina o le Ofisa o Palota a le atunu’u, afioga Uiagalelei Dr. Lealofi le lisi mo sui tauva uma o le palota tele a le atunu’u lenei tausaga, ua aloaia ma fa’amaonia lo latou sauni atu mo sailiga tofi a le atunu’u i le aso 8 Novema 2016.

 

I le tuana’i ai o le taimi o lo o fa’atulafonoina e tatau ona faila ai e tagata lesitala uma mo le palota, sa latou fa’atuiese fa’asaga i soo se tasi ua fa’auluina lona suafa e fia tauva i tofi a le atunu’u, na sainia ai loa e le afioga a Uiagalelei le lisi o sui tauva uma ua aloaia le sauni atu mo le palota, ina ua leai se tagata palota na fa’aulu sana fa’atuiese fa’asaga i sui tauva uma o le palota.

 

O le lisi e pei ona tu’uina mai e le Ofisa o Palota i le vaiaso na te’a nei, ua aloaia ai le afioga i le Fofoga Fetalai o le maota o sui, le tofa i le Tau Tootoo ia Savali Talavou Ale, ua leai se isi na te lu’iina o ia mo le nofoa o le itumalo.

 

E pei ona taua i le ulua’i lisi sa tu’uina mai, e to’a 3 paga ua sauni nei e tauva mo le sailiina o se ta’ita’i mo le faigamalo i le isi 4 tausaga o lo o lumana’i nei, to’a 5 ua sauni e tausini mo le tofi Faipule i Uosigitone, ma le to’a 62 o le a tausinio mo nofoa e 20 i le maota o sui.

 

O le nofoa e atoa i ai nofoa e 21 i totonu o le maota o sui i le Fono Faitulafono, o le nofoa lea mo le itumalo o Swains, lea ua fa’amoemoe e filifilia sa latou sui faipule e nofoia le nofoa o le itumalo mo le isi 2 tausaga, i se fonotaga fa’apitoa e saili mai ai so latou sui.

 

Mo le tofi Kovana ma le Lutena Kovana, ua tula’i mai ai le paga a Tuika Tuika ma Salanoa Iuni Maeva Saveena, lea o le a tausinio fa’atasi ma le paga a Faoa Aitofele Sunia ma Larry Sanitoa, fa’apea ai le paga a Lolo Matalasi Moliga ma Lemanu Peletie Sialega Mauga, mo le sailia o ni ta’ita’i o le faigamalo mo le isi 4 tausaga o lo o lumana’i nei.

 

Mo le tofi faipule i le laumua i Uosigitone, e tasi le sui tauva fou lea fa’atoa fa’alauiloa aloaia lona suafa ina ua tu’uina mai le lisi a le Ofisa o Palota, o le susuga lea ia Timothy Jones, lea fo’i sa tausinio i le palota na se’i mavae atu nei.

 

O isi sui tauva e aofia ai Vaitinasa Salu Finau Hunkin, Meleagi Suitonu Chapman, Paepaetele Mapu Jamias, ma le afioga i le Faipule Tama’ita’i o lo o ia nofoia le nofoa o le atunu’u i le taimi nei, le tofa ia Aumua Amata.

 

Mo le maota o sui i le Fono Faitulafono a le atunu’u, ua fa’ailoa i le lisi a le Ofisa o Palota le toe tausinio uma o afioga i Faipule o lo o nofoia nofoa a latou itumalo, se’i vagana ai lava le afioga i le isi faipule mai le itumalo o Tuala-uta, susuga Larry Sanitoa lea ua le lesitalaina lona suafa mo le tausinioga a le maota mo lenei tausaga, ona o lea ua mae’a ona lesitala lona suafa i le la paga ma le afioga i le Ali’i Fa’alagia ia Faoa, mo le tofi kovana ma le lutena kovana o le malo.