Ads by Google Ads by Google

To’a 2 faiaoga mai Samoa ua le toe fa’afouina konekarate

Fa’atonusili le tumau o le Matagaluega o Aoga a le malo susuga Philo Jennings.  [ata AF]
ausage@samoanews.com

I le tele ai o tala ua salalau solo i le fa’aiuga ua faia i konekarate a faiaoga mai Samoa e to’a 10 ina ia le toe fa’afouina a latou konekarate, o le aso Faraile na te’a nei na fa’amaonia ai e le Fa’atonusili le tumau o le Matagaluega o Aoga i luma o le Fono Faitulafono, e na o le to’a 2 faiaoga o le a le toe fa’afouina a laua konekarate, ae o le isi to’a 8 ua mae’a ona toe fa’afou a latou konekarate, ma o le a fa’aauau pea ona galulue mo aoga maualuluga i Amerika Samoa.

 

O le iloiloga o le paketi a le Ofisa o Aoga i le vaiaso na te’a nei, na fesiligia ai e ni faipule se to’atolu le mataupu e fa’atatau i le le toe fa’afouina lea o konekarate a faiaoga mai Samoa.

 

O le afioga i le ali’i faipule ia Vaeaitu Mulinu’u Filo Maluia na ia fesiligiaina le fa’atonusil le tumau e uiga i konekarate a faiaoga mai Samoa, pe aisea ua fa’afuase’i ai ona fa’amuta e aunoa ma le logoina o i latou e fa’atatau i le fa’aiuga, ae na saunoa Jenning e fa’apea, “e sa’o sa i ai le fa’aiuga e fa’amuta ai le toe fa’afouina o konekarate a faiaoga mai Samoa, peita’i o lea ua toe suia lea fa’aiuga”.

 

Saunoa atili Vaeaitu e fa’apea, e le tatau ona faia fa’apea faiaoga mai Samoa, o le fa’afuase’i lea ona fa’amuta a latou konekarate i se taimi fa’afuase’i.

 

“E tatau ona silafia lelei e le malo, e le te’i te’i oo mai faiaoga mai Samoa iinei, na mafua ona oo mai ona o tatou na malaga i Samoa e saili mai ai se fesoasoani mo a tatou fanau, o lea fo’i ua fai i ai le folafolaga a Tuilaepa [Sa’ilele Malielegaoi], e le toe taliaina se tasi o i latou nei e galue i le malo pe a toe fo’i atu i Samoa, o le mafua’aga lena ou te fautuaina ai le Ofisa o Aoga, fai fa’alelei nai faiaoga mai Samoa”, o le fautuaga lea a Vaeaitu.

 

Na tuli tatao e le afioga i le tama’ita’i faipule ia Vui Florence Saulo ia le saunoaga a Jennings, ma ia fesiligia ai le aofa’i o faiaoga ua toe fa’afou konekarate, ae na toe saunoa le susuga a Jennings e fa’apea, “e to’a 8 faiaoga lea ua toe fa’afou a latou konekarate, se’i vagana ai le isi to’alua e le o toe fa’afouina a laua konekarate”.

 

Na fa’amanino atili e Jennings i luma o le Komiti So’ofa’atasi o le Paketi a le Fono Faitulafono e fa’apea, e ui sa ave le tusi a le Fa’atonusili o le Ofisa o Tagata Faigaluega a le malo i faiaoga mai Samoa, e fa’ailoa i ai le fa’amutaina o a latou konekarate, peita’i o le fa’aiuga mulimuli e faia lea e le Ofisa o Aoga.

 

“O le Ofisa o Aoga o lo o i ai le aia e filifili ai, pe toe fa’afou konekarate a i latou nei pe leai fo’i, ae ina ua mae’a ona matou iloiloina ripoti e fa’atatau i le galulue a faiaoga uma nei, na tu’uina mai ai loa ma le fautuaga ina ia toe fa’afou konekarate a faiaoga e to’a 8 ae o le isi to’alua e le toe fa’afouina, e mafua mai i le le lelei o le fa’atinoina o le la galuega”, o le saunoaga lea a Jennings.

 

Na fesili le afioga i le ali’i faipule ia Meauta Lauoi Mageo ia Jennings i totogi o faiaoga mai Samoa, ae po o ausia fo’i e i latou togi o suega e agava’a ai faiaoga i tusi pasi fa’apitoa, ae na saunoa Jennings e fa’apea, o ni isi o faiaoga mai Samoa ua mae’a ona latou tauaveina le suega e pei ona fesiligia ma ua pasia, ae o isi e lei pasia i latou.

 

I le tulaga o totogi, o lo o totogi uma fo’i faiaoga mai Samoa i totogi o lo o agava’a ai faiaoga a Amerika Samoa ua maua fa’ailoga maualuluga e pei o le BA ma le MA.