Pago Pago - AMERIKA SAMOA

I se talosaga mai i le kamupani a le Paramount Builders Inc., lea o lo’o gafa ma le galuega i le Fale Fono fou, ua toe tolopoina ai le aso fa’atulagaina e fa’amutaina ai lenei galuega, ia Iulai 30, 2025, talu ai ona o le le totogia o le galuega.

E tusa ia ma se kopi o se tusi ua taulimaina e le Samoa News, lea na tusia i le aso 14 o Fepuari, 2025, o lo’o ta’ua ai le silia ma le 40 aso faakalenaina talu ona fa’aulufaleina mai se pili a le Paramount mo le galuega, ae e le’i totogia lava.

Ma sa ta’ua ai foi i totonu o le tusi ia se vaega o le tulafono, lea o lo’o ta’ua ai le mafai i le kamupani ona taofia le galuega pe afai e atoa le 7 aso talu ona le totogia o le galuega.

Sa ofoina mai e le Paramount, le le taofia o le galuega, pe afai ae toe tolopo le aso fa’atulagaina mo le fa’amae’aina o le galuega, ia Iulai 30, 2025, e mafai ona fa’asaoina ai le malo, mai le toe totogia o nisi tupe fa’aopoopo, pe afai ae taofia le galuega ma toe amataina.

O lenei tusi mai i le Paramount, sa aveina atu ia Mark Lively, o ia lea o lo’o mataituina le galuega, ma lana sui i totonu o le teritori, le susuga ia John Goeke.

O le talosaga mo le tolopoina o le aso e faamae’a ai le galuega, e ma’oti lava i le ogatotonu o le fale, ae o fa’alava o le fale, e tatau ona fa’amae’aina ia Setema o lenei tausaga.

O le aso 14 o Iulai lea ua faamoemoe e toe tatalaina ai taualumaga lona lua o Tauaofiaga lona 39 a le Fono Faitulafono ma ua fuafuaina ai le faia o sina sauniga i luma o le fale fono fou, i le aso 11 o Iulai, pe a pasia mai e le Matagaluega o Galuega Lautele lea fuafuaga.

Ae ona o le talosaga e pei ona ta’ua i le tusi mai i le Paramount mo le aso fou e fa’amae’aina ai le galuega, atonu o le a le taunu’u lea fuafuaga a le maota fono.

Ua savali nei le 8 tausaga talu ona amataina le galuega mo le Maota Fono fou, lea e aofia ai ma tausaga e 2 lea na taofia ai galuega uma ona o le fa’ama’i o le Koviti.  

E tusa ai foi ma se ripoti ua o’o mai i le Samoa News, o lo’o ta’ua ai le iai o se talosaga mo se vaegatupe mai i le ARPA mo le fa’amae’aina o lenei galuega, e aofia ai ma lala (wings) o le fale, talu ai ua le toe iai se tupe o totoe mo lenei galuega.  E le o mautinoa i le taimi nei pe ua taliaina le talosaga a le fono ma e le o mautinoa foi le aofaiga o se vaegatupe o lo’o faatalosagaina.

Ae o le aofaiga o le tupe atoa na fa’aagaga mo lenei poloketi, e o’o mai ia Setema 2024, e $26.6 miliona, ae e $26.4 miliona ua mae’a ona fa’aaogaina, e tusa ai ma se ripoti mai i le Faatonusili o le Matagaluega o Galuega Tetele (DPW) malolo, o Faleosina Voigt.  Ae o lea vaegatupe sa fa’atulagaina mo na’o le Ofisa Tutotonu (main building), ae  le’i aofia ai ma lala o le fale o le a iai ofisa, po o le pakaga taavale. 

E ui ina e le’i fa’alauaiteleina le tala o le tupe mo lenei galuega, ae i le iloiloga a le Faatonusili fou a le DPW, le susuga ia Taeaotui Tilei, ma le Senate, na fesiligia ai o ia e le afioga i le Senatoa ia Olo Uluao Letuli, pe fia se tupe ua fa’aalu i le galuega.  Ae peitai, sa tali mai le alii faatonusili, o le a maua mai se tali o lea fesili i se taimi mulimuli ane.

Ae peitai, i se ripoti ua o’o mai i le Samoa News, o le tau aofa’i e faamae’aina ai lenei galuega, e aofia ai ma ofisa, e $40 miliona.  Ae e le aofia ai meafale ma le teuina o totonu o le fale atoa.