Ads by Google Ads by Google

Toe aiaia tulafono femalaga’iga i le va & atunu’u i fafo

Ua faailoa mai ua i ai nisi suiga o aiaiga mo femalaga’iga i le va o Samoa na lua, i le mamalu fegasoloa’i o le atunu’u. Afai e te malaga mai Samoa, ua tatau ona le silia ma le 14 aso talu ona faia sou tui puipuia o le Misela, po’o le MMR.

 

O i latou uma e malaga mai Samoa, pe sa uia mai Samoa e sau ai i Amerika Samoa nei, o le a mana’omia ona latou usita’ia lea tulaga. Ua mautinoa fo’i ua mae’a i ai le aufaigaluega a le Matagaluega o le Soifua Maloloina i malae va’alele ma Uafu uma i Samoa e mafai ona faia ai tui puipuia nei mai le Misela, Mami ma le Rubella, ina ia le tau feoa’i solo tagata malaga e saili se falema’i e faia ai latou tui puipuia a’o le’i malaga mai.

 

Pe a mae’a ona faia latou tui puipuia nei, o le a i ai se pepa fa’atumu e fa’ailoa mai ai ua mae’a faia lea tui fa’apitoa mo le sui malaga. O le a latou fa’amauina mai ai ma le fa’ailoga i le vaitusi lanu mumu, e mautinoa ai e lenei itu o le vai, ua mae’a faia le tui puipuia a’o le’i te’a le 14 aso e malaga mai ai lea sui.

 

Afai o oe lea e o’o mai lau malaga i Amerika Samoa e ao ina faia lou tui puipuia lea i Samoa a’o le’i tu’ua le va’alele laufanua o Samoa.

 

Sa lua vaitusi na fa’amau mai ai fa’ailoga ua mae’a ona faia tui puipuia nei mo pasese e fa’atutu mai i le tatou nei teritori. Sa lanu moana nisi fa’ailoga, ae lanu mumu nisi fa’ailoga. Ona o lea fete’ena’iga i lanu o fa’ailoga, na le talia ai nisi o nei pasese e ulufale mai i Amerika Samoa se’i toe fa’ailoa mai e ta’ita’i o le Soifua Maloloina a Samoa, le lanu moni e tatau ona fa’ataua.

 

Lea la ua fa’amau fa’ailoga nei le Lanu Mumu e fa’amautu ai, le agatonu ona mae’a faia o tui puipuia o le Misela o tagata na uia mai Samoa pe mai Samoa fo’i.

 

Ua fa’ailoa mai fo’i mai Samoa ua atoa nei le 36 o i latou ua maliliu i le Misela, ae tasi le aso ua atoa le 230 o i latou ua sulu atu i le falema’i mo togafitiga o le Misela. Ua fa’ailoa mai o le to’atele lava o i latou ua mama’i pe pesia i le Misela ma fa’ao’o atu i le falema’i o pepe laiti e le’i atoa le 4 tausaga le matutua.

 

Ona o lea to’atele ua sulufa’i atu mo ni togafitiga i le falema’i, ua siaki ai le sapalai o le Okesene mo togafitiga e ao ina faia mo i latou ma sa fa’ailoa mai lea mana’omia i ta’ita’i fo’i o Amerika Samoa, ma sa faia ai le malaga fa’apitoa a le Nafanua ll i le aso Sa na te’a nei, ina ia latou utaina atu le 97 fagu o le kasa Okesene mai le tatou Malo mo Samoa. O le aso ananafi, nei ua toe avatua ai le isi 96 fagu o le Kasa Okesene mo Samoa lava, ina ia tagolima le falema’i mo togafitiga e mana’omia.

 

O le Oka lenei o le Okesene, ua fa’ailoa mai e le ali’i fa’atonu Motusa Tuileama Nua, “O le talosaga sa’o mai le Falema’i i Moto’otua ona ua le lava se Okesene mo le ICU, ona ua to’atele na’ua gasegase e ao ina togafitia fa’apitoa ai, ona o le pepesi o le Misela.”

 

“O lo ua fa’alua nei la ona avea uta nei o le kasa okesene mo Samoa aua o lo’o fa’ateteleina lava le pipisi o le Misela, ae fa’afetaia e le’i toe maua lava se tasi i Amerika Samoa i le Misela i le taimi nei,” o se tala lea a Motusa.

 

O lo’o lipotia mai Samoa e le aofai e 2,194 us maua i le misela, a’o i latou ua maliliuu ua amata mai tausaga 4 e aga’i i lalo ae i ai ma le to’atasi lava o le tama e 37 tausaga le matua.

 

O nisi o fesili a le atunu’u e fa’atatau i le avatua o nisi o tatou tui puipuia e fa’aaogaina i Samoa, ua talia mai e se tasi o ta’ita’i o le atunu’u, “E i ai aiaiga e le mafai ai ona tatou foa’ia atu lava so’o se mea mo Samoa. E tatau ona usita’ia muamua e i tatou iinei le fa’atupega o lea foa’i o le a taua’ao atu, aua e tatau ona uia ala o mea muamua fa’ato’a mafai ai ona foa’i pe a malilie ma fa’ataga mai lea ituaiga o foa’i.”