VAEGA 11

E toe fa’atalofa atu i a tatou pa’aga i so’o se tulimanu o le kelope o lo’o maua mai ai

lenei auaunaga, aemaise i nai o tatou tama ma tina matutua i Amerika Samoa. E

fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’malu, ae o le a taumafai atu le tatou Fagogo - O

TEINE E TO’ATOLU MA LE TAMA NA LEILOA.

************************************************

Sa gata mai le tatou Fagogo i le vaiaso ua mavae, ina mae’a mai le asiasiga a le alii talavou i ana uo, i se nofoaga uiga ese, e pei ona sa molimauina e le afafine lona tolu, po o le ui’i o se fanau teine e to’atolu, a le alii gaosi falaoamata, lea sa mulimuli fa’anana atu i tua o le alii.

E mafua ona ta’ua o se nofoaga uiga ese, ona sa le gata ina talatalanoa le alii talavou i manulele ma manu o le vao, ae sa faapea ona tulaga ese ia vaomatua sa va’aia e le teine.  

O le vaomatua muamua na tau atu iai le alii talavou, sa va’aia e le teine, e lanu auro uma la’au ma sa fafa’i e le teine se laula’au mai se tasi o la’au lanu auro, e ave e fai ma ana molimau. 

Ina ua o la tu’ua le vaomatua lanu auro, sa faapea ona o la taunuu i seisi togavao, ae ua suia foi le lanu o lea togavao.  Ua le lanu auro pe lanu meamata, e pei ona masani ai togavao uma, ae ua lanu siliva.

Ma sa faapea foi ona gagau mai e le teine ia seisi foi lala la’au mai i se la’au siliva o le togavao, ma tu’u i totonu o lana taga.

Ina ua toe fo’i le alii talavou ma le teine i le potu, sa faapea ona faia ai le la taumafataga ma faia ai loa se la malologa.

O le taeao na soso’o ai, sa fiu le alii mau’oa e fa’atalitali mai le afafine o le tamaloa gaosi falaoamata, e alu atu e fai sana ripoti e tusa ai ma le tulaga na o’o iai le po, ae peitai, sa fiu le alii mau’oa e fa’atali.

Ua maualuga a’e lava le la, ae e le’i sau lava le teine mai i le potu.  Ma ua avea lea ma tulaga ua faapopoleina ai lava le alii mau’oa, po o le a se mea ua tupu i le teine.

Ma ua alu le aso atoa o savali atu toe masau mai i leisi itu o le potu ia le alii mau’oa, i le faatalitaliga lava o le teine.

Na i’u ai loa ina faapea mai le alii mau’oa, o le a alu i le potu e va’ai po o le a le mea ua tupu i le teine.

Ua alu atu nei le solo a le alii mau’oa ma ana auauna i le potu lea e fefefe tele tagata e o iai, ona o le pa u.

O se tulaga maoa’e na va’aia e le alii mau’oa ina ua tatalaina mai le potu ma ia va’aia ai le afafine o le tamaloa gaosi falaoamata o nofonofo mai i tafatafa o le fa’amalama.  Ma se alii talavou o lo’o moe mai luga o le moega.

[E FAIA PEA]