Pago Pago - AMERIKA SAMOA

AMERICAN SAMOA COMMUNITY CANCER COALITION - $6.1M MAI LE INITERIA

Ua fa’afiafiaina le tatu Faipule i le Konekeresi ina ua pasia mai le tupe toina mai le Matagaluega o le Soifua Maloloina & Tautua Lautele a le Malo tele e taua’aoina lea i le American Samoa Community Cancer Coalition ina ia fa’atautaia ai suesuega fa’apitoa i le gasegase o le Alzheimer i le teritori. O le aofai o lea fesoasoani tupe e $6,186,533.

O le fa’atupega lea e ao ina faia ai suesuega taua e agaga i le taumafaiga e taofia le to’atele mai le oo i lea gasegase faigata. 

O le Alzheimer o le gasegase lea e fa’asolosolo atu le soifua ina le toe mafai ona manatua ni mea sa fa’ato’a tutupu i le soifuaga, ae manatua na’o mea ua leva sa toe tau manatunatu i ai le tagata, ma fa’asolosolo atu lava ina galo uma lava e le toe manatua mea uma.

O lea fo’i fa’ama’i e le o maua se vaifofo, peita’i o lo ua i ai vaila’au ua saunia lelei ina ia mafai ona fesoasoani e fa’atuai ona  oo ai le sui ua a’afia ina le toe manatua lava soo se mea i lona soifuaga atoa.

O le fa’atupega na toina sao mai le National Institute on Aging [NIA] o le vaega o le Human & Health Services o le Matagaluega o le Soifua Maloloina a le Malo tele.

Ua faafetaia mai e le tatou Faipule i le Konekeresi Uifa’atali Aumua Amata le galuega mae’ae’a na fa’atino e va’atausili Tofaeono ma le latou fo’i aufaigaluega galulue i le Asosi a le Community Cancer Coalition aua o lea ua mautu mai lenei tupe toina mai mo suesuega aoga ina ia mafaia ona tima’ia le mamalu o e tino matutua o le atunuu, ia le a’afia i lea fo’i gasegase aua e le o i ai fo’i sona togafitiga poo se vaifofo ua maua i lenei lava vaitau.

“O le taimi lava e mautu ai le silafia lelei o mea e ono vave maua ai i tatou i lenei fa’ama’i, e mafai lava ona alofia a’o le’i mautu le gasegase i lenei i se soifuaga fiafia o se tagata ua tino matutua o le atunuu, o tatou pelega i totonu o aiga,” o se tasi lea o fa’amatalaga a le tatou Sui i le Konekeresi, Uifa’atali Aumua Amata.

O lo ua fa’auia fo’i le fa’afetai a le tatou faipule i Uosigitone i le failautusi o le HHS Xavier Becerra, le fa’atonu o le NIA Dr Richard Hodes, ma le aufaigaluega na iloiloa toto’a lenei talosaga mo le tatou Koalisi Kanesa, aua ua latou lagolagosua lava i le taumafaiga e tausailia ni ala e le vave a’afia ai le soifua o nai o tatou matua i lenei fa’ama’i.

8 AFIOAGA FAIA I AI LE SUESUEGA -  MA’I MUMU TUTUPA:

O lo ua fa’ailoa mai le sailiga o le atunuu poo a mai le Ma’i Mumu Tutupa i le Terittori, ua filifilia ai ni afio’aga e valu e faia ai le suesuega fa’apitoa i lenei vaitau. O lo’o suesuega o lo’o fa’atautaia e le Matagaluega o le Soifua Maloloina, ma faia ai latou suega o le toto, ona ave lea e faia ai suesuega fa’apitoa ia iloa patino poo toe i ai ni siama o le mumu tutupa i totonu nei mai aiga ua sofa’i e le matagaluega o le Soifua Maloloina.

Ona sa matua faia inumaga o fuala’au mumu i le atunuu i tausaga ua mavae, o lea ua toe faia ai lenei suesuega fa’apitoa, pe mata o aoga lena inumaga tele o fuala’au mumu tutupa i le atunuu, ma ua soloia ai lea fa’ama’i mai Amerika Samoa.

O afio’aga ua lisia o le a fa’atautaia ai nei suesuega e aofia ai Fagamalo, Fagalii, Poloa, Amanave, Seetaga, Pavaiai, Nuuuli ma Aua. O le a amata ona sofa’i nei afio’aga e le Matagaluega o le Soifua Maloloina i le masina fou i le amataga lava o Oketopa, 2022.

Ua fesiligia fo’i lenei faiga fou ua fa’atulaga mai le pulega o le Tautua a le Matagaluega mo lea Gasegase i le tunuu pe aisea ua faia ai fa’apea, ae tali le tamaitai o Lynette Suiaunoa Scanlan, “O le faiga lenei ua fa’atulaga, o le a maua ai se fa’ai’uga pe toe faia se fa’ainumaga o fuala’au Mumu Tutupa i le atunuu atoa pe leai, e fuafua lea tali pe a mae’a va’aia se tulaga o i ai le siama o le Mumu i toto ia o le a tuia mai sui o aiga o le a sofa’i atu e le Matagaluega i afioaga nei e 8 ua filifilia.”

“A lelei lava se fa’aiuga e maua mai le suesuega lea o le a mua’i faatautaia, e le toe faia se inuga tele o fuala’au mumu i le tausaga nei.” O le fa’amatalaga mautu mai lea a Suiaunoa Scanlan e tusa o le taumafaiga a fa’atautaia nei.

FA’AITIITIA AOFA’I O I LATOU FA’AMONIA I LE COVID-19

Ua iloga mai ua maulalo lava numera ua fa’amauina mai i le aofai o e o lo ua maua ai pea le verusi o le Covid-19 i le teritori i le taimi nei, ma ua fa’ailoa mai e le tamaitai Foma’i sa ia ta’ita’ia lea taumafaiga atoa, Dr Elizabeth Lauvao, “Ua mae’a le taumafaiga atoa, ua matua maulalo lava le numera fa’amau mai o nisi o totoe ai le verusi o le Covid-19 i le atunuu.”

Pau le mea ua totoe nei e tusa ai ma le fa’amatalaga a le tamaitai foma’i, “Na’o le mataituina pea o le aluga o e o totoe ma le verusi, pe mata e toe i ai se taimi e toe a’e ane ai i luga numera ina ia vave fo’i ona toe fa’amalosia se isi taumafaiga fa’alaua’itele e toe tineia ai le Covid-19, ae afai o lea lava ua mou malie atu mai le atunuu, o se fiafiaga tele lea.”

Ua fa’ailoa mai, “O le aofai o nisi ua fa’amaonia le suega mo le Covid-19 ua toe fo’i nei i faitauga e i lalo mai o le 9 tagata, ma o se taimi muamua lea ua ititi ai fa’apea faitauga o e o i ai pea lava le verusi Covid-19 i le atunuu.”

I le lipoti a le Komiti Fa’afoe mo le vaiaso o Setema 12-18 ua fa’amauina mai ai le aofai e 9 i latou ua fa’amaonia le suega o le Covid-19 mai le 1,145 tagata ua maua i le COVID. 

O isi fa’amaumauga mai le vaiaso o Setema 5 -11, 2022  na faia ai suega a le to’a 1,047 tagata na ulufale mai ma e na’o le 18 na mafai ona fa’amaonia nei suega e maua i le Covid-19.

Ia Setema 18, 2022 na fa’amauina ai le aotelega ua maua i le Covid-19 e 8,244.

Ua fa’ailoa e le Lutena Kovana, Talauega Eleasalo Ale i se pepa o fa’amatalaga mai le Komiti Fa’afoe, “Ua tatala aloa’ia femalaga’iga mai so’o se atunuu o le lalolagi i totonu o Amerika Samoa ma malaga ese atu fo’i o nisi mai Amerika Samoa i so’o se atunuu i fafo ato o lona talafatai. Na mua’i lava tatala lemu ina ia mautinoa e le o toe a’afia le atunuu aua o lo’o taoto lava i faitoto’a lea fa’ama’i e oo mai lava i lenei vaitau.”

O lo’o fa’amalosia pea lava le TalofaPass e lesitala ai tagata malaga mai i le teritori, ma o lo’o fa’amolosia pea le faia o tui puipui. 

O nisi o mea ua fa’ailoa mai ua mae’a tuumamaina pe ua le toe fa’amamaluina fo’i mo le fa’asa o le Covid-19: Ua le toe faia ni suega Covid-19 mo tagata ulufale mai i le atunuu mai so’o se ala ua malaga mai ai; Ua see atu le fa’atautaiga ma le mataituina o le TalofaPass i le Matagaluega o le Saogalemu Fa’alotoifale o le tatou Malo mo na’o tagata e malaga mai i totonu o le teritori.

E tusa ai o malaga a le MV Lady Naomi, ua fa’ailoa mai e le fa’atonu o le Soifua Maloloina, Motusa Tuileama Nua, “Ua mafai nei ona fa’ataga le malaga mai o lea va’a ma lana pasese atoa e 200 tagata ma uta e pei ona mua’i pasia ai mai le amataga o le tautua a lenei va’a lau pasese uta i le va o Samoa ma Pago Pago nei.

O le vaiaso ua te’a sa fa’amoemoe o le a amatalia ai ona fa’ataga lea tulaga mo folauga i vaiaso ta’itasi a le MV Lady Naomi, ae sa fa’ailoa e le fa’atonu o le Uafu ma Malaeva’alele, Chris King, “Ona o le fa’atagaga lea e le’i leva ona faia mo femalaga’iga a le va’a MV Lady Naomi, o le mea lea ua le fa’atagaina ai mo le malaga i le vaiaso” ua te’a, ae o lea ua tuufa’atasia nei fa’aiuga uma i le malaga o lenei vaiaso, Aso Tofi nei.”

Ua fa’ailoa mai fo’i o le a logoina le Samoa Shipping i Samoa ina ia toe fa’atulaga i ai latou malaga uma i lenei fa’atagaga mai le Komiti Fa’afoe o le Covid-19 i le teritori.

O lenei fo’i le vaitau o le Lotu a tamaiti ua tulata mai, ma ua tatau ai ona faia lea suiga lelei i femalaga’iga ma fela’ua’iga o moomia mo tagata uma ia maua le avanoa mo latou uta e fia avea i Samoa.