Pago Pago, AMERIKA SAMOA

TAOFIA KOVANA SIITAGA TOTOGI MA SUIA MAI KONEKARATE FAIGALUEGA TUMAU

Ua fa’ailoa e Kovna Lemanu Peleti Mauga, le taofia uma le fa’aauauga o si’itaga o totogi mo i latou sa suia mai e Kovana Lolo Moliga mai galuega fa’akonekarate i matagaluega eseese o le Malo e avea ma tagata faigaluega tumau.

Na fa’ailoa lea fa’atonuga a le kovana i lana tusi fa’alaua’itele i le aso 8 o Ianari matagaluega ta’itasi ma ofisa o le malo. Ua ia fa’ailoa manino atili ai le tulaga o le fa’asoa lelei o le tupe faaalu a le Malo, o le a taotia uma lava siitaga ma le suia mai o galuega fa’akonekatrate i le avea ma tagata faigaluega tumau a le Malo.

O lo ua faailoa atu i le Fa’atonu o le Matagaluega o Tagata Faigaluega ina ia, “Lipotia mai uma i latou ua suia mai latou galuega mai le fa’akonekarate i le avea ai ma tagata faigaluega tumau a le Malo mai ia Ianuari 01, 2019 se’ia oo mai ia Ianuari 2021, e manaomia ona toe taga’i toto’a i ai.”

“E fa’afetaia lo outou galulue fa’atasi mai ina ia mautinoa le tulaga o le tupe a le Malo ma lona fa’aaogaina, lea ua maufa’atuatuaina ai i tatou e fa’ataunuu.”

O le tau fa’asiusiuga o le pulega a Kovana Lolo Moliga, sa ia fa’alauiloa aloa’ia ai, “O lo ua ia suia aloa’ia mai e na fa’afaigaluega fa’akonekarate e avea ma tagata faigaluega tumau a le Malo i matagaluega eseese sa galulue ai, ina ia fa’aauau ai pea latou galuega o faigaluega ai, pe a oo ina suia mai i lenei faigamalo.”

Ona o lea suiga na fa’amalosia e Kovana Lolo Moliga, ua agavaa ai sui fa’atonu sa galulue i matagaluega o le Malo i le tausga ua te’a, e avea ma tagata faigaluega tumau.

I lea faiga na fa’atino e le faigamalo ua mavae, ua le usita’ia ai tulafono fa’ataoto mo tagata faigaluega i le Malo o Amerika Samoa, lea e tatau ai ona fa’asalalau avanoa tumau ma talia ai nisi e talosaga e fia apalai mo nei avanoa, ma o le aiaiga lea o avanoa tumau a le Malo. O le sui e sili ona agava’a o le a filifilia, o i latou na e toina i ai le avanoa e galulue ai i na tofiga.

O le isi vala ua matauina e le o tusa ma tulafono o galuega ma tofiga e galulue ai nisi i le Malo, o le suiga mai le avea ma tagata faigaluega fa’akonekarate e avea ma tagata faigaluega tumau, e tatau lava ona suia mai lona totogi, ma e maulalo atu nai lo le totogi sa galue fa’akonekarate ai. Peita’i e le o faia lea tulaga i le suiga lenei, o lo’o tumau pea lava le totogi i le mea sa i ai, ma ua fai lava si maualuluga o nei totogi nai lo le totogi e tatau ona galulue tumau ai i le Malo.

Na lipotia atu e nisi o tagata faigaluega a le Malo, le alu atu lava o le sui Fa’atonu fou ma avatu ana Sui lagolago e le tasi ae ua lua. O se mea e maofa ai, ona e tasi le fa’atonuga, ia alausu le  sui fa’atou tofia i lana matagaluega ma ia feiloa’i ma le aufaigaluega tumau, fa’amasani ma ia fa’ataunuu tiute uma e patino i le matagaluega, e ui ona o lo’o fa’ato’a amata i latou i nei faiva fou. Ia fa’amaumau mai fo’i mea totino uma a latou matagaluga ta’itasi mo le malamalamaga a le Faigamalo.

E le’i i ai se fa’atonuga mai le afioga le Kovana Lemanu Mauga, ina ia malaga atu se fa’atonu ma ana lava sui fa’atonu ta’ilua pe ta’itasi, pau le fa’atonuga, “Ia galulue ma fai fa’alelei tagata faigaluega uma i o outou matagaluega.”

“Afai ae faia lea tulaga o le alu atu o le Fa’atonu tofia ma avatu ana sui fa’atonu, ua solituina fo’i e nei sui tulafono tau tagata faigaluega a le Malo ma avanoa faigaluega i totonu o matagaluega o le Malo.”

SAUNIGA FA’AMANATU MO LE KOVITI - 11:30A.M. IANUARI 19

I se tusitusiga a Kovana Lemanu Peleti Mauga i le aso Faraile ua te’a, sa ia fa’ailoa ai e fa’apea o le Aso Lua, Ianuari 19, ua valaauina aai ma setete i le malo o Ameirka e le Komiti Faauuga o le Peresitene ina ia auai faatasi i se Sauniga Faamanatu mo le KOVITI - se taimi e manatunatu ai ma le faaaloalo le 385,000 o soifua o tagata Amerika ua aveesea e le faama’i oti. 

I le agaga o le faamoemoe ma le loto e tasi faaAmerika, ua ma ‘ua talosagaina ai ma le afioga i le Lutena Kovana, Talauega Eleasalo Ale, lo outou mamalu tatou te galulue faatasi e ala i lo outou valaauina o susuga i Pulenuu ma le malosi o afioaga, o aumaga i le teritori. Ua talosaga atu lo tatou auai fa’atasi i le taina o logo faailo i le 11:30 i le taeo o le aso Lua, Ianuari 19. O le taimi lena o lo tatou tutu faatasi faalemalo atoa. 

“A’o tatou toe tepa i le faama’i oti ma manatu i le aveesea o soifua ma le aafiaga o e ua tuua, tatou taitoatasi foi ma avea lenei itula faapitoa e sii a’e ai le faafetai i lo tatou Atua ona o le tumau pea o lana faamanuia i lo tatou teritori,” o se vaega lea o tusitusiga a le kovana sa tuuina atu i le Failautusi o Mataupu Tau Samoa ma sui o le kapineta. 

SAILIA MEATOTINO MONI A LE MATAGALUEGA O FA’ATO’AGA

O le vaiaso na te’a ua amata ai ona sailia meatotino moni a matagaluega ta’itasi e pei ona moomia ai e le Kovana Fou ona fa’atino mai e sui ua ia tofia e avea ma Sui Fa’atonu o matagaluega ta’itasi ma Ofisa eseese o le Malo.

Mai le matagaluega o Fa’ato’aga, ua fa’ailoa mai ai, o lo’o taumafai ona malamalama lelei le sui Fa’atonu fou o lea matagaluega I le ala ua fa’atupe ai latou ta’avale o fa’aaogaina.

Ua fa’ailoa mai e le sui fa’atonu, Solia Iosua Mutini, “Ua ia manatu ina ia faia se suesuega e leoleo i lea mataupu ona e fai si lavelave o le fa’atauga o ta’avale a le Matagaluega o lo’o fa’atautaia ai. Peita’i e le o ni meatotino a le Matagaluega pe afai ae mae’a le fa’atauga.”

O le suesuega atoa o nei ta’avale a le DOA ua faia lea e le Matagaluega o Leoleo i le Ofisa o Leoleo i Tafuna.

E ese mai i ta’avale, ua sailia fo’I ni masini Komipiuta ma isi mea Ua aveesea mai le Ofisa o le matagaluega o Fa’ato’aga, ma ua tatalia pea se fa’amatalaga aloaia mai le susuga Tumavave Tauapa’i Laupola sa fa’afesootai mo sana fa’apupulaga atili i lea ituaiga o mataupu, pe a fo’I se manatu ua fa’aalia e lana afioga le Kovana, e tusa ma lea mataupu.

Ina ia mafai ona maua a’ia’i se fa’amatalaga e tusa o le suesuega a leoleo, ua faailoa ai e le susuga le Sui Komesina, Foifua Foifua Jr, “O le faitalia lava a le sui fa’atonu fou latou e fa’atautaia ai se suesuega i totonu o lana matagaluega pe afai ua matauina e ia, o i ai ni mea fa’aletonu e tusa o meatotino a lana matagaluega, sa tatau ona i ai ia mautinoa le fa’aauau ona fa’atino galuega ma tautua a le matagaluega.”

Ua fa’ailoa mai fo’i e moni lelei o lo’o fa’atautaia le sailiga i le lisia o ta’avale a lea matagaluega, ae le mafai ona fa’ailoa mai e i latou ni fa’aiuga, o loo fa’aauau le suesuega ma o le sao lea o le sui fa’atonu po’o le faigamalo e fa’ailoa atu iuga ua maua e i latou ua suesueina lea mtaupu.

O lea suesuega sa fa’ato’a amatalia mai le ogatotonu o le vaiaso ua te’a,  ma o le afuaga na matuaina ai lea sailiga o meatotino, ona o lo ua manaomia e le malo ona fa’amautu a’ia’I le aotelega o aseta a le Malo, aua fo’I pe afai e moomia ona Inisiua le malo, I ana tagata faigaluega ma Meatotino, e aotelega atoa nei mea uma I le fa’amauina o se Inisiua.

O le sailiga o faia nei, e ao ina ave i ai le fa’amuamua a taitai uma o matagaluega ma Ofisa ta’itasi o le Malo. O le fa’amauina o mea totino uma a le Malo ua fa’atulaga ai le fa’amautu mai I le mae’a ai o le 30 aso talu mai Ianuari 03, 2021.