Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

MEALOFA FA’AOPOOPO MO LE MASAGA FA - PACIFIC INDEPENDENT DISTRIBUTOR

 

O le masaga fa o tamaitai uma lava - Moriah, Maureen, Miracle ma Melisha Sokimi o iliili ma Fagaima - ua toe fa’ao’o atu fo’i i ai le meaalofa taua mai le Pacific Independent Distributor (PID) Inc. i Fagaima i le taeao o le aso Tofi ua te’a.

 

O lenei meaalofa taua o latou “Diapers ma Wipes” o le ituaiga o le “Love” gaosia lelei mai Ausetalia. Ua ta’i masina ma faao’o lea meaalofa mo i latou ona o le mafaufau ia agatonu napekini ma le tuputupu o latou tino mo le uluai tausaga atoa o le latou soifuaga. Fa’afetaia e matua o Filomena ma Sokimi Sokimi le agalelei o le PID Inc. mo le fa’atinoga o le alofa ma le lima foa’i mo le fanau.

 

Fa’amalo fo’i le tausi tama lelei, aua o lo ua matauina lava le soifua malolosi o le fanau, e ui ina ua le faigofie ona va’ava’aia i latou e se tagata e to’atasi i le taimi lenei o le latou tuputupu a’e.

 

TALOSAGA AUMUA AMATA – TOE SOSO’O & FA’AUMI TAIMI ATOFA ‘ASEDC’ 

 

Ua toe fa’aulu nei le isi talosaga a le tatou Faipule i le Konekeresi, Aumua Amata, ina ia soso’o atu ma toe fa’aumi se vaitaimi e fa’aaogaina ai e Amerika Samoa le latou feagaiga o le American Samoa Economic Development Credit (ASEDC) lea e mafai ai ona fa’agafua Lafoga Totogi tau Oloa fa’atau i totonu o le Iunaite Setete a le StarKist Samoa. 

 

Ua toe fa’amanatu atu i sui o le Konekeresi o lo’o aofia i lea komiti, e taua tele ia Amerika Samoa ona tumau o le StarKist i ona laufanua, ona o le to’atele o le atunuu o lo’o ua galulue ai, fa’atasi ai ma pisinisi o lo’o latou fa’apa’aga i galuega feso’ota’I ma lea Kamupani I’a, o se auala ua maua ai galuega e tausia ai aiga e to’atele na’ua o Amerika Samoa.

 

Na muai pasia le ASEDC e le Konekeresi ina ua maea fa’amaonia e i latou, ua pau lea o se auala e mafai ai ona faataututu le StarKist Samoa ma isi Kamupani I’a tetele o lo’o auina atu i totonu o le Iunaite Setete a latou I’a tu’uapa mo fefa’ataua’iga, peita’i ua fa’afouina lea aiaiga fa’aletausaga.

 

O lana tusi lea sa fa’auia tonu i le Taitaifono o le Komiti o le Tupe o le Senate a le Malo tele, Charles Grassley ma ua fa’auia le isi kopi o lenei lava talosaga i se isi o Senatoa sinia Ron Wyden ia Oketopa 14, 2020, ina ia una’ia malosi le toe fa’afouga o lea aiaiga mo Amerika Samoa, ma talosagaina ai le fa’aumi atu o se taimi e fa’aaogaina ai e Amerika Samoa nai lo le na’o le tausaga e tasi I taimi uma.

 

I soo se talosaga lava i mataupu faapenei, e fa’auia fa’atasi atu ai lava ma nai mea e ao ina fa’amanatu atu i nei sui iloga o le Senate a le Malo Tele. Lea na toe fa’amanatu atu ai e Aumua Amata le taua ma le avea ai o fanau a Amerika Samoa ma Fitafita o le Vaega Au ma ua numera tasi ai le to’atele o alo o Amerika Samoa i totonu o le vaega au.

 

Ua ia fa’ailoa atu fo’I le aotelega e 2,300 o tagata faigaluega a le StarKist Samoa ma afai ae le toe i ai le Kamupani I’a lea i laufanua o Amerika Samoa, o le tele lea o aiga o le a taumafai e sailia se isi alamanuia e mafai ai ona tausia o latou aiga.

 

O lana lea talosaga ia Oketopa, ua ia toe fa’aluaina ai lana talosaaga sa fa’aulu muamua i le Komiti o le Enetia & Puna’oa Fa’anatura a le Senate a le Malo Tele. O Alii Senatoa sinia fo’I nei, e mautinoa lava e tumau mo le nofoaiga lona 117 a le Konekeresi.

 

Ua fa’ailoa manino e Aumua Amata, e lua isi kamupani I’a ua tu’ua Amerika Samoa ina ia toe fa’atula’ia latou kamupani i malo ua taugofie ai le tupe fa’aalu i totonu o tagata faigaluega, toe pau lea o le Kamupani tele ua mafai ona fa’alagolago atu i ai le Malo o Amerika Samoa mo ni avanoa faigaluega e tele fa’apea e galulue i ai ona tagatanuu, le 2,300 o i latou o galulue ai i le taimi nei.

 

Ua fa’aulu atu fo’i e Aumua Amata ma se fanoga taua tele ina ia suia le ta’i tausaga ma talosaga le soso’oga o lenei maliliega taua i le ta’i lima tausaga e pei ona faia e le Konekeresi mo le teritori o US Virgin Islands ma Puerto Rico. O lana talosaga lea sa mua’i fa’aulu atu i le senatoa sinia lava i le Komiti o le Enetia ma Puna’oa Fa’anatura o le Senate, Lisa Murkowski o Alaska.

 

“O le a talisapaia e Amerika Samoa pe afai o le a toina mai se taimi umi e pei o le ta’i 5 tausaga ma talosagaina se toe soso’oga o lenei feagaiga ina ia fa’afaigofie atili ai galuega a Amerika Samoa e aunoa ma le popole e fa’afou lenei feagaiga aoga mo i latou i tausaga taitasi. O le tou Komiti lava lea ua latou fa’afaigofieina mea uma mo Puerto Rico ma Virgin Islands ina ua outou pasia le lima tausaga ma fa’afou latou feagaiga.”

 

Ua aofia fa’atasi ai ma le talosaga lona lua lenei a le tatou Faipule i le Konekeresi le tala’aga o lenei lava Feagaiga na amatalia mai ona talosagaina e Amerika Samoa i le tausaga e 2006, ma ua ia toe fa’amanatu atu lava i sui o lenei Komiti, “E taua tele ona tatou fa’atumauina le malosi’aga o le tamaoaiga i so’o se vaega o le Iunaite setete, ia aofia ai ma teritori o Amerika, i le tatou faatumauina o aiaiga tau lafoga e pei ona mua’i pasia ai, e fesoasoani malosi i teritori i o latou tamaoaiga tausi.”

 

TOE FA’AFO’IA LE 150 0 SEILA SAMOA I FANUA & AIGA 

 

I se lipoti mai Apia, o lo’o fa’ailoa ai o aumalaga e to’a 150 o Seila Samoa sa galulue e avea ma auva’a i nisi o Meli tetele, Va’a Oloa ma Va’a Fagota fo’i, ua fa’atulaga nei e aofia i le ulua’i malaga e toe fa’afo’i ane ai nisi o le Malo Tuto’atasi o loo opea i Amerika ma isi atunuu uma e tele o le lalolagi. O le aotelega lea ua mautinoa e i ai i le pasese a le va’alele mai Honolulu i Faleolo, Samoa ia Novema 27.

 

Ua fa’ailoa, o le to’atele lea o i latou ua fa’atulaga e toe fo’i mai i lea malaga, o nisi na opea ai i atunuu o Europa, na mafua ona oo i na atunuu ona o loo auva’a i Va’a La’u pasese tetele po’o meli. Ona ua lutia le lalolagi e le Coronavirus, ma ua le toe fa’aaauina ai auaunaga a meli la’u pasese nei, o le mafuaga lea o le fa’aletonu fa’atopetope o latou avanoa faigaluega.

 

E le o aofia uma e na avea ma auva’a i nei va’a i le aumalaga lenei, ua fa’ailoa mai o nisi ua toe amatalia nisi o latou Konekarate,fou e fa’aauau ai ona galulue, ma ua le mana’omia ai ona taliu mai i fanua ma aiga.

 

Ua fa’ailoa mai e le CEO o le Kamupani Va’a a le Malo o Samoa, Samoa Shipping Services, Lautimu’a Uelese Va’ai, “Ua toe mana’omia mai nei le isi 400 o Seila mo Kamupani o Meli Lau Pasese Tetele i Amerika, peita’i ua na’o le 52 Seila lea ua sauni e tu’uva’a ese atu mo galuega nei i le Iunaite Setete o Amerika ae ese ai le isi 80 o Seila lea na fa’ailoa mai e le alii Palemia i le taimi o lana polokalama fa’alauiloa fa’alaua’itele i luga o le televise ma feso’ota’iga tau initeneti.”
Ua fa’ailoa mai fo’i e Lautimu’a Uelese, “Ua i ai nisi o alii Seila ua le foiI mai i aiga, peita’i ua talosaga ina ia toe fa’afouina latou Konekarate e galulue ai ma ua faia lava fa’apea. Ua toe soso’o atu ai lava le latou faigaluega i na avanoa.”