Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

TALAVAI MA’I FATU – FA’AIGOAINA “MANUMALO ALOFA”

O le fa’atasiga e fa’amanatu ai le atoaga o le tasi le tausaga talu ona amatalia le Talavai Fa’apitoa o le Ma’i Fatu a le Matagaluega o le Soifua Maloloina i le falema’i faaitumalo i Tafuna na toe fa’aigoaina ai lenei talavai o Ma’i Fatu o le “Manumao le Alofa”.

 

O le talavai lea ua matua ai le mamalu o le atunuu ae maise lava i le fanau laiti o lo’o i a’oga pe ua maua i le ma’i fatu o le RHD, lea ua fa’amauina ai Amerika Samoa, ua numera tasi i le to’atele o ona tagata ua maua ai, ae matua to’atele na’ua i le vasega o fanauiti.

 

O le toatele o aiga ua latou taumafai lava e fa’atau le bicilin i le ta’i 21 aso e togafitia ai le fanauiti, ma o le to’atele fo’i o aiga, ua silia i le ta’ito’atasi fanau ua tatau ona togafitia.

 

O le fa’afetai tele, ona o lo ua i ai le aiga o le afioga Papali’itele Alofa ma Leota Wanda Alofa fa’atasi ai ma le Manumalo Academy, o i latou nei o lo’o fa’atauina mai le Bicilin mo lea fa’amoemoe, e faia ai talavai a fanauiti ma fa’asolo atu i talavou. O i latou na ua mae’a ona faia suesuega ua maua i latou i le ma’i fatu.

 

I lea fa’amanatuina o le atoaga o le tausaga o faia pea nei talavai i le falema’i fa’aitumaloo i Tafuna, ua tatala aloaia ai loa le Potu Talavai o Ma’i Fatu ma ua fa’aigoaina aloaia ai o le Manumalo Alofa RHD Clinic. O le ave’esea o le pupuni mai le igoa o lea potu talavai o Ma’i Fatu na fa’atino lea e le faletua po’o le afioga Leota Wanda Alofa.

 

O le fa’afetai mo le foa’i i tagata lautele ae maise o le Matagaluega o le Soifua Maloloina, sa fofogaina e le Fa’atonu o le Matagaluega ia Motusa Tuileama Nua ma le susuga Ipu Eliapo Unutoa o le ua va’aia le Polokalama mo Togafitiga o le Ma’i Fatu.

 

“O le fa’afetai ona o le tula’i mai o lenei aiga ma le a’oga atoa a le Manumalo Academy latou te fesoasoani i le Matagaluega. Ua agatonu lava le fa’aigoaina o lenei potu o talavai mo togafitiga o le Ma’i Fatu RHD aua o le tautua ua faia ma le agaga alofa ia manuia le aotelega o fanau ua maua i lea gasegase ma e ao ina vave togafitia.”

 

Ua saunoa fo’i Unutoa, “Ua tatau lava ona ave le fa’ataua i togafitiga o le fanauiti ma suea o latou fatu po’o a’afia i le RHD.”

 

ASCC LAND GRANT/ FCS VASEGA SUISUI A LEONE – FOFO

 

E to’a lua sefulu tina ua ausia le tomai e mafai ai ona latou fuaina le tino, tipi lavalava ma toe su’i la’ei matagofie o so’o se ituaiga mai le vasega suisui o lo’o fa’atautaia e le ASCC Land Grant /FCS Polokalama Suisui, o se tautua e ao ina faia mo le lelei o tomai o tagata lautele e mo’omia ina ia fa’aleleia ai o latou tamaoaiga tausi o aiga.

 

O le tautua lea o lo’o a’oa’oina e Diana Tarrant o le Land Grant /FCS Program a le tatou Kolisi Tuufa’atasi.

 

Mai lea 20 o i latou ua pasi, e to’avalu i latou ua fa’ato’a maua tusi pasi i le vasega amata o le suisui, ae 12 i latou ua siitia i le vasega lua ma le tolu, i le vasega suisui lava i Leone -Fofo, lea e fa’aaogaina ai le faletalimalo o le Aiga o Salave’a. O nei tina sa auai i le vasega sa fa’asalafa atu i tina uma mai isi afio’aga.

 

I le fa’auuga sa i ai malo fa’aaloalogia, ma le tamaitai Faipule Andra Samoa sa ia taumafai e fa’atula’ia lenei poloketi lea ua maua ai ma le la’au suisui fou mo i latou uma ua fa’ato’a pasi i le ulua’i vasega suisui, ae o i latou e 12 ua fa’alua ma fa’atolu ona soso’o latou vasega suisui ua maua fa’ailoga pusa oloa tau suisui ua taua’aoina i le aso Tofi ina ua tufatufaina tusi pasi. 

 

O le vasega fa’au’u, e aofia ai le faletua o le Faifeau Toeaina Taitaifono a le EFKAS, Mina Saifoloi, le faletua o le Fofoga Fetalai o le Maota Beauty Porotesano Ale, Faletua o le Faife’au Mauimalo Failauga, Faletua o le Faife’au Simalua Sipoloa Galoia. O isi o le vasega fa’auu o tina talavou, ae to’alua o i latou mai Futiga, o nisi mai le Alataua.

 

“O le ala lea o le tapena pea o tomai mo i latou ua tau’avea le vasega lenei, aua o lo’o agaga atu ina ia fa’atautaia ni pisinisi laiti i le lumanai, aua ua fa’amaonia ma va’aia le aoga tele o lea fo’i faiva i le sailiga o le tamaoaiga tausi mo aiga ma atina’e atili ai le tatou malo. O lea ua to’atele atu le vasega i tina ua fa’alua ma fa’atolu ona tauavea kosi suisui, tipi le sikaili ma le ituaiga ofu o mana’omia ona su’i ma fua tino o le tagata e ona la’ei, ae ese ai ma lou iloa lelei fa’aaoga lau la’au suisui ua fa’ameaalofa atu mai le fa’atupega na talosagaina e le tamaitai Faipule, ina ia amata ai lau taumafaiga ia maua ai se tupe e tausia ai lou aiga,” o le saunoaga lea a le afioga le fa’atama o le afio’aga senetoa Faiivae A. Godinet, i lona avanoa sa tuuina atu fa’apitoa mo sana tima’iga i e vasega fa’au’u.

 

Sa i ai fo’i le avanoa sa tuuina i le Faipule o Amerika Samoa i le Konekeresi Uifa’atali Aumua Amata, ma sa ia saunoa ai e fa’amalo tele i tina uma ua mae’a latou kosi I le vasega muamua, lua ma le tolu, ua moni ai le mau, “E au le ina’ilau a tina! O le soifua atina’e ma le soifua tautua, ae tainane le soifua fa’amaopoopo mea lelei, fa’apea ma le tausailia o manuia mo aiga, e nafa lava ma tina. Lea ua toe fa’amauina atili lea fo’i manatu taua i le fa’amoemoe o le polokalama suisui a Leone-Fofo. O le a’afetai fo’i i le tamaitai na moe manatunatu i mea e lelei ai le fatu aiga tausi a le vasega o tina i le afio’aga, lea ua sosolo atu i isi  nuu ma afio’aga, ua o mai ma ua fefa’asoa’i.” O se vaega lea o lea o lana saunoaga e fa’atutu i le taumafaiga ua mae’a va’aia ma ua matagofie.

 

Sa saunoa lea o ia e tusa o le komiti mulimuli o le Konekeresi o lo’o aofia ai ma ia o se tino i ona faiva i le Laumua, O le Komiti fa’apito augafa i atina’ega o pisinisi laiti. “Ua mafai nei ona maua fesoasoani tupe mo nogatupe laiti po’o Micro Loans e amata atu i le ta’i $500 ina ia fa’atuina ai pe atina’e ai latou taumafaiga ia mautu tau pisinisi. Ona o le to’atele lava o i tatou e na’o sina una’i teisi lava e se fa’atupega, ona amata ai lava lea ona olaola ma si’isi’i atu ai ma le tele o nogatupe laiti nei e fa’atula’ia ai pisinisi ia aluga lelei.”

 

“Fa’amalo tele ua mafai ona va’ai tonu i ituaiga o taumafaiga e mafai ona una’ia lea mau i le tatou teritori, o se fiafiaga ona o lea e matuaina e le tina, fa’aleleia atili ai tomai ma faiva o tina i le afio’aga. Fa’amalo le galulue, o fua nei o le saili ma tuutoina i faiva aua aiga ma afioaga. Malo le fatufatu mea lelei i tima uma ua fa’ai’u manuia faiva.”

 

O i latou nei ua maua fa’ailoga mo le vasega muamua o le suisui:Faletua Mauimalo Failauga; Beauty Porotesano Ale; Faletua Mina Saifoloi; Faletua Simalua Sipoloa Galoia; Akenese Liu; Koliah Pritchard; Tina Iakopo ma Saili Sione Samoa.

 

O le vasega ua fa’alua ma fa’atolu ona mae’a latou a’oga tau le suisui e aofia ai: Elizabeth Laban; Vineta Lilomaiava; Sisa Afamasaga; Faithful Isaako; Simeamativa Fuatiga; Asofa Ugapo; Viola Mara; Seilani Moevao; Veronika Fagalula; Luisa Ma’aseia; Lisa L. Poloa ma Andra Sagote.