Ads by Google Ads by Google

Tala I Vaifanua


[ata: foa'i]

tusia: Leua Aiono Frost

 

SUA LE ELEELE - AMATA FAUSIA LE ‘ALATELE FONOTI-LEAPAGA” I FAGAIMA & MALAEIMI:

 

O se tasi o alatele ua loa ona tulitulimatagau e le Malo se taimi e tafa ai finagalo o le pa’ia o aiga ona fa’ato’a mafai lea ona fausia ia lelei mo le fegasoloa’i o le atunuu, lea ua matuu mai aiga, ina ia fa’aauau le fa’amoemoe ia fa’aleleia lea alatele e soso’o ai Fagaima ma Malaeimi.

 

O le sauniga matagofie sa fa’atautaia e le faigamalo i le aso Faraile na tuana’i nei, ma sa fa’atasia i ai le i latou na valaauina fa’apitoa ina ia i ai mo lea fa’amoemoe, e afua mai le malo i ona tafa e fia ma le atunuu i le pa’ia o aiga e ona eleele ua uia ai lenei ala, ma le mamalu lautele fo’i sa logotala i lea fa’amoemoe ua leva ona tuupoina.

 

O e na auai, sa aofia fa’atasi le afioga le Sa’o Fonoti Tafaifai Aufata, ma le susuga Leapaga mai le afioaga lava o Nuuuli, Maluia Makuisa Amotai ae maise le afioga le Ma’opu Soliai Tuipine Fuimaono Ma’ae Bob ma le faletua ma nisi matutua o le afio’aga o Nuuuli. 

 

Peita’i o le Malo sa auai le afioga le Kovana sili Lolo Moliga ma le sui Kovana Lemanu Peleti Mauga ma Faipule o Amerika Samoa i le Konekeresi, UIfa’atali Aumua Amata. Na afio fo’i le afioga Ma’oputasi o le Failautusi o le Mataupu Tau Samoa Mauga Tasi Asuega fa’apea ma le lasilasi o le vasega o faauluuluga o Matagaluega ta’itasi o le Malo, ma le tamaitai fa’atonu sili o Galuega e fitoitonu i ai lea faamoemoe.

 

O le susuga le Faife’au tofia o Rev. Paulo Lealaitafea mai le EFKAS i Ierusalema fou sa avea ma ta’ita’i o le sauniga e si’itia le fa’afetai i le Atua ona o lenei fa’amoemoe ua taunuu o le Malo.

 

Ina ua mae’a si’itia le fa’afetai a le fa’afeaiga ma le vi’iga o le Atua, ona tu’u maoti lea o le avanoa mo le susuga le fa’atonu o Galuega mo lana folasaga e tusa o le galuega o le a nafa ma le Kamupani ua mae’a tofia mo lea galuega.

 

“O le galuega lenei, e matua to lo’u pulou i lau afioga le Kovana Sili, aua ua e mafaia ona fa’atino nisi o galuega ua leva ona mana’omia ona fausia, ua e taga’i toto’a i le taumafaiga a le Malo ma lenei matagaluega ina ia tafa se finagalo o nei aiga, ia fai ia lelei lenei alatele. Ua e so’o le fau ma le fau i finagalo o Aiga, fa’afetai i lau tofa mamao ma le utaga loloto.” 

 

“O lou agaga o alatele, sa taumafai ina ia maua le aso lenei. O le galuega lenei ua fa’aigoaina o le Route 18, o se tasi o galuega ua leva ona taoto, ae fa’afetai ua taga’i toto’a i ai lau afioga le Kovana Sili ma ua e taumafai ma ua mafai. Faamalo le fai o le faiva.” O se tala amata lea a le Faiai-Voigt.

 

Ona saunoa lea o ia e tusa o le galuega ua atofa nei i le Kamupani sa maulalo ai lava lana ofo na fa’aulu i le tauofoga o le galuega, Le Happy Construction a le susuga Lealofi Fuatagavi mai Futiga.

 

O le umi o le galuega ua fa’atulaga nei e 300 aso galue. 

 

O le galuega e faasima atoa le alatele lea aua e i ai a’afiaga o tafega e ono lamatia ai. Ua fa’avasega fo’i le mafiafia e tatau ona fausia ai, fa’atasi ma ona alasavali ma lona lautele e 4 futu. O le maualuiga o le si’itaga i luga o le ala savali e 6 futu, ae lua futu le lautele o le alavai i itu e lua o le alatele. E i ai fo’i se ala laupapa e fausia i lea ala, e fa’auia ese ai le vai i taimi o tafega.

 

O le tau o le galuega ua ofoina e le Happy Construction e $1.3miliona latou te fa’atinoa atoa ai lea galuega i lona umi e 120 tutu mai le alatele Route 19 se’ia oo i le Route 001, le alatele e aga’i i Leone ma Fagatogo. O le ofo pito i maulalo lea, ae o le ofo sili ona maualuga sa taua’aoina e $3.3miiona, peita’i o le ofo na tapena e le matagaluega o Galuega e na’o le $2.6miliona e fa’atatau i ai lenei tauofoga i le va o Kamupani Fau Auala.

 

O le Inisinia a le tatou Matagaluega o Galuega na tusia le fausaga o lenei alatele o le tamaitai o Estela Rubin CE; O le Inisina mo le Poloketi lava o le Alatele Route 18 o Uaealesi D. Sipelii CE; a’o le pule o le a va’aia le galuega atoa lea o  Alofa Tanuvasa ma le Ali’i Inspector e pasia le fa’atautaiga o le galuega i ona tulaga uma o le susuga Tolova’a Alalamua.

 

Ina ua tula’i le fa’aao o le Malo o Amerika Samoa mo lana saunoaga aloaia e tusa o lenei galuega, sa ia tapa ai i lana fa’afetai le pa’ia o aiga, ina ua mafai ona tafa o latou finagalo e fausia lenei auala ia lelei mo i latou ae aise o tagata lautele ma le Malo mo feoa’iga ma felaua’iga ia lelei ma saogalemu.

 

“I le tulaga o alatele i Malaeloa lea sa suaina le eleele e amatalia ai i le vaiaso ua te’a i le aso Faraile fo’i. O lea alatele ua loa ona tiga ai le atunuu ae maise i afio’aga o lo’o fa’aaogaina i aso ta’itasi. Ua taumafai atu le malo, ia paupau ia ae tau i Lepea, ua i ai le sao o lenei nofoaiga e amata ai galuega fa’aleleia mo feoa’iga.”

 

“Peita’i o lo ua lu’ia fo’i le tamaitai faatonu ia Faiai-Voigt ina ia suaina le eleele mo le amatalia o galuega fa’aleleia o le alatele i le afio’aga o Taputimu ma se vaega o Vailoa, a tuai lava o le amataga o le masina fou.”

 

Na ia saunoa lea e tusa o galuega o le a mae’a, “O le galuega ua mae’a ma o le a talaia mo le fa’aaogaina, ua amata lea i le Nofoaga fou o le a si’itia mai i ai le Matagaluega o Tama ma Tina Matutua i autafa o le To’ese i le Paka Liona. Soso’o lea ma le tatalaina o le galuega ua toetoe lava mae’a lelei i le tatou Malae o le Suigaula a le Atuvasa i Utulei.”

 

“Peita’i o le a tomuli le tatalaina o galuega ua mae’a lelei i le Nofoaga fa’apitoa ua toe fa’atepa ai le atunuu atoa ma turisi i le nofoaga sa ulua’i sisi a’e ai le fu’a a le Malo Tele i eleele o le Teritori o Amerika Samoa i Sogelau, Fagatogo. Afai ua le au le tatalaga o le tele o isi galuega uma ua mae’a fa’atautaia, ia o le mea sili sa magafagafa lenei faigamalo i ni galuega lelei e amatalia, ae fa’ai’u e le nofoaiga o le a soso’o mai.”

 

TALOSAGA KOVANA I LE SUI KONEKERESI - TAGA’I VAEGA TUPE MO LISI O FANUA TAU AIGA UA FAUSIA MAEA FAUSIA AI ALATELE:

 

I le sauniga lava i Leapaga, sa fa’auilavea ai le fetalaiga Puailoa Ma’ae e tusa o le eleele ua fa’aaogaina e uia ai le alatele ua sua nei le eleele ina ia fausia lelei mo feoa’iga ale atunuu.

 

Ua ia faailoa lana taofi i le galuega, ma sa ia fa’apea ane, “Toe taga’i lelei i eleele, aua e mautinoa o lo’o aofia ai eleele tau Puailoa i le galuega lenei. O lona uiga e le fa’ataunuuina le amataga o lenei galuega, se’ia vagana ua mae’a talanoaina mataupu a lenei aiga i le vaiaso o lumana’i.”

 

Sa tu’ua e Puaioa Ma’ae le nofoaga ma na te le’i taliaina fo’i le suo mo le suaina o le eleele i le taimi na ofoina atu ai ia te ia lea avanoa lelei.

 

Peita’i ina ua tu’ua e le tofa Puailoa Ma’ae le nofoaga, sa tulai Fonoti ma saunoa, “Ou te toe tepa i le taimi ua matua le tua’a ma sa ia fa’apea mai, ia mapu ia te oe le malo ma tagata. Ua ia te oe le tofa e mafai ai ona fa’ataunuu galuega lelei. O ia lea sa ia mua’i faia lenei alatele, ona o le taumafai ia fa’afaigofie feoa’iga a i matou ma isi tagata uma o le atunuu. Lea ua faato’a fa’ataunuu atoatoa lena taumafaiga aoga, fa’afetai i le afioga le Kovana sili ma le faigamalo, ua fai ma ua mafai ona fai.”

 

Ona tula’i lea o le afioga Soliai Tuipine ma ia fa’alalolalo i le paia lasi sa auai, ma ia fa’apea ai, “Fa’amatuu mai feutagaiga a le pa’ia o aiga, se’ia toe soalaupule i le mau fo’i ua fa’afofogaina e i tatou i lenei aso. O le a talanoaina, ae o le galuega latou, e mafai ona amata mai i le isi itu o lo’o ua saunoa i ai le afioga le Sa’o, e taumafai lava aiga ina ia autasi mo le tatou fa’amoemoe lelei ua tatou vagaia nei.”

 

O le talosaga a le afioga Kovana Lolo Moliga na fa’auia i le tatou Faipule i le Konekeresi sa ia saunoa ai e tusa o eleele sa avea fa’amalosi e aunoa ma se totogi o se vaega tupe i aiga uma, aua le suaina o alatele. “Alofagia Uifa’atali Aumua Amata, taga’i toto’a ane i se ala e mafai ai ona fa’auia mai e le Federal Highway po’o le Malo tele ni vaega tupe e aiaia ai eleele o aiga nei sa avea mo le fausia o alatele ua leva ona i ai. Ua avea lava e aunoa ma se tupe na totogia, ona o le agaga o tua’a ia manuia le malo. A maua mai nei mea uma e toe aiaia fa’alisi i le taimi nei, manaia. Ae a leai ia totogia mai se vaega tupe mo aiga. O aso la o tua’a ua le o toe tutusa ma aso nei i fanau talavou, ua popoto i latou ma ua mafai ona latou fesiligia nei mea uma, pe na maua mai ai se vaega tupe aua aiga.”