Pago Pago, AMERIKA SAMOA

FA’AILOGA FA’APITOA MCH - FA’ATONU DOH MOTUSA T. NUA

O le fonotaga fa’apitoa a le Mother & Children Health (MCH) Division a le Matagaluega o le Soifua Maloloina  i le vaiaso ua te’a ma latou pa’aga o galulue fa’atasi e tautuaina tina ma fanauiti a le atunuu, sa latou taua’aoina ai se fa’ailoga fa’apitoa e fa’amauina ai le tautua mata’alia ma le talimana’o fo’i a le susuga le latou fa’atonu, Motusa Tuileama Nua. 

O ia o se ta’ita’i e le fa’atalatu’u i lona fesoasoani mai i galuega fa’atino ae maise o le talia o talosaga e fa’atutu i ni tagata faigaluega e fa’atinoa galuega na fuafua a lenei itu o le auaunaga mo Tina ma Fanau o le atunuu.

Ua fa’ailoa e le ta’ita’I o lea tautua MCH, Ipu Eliapo, “Ua matua fa’ateleina atili le matou vaega i ala o tautua ma le aofai o le aufaigaluega galulue talu ona tula’i mai lenei ta’ita’i. E le fa’atuai aua o le tautua mo tina ma fanau, o se mea e ao ina vave ona fa’atino, ma o le lumana’i o le atunuu o lo’o i o matou lima.”

“Ua le gata ina fa’ateleina le seleni toina mai fafo mo le polokalama ae ua fa’apea fo’I ona ia manatu e fa’afaigaluega mai nisi ia to’atele ma lava lelei le fa’asoaina o tiute ma galuega fai ia mautinoa ua vave fa’atino,” o sana toe fa’aopoopo mai lea mo le silafia a le to’atele.

Ma o le taimi lea o le latou fonotaga i le aso Lulu na te’a nei i le fale’aiga o le Sadies by the Sea, ua filifili ai i latou, o se taimi lelei lea e taua’ao aloa’ia ai lea fa’ailoga o le agaga fa’afetai mo le ali’i fa’atonu.

TOLOA’I HO CHING –  SO’OUPU FAILAUTUSI US ARMY I AMERIKA SAMOA

O le susuga a Toloai Ho Ching ll, ua tofia e avea ma latou sooupu fa’apitoa mo le Failautusi a le US Army i Amerika Samoa, i se sauniga na faiai le vaiaso ua te’a i laumua le nofoaga o le Matagaluega o le Puipuiga Lautele a le Malo Tele sa fesoota’i mai fa’ainitenti. 

O le failautusi o le Army, Ryan D. McCathy sa ia fa’atautoina lea sui o le atunuu i lea fo’i sauniga mamalu, ma o Ho Ching ll,o se tagata sivili o Amerika Samoa. 

I le taimi na fa’atautaia ai lea sauniga, sa i ai se avanoa na saunoa fa’apitoa ai Ryan McCathy e faapito augafa i lea tofiga mo le US Army, lea sa ia fa’afetaia ai Ho Ching ll, mo lona naunauta’i e tautua, lea ua ia talia ai lea tofiga mo le USArmy i Amerika Samoa nei.

“O nei vaitau ua anoanoa’i ma ua le masino mea e tutupu mai, ma ua faigata atili ai fo’I ona galulue feso’ota’I lelei le fa’atautaiga o US Army ma ta’ita’iga o Malo o lo’o fa’atula’ia ai. O le ala lea o le saili fo’i o le Vaega Au i nisi ala e fa’afaigofie ai ona maua le so’otaga lelei i va o faigamalo i setete ma teritori, ma le pulega po’o le fa’atautaiga o Iunite ta’itasi o le US Army Reserve ta’itasi.”

“Ua iloga fo’i, o le lelei lava o le so’otaga lea i le va o le pulega o le US Army ma le ta’ita’iga o faigamalo i setete ma Teritori o Amerika i o latou atunuu, o le sologa lelei fo’i lea ona fa’auia o fanau e fia ulufale ma tautua i vaega au eseese a le Malo Tele. O Amerika Samoa le isi teritori ua matua iloga ona to’atele lava sui ua ulufale mai ai e tautua I vaega au eseese a le Malo o Amerika. Ua le fesiligia le aoga tele o nei sui faufautua ma so’oupu i le va o le US Army Reserve maTaitai o le Malo fa’ateritori o Amerika Samoa.”

O Ho Ching II o se faipisinisi I le afio’aga o Nuuuli, Amerika Samoa. O ia lea o lo’o pulea le latou faleoloa tele o le CBT Ho Ching & Co. Ltd.

Faaalia e Ho Ching, “O le avanoa ua ou maua, ua ou fa’afetai ua tofia ai lo’u nei sui fa’atauva’a. Ua iloga le aoga o le US Army i Amerika Samoa nei, ua tele avanoa ua fa’auia mai ai mo le atunuu ae maise i fanau talavou, ina ia vave ona maua avanoa e faigaluega ai ma tausia o latou aiga. O le tamaoaiga tausi fo’i o Amerika Samoa, ua tele fo’i  le sao o le US Army Reserve i ai. Ou te matua fa’afetaia lenei avanoa ua ou maua, ou te aoga ai, e fa’atino se auaunaga i le tatou atunuu, ae maise le malo tele o Amerika.”

“O se mea taua mo a’u lo’u galue vavalalata ai ma le failautusi o le USArmy i le Malo tele, Ryan McCathy ae ia sootaga lelei mataupu i le va ma tatou ta’ita’i i Amerika Samoa nei. O so’u avanoa lelei lea o le a mafai ai ona ou tautua atu i le USArmy i ala e fa’aleleia atili ai latou sootaga ma ta’ita’i o le tatou Malo Fa’ateritori, ma o le a fa’amoemoe mai fo’I le USArmy, e avea a’u ma se tasi e fa’atamatalaloto i mataupu ua fia feso’ota’i mai ai ma ta’ita’i o le tatou Malo.”

“O le matafaioi patino a sui ua tofia mo lea galuega, ia avea i matou ma sootaga lelei, e fa’amoemoe mai i ai le Taitaiga o le Vaega Au i le Malo Tele i mataupu e fetaui lelei ma Iunite o le Army Reserve i Amerika Samoa nei. O le a le na’o le vasega o ta’ita’i e aoga i ai le tofiga lenei, ae o le a sooupu fo’i i le va o matua ma aiga o lo’o tautua latou fanau i le vaega au.”

E tai lua tausaga e mafai ai ona galue so’o se sui tofia i le avanoa faigaluega o le CASA ona mafai lea ona toe suia se isi tofiga fou, E mafai ona fa’aauau lea tofiga mo sui ta’ito’atasi seia mae’a le 10 tausaga o le auaunaga ona fa’ato’a suia lea.

FA’ATASIGA TUPULAGA TALAVOU EFKAS TUALAUTA MA LEASINA

Sa matua fa’atumulia le malumalu EFKAS i Iliili i le mamalu i tupulaga talavou ae maise o sui uma o le EFKAS o tagata lotus a latou maimoaina le sao o fanau ua aofia i Autalavou uma mai i Vaitogi, Pavaiai, Iliili, Aoloau, Aasu ma ua fa’aautu a latou fa’atinoga uma fa’aleagaga i le auau o le fa’amoemoe, “O Iesu lava le Tali!”

O le fa’atasiga lenei, o se gaoioiga fa’atino ua galulue i ai le vasega o afio’aga uma o lo’o ua aofia i le Koalisi a le Tualauta 2 ma o se taimi fiafia lenei i lea koalisi aua ua leva ona taumafai e fa’atino se tuufa’atasiga fa’apea o le autalavou. 

O polokalama uma lava ua fa’atinoa ina ia toe fafagu ma sailia ala e mafai ai e le tupulaga ona tali le fesili, “Po’o le a se tali i fa’afitauli uma o feagai ma le tupulaga i lenei vaitau, ua sofa’i o latou olaga ma’aleale i le tele o mau fuala’au fa’asaina, vaila’au oona ma ua a’afia ai lagona, ua ootia ai loto i le taimi o taimi.”

O le auau lea o le Koalisi a le Tualauta 2 ma Leasina, ina ia mafai ona faia se galuega lelei e toe fa’amanatu i le fanau talavou, “O nei omiga uma o le olaga, ua na’o Iesu lava le tali, e mafai ai ona tu’ueseina uma mea e fa’amamafa atili ai lau folauga saogalemu i lenei olaga ua tumu i omiga ma fa’afitali ona o le sofa’i mai o vaila’au oona ma fuala’au fa’asaina i le atunuu ma ua tagofia e le fanau talavou.”

“O se taimi muamua lea ua mafai ai ona tuufa’atasia le aotelega o autalavou mai le tolu afio’aga o le Tualauta peita;i o lea fa’ato’a mafaia lea ma ua fa’afiafia loto lea I le Koalisi a Tualauta 2. Ua i ai nei le ofisa e fa’aautu i ai tapenaga uma a lenei Koalisi ina ia matua tetee atu i le tele o fuala’au fa’asaina ma le anoanoa’I o vaila’au o’ona e a’afia ai le olaga ma amioga a le fanau a le Tualauta lua.” O se tala lea a le ali’i Tunoa mai le matagaluega o le DHSS.

O tala fa’atino uma e fa’aautu lea i le leaga e oo I ai le olaga o le tagata e tagofia vaila’au oona ma fuala’au fa’asaina. Peita’i e tasi lava le tali, e faamalosia lou loto ina ia e le tagofia nei mea uma e fa’aleagaina ai le malumalu pa’ia o le Atua, o lou tino lea, “O Iesu na ia fa’aolaina oe mai le leaga o le agasala!”