Pago Pago, AMERIKA SAMOA

FONO KOMISI O LE DOH TOBACCO/DIABETES COALITION – FA’ATULA’IA LATOU TOFIGA FOU 2020-2021:

O le aso Faraile na te’a sa fono ai le Komisi a le Tobacco/Diabetes a le Matagaluega o le Soifua Maloloina ma ua latou fa’atula’ia ai latou tofiga mo le laulauafono fou e galulue i lenei tausaga ua savalia, 2020-2021. Na faia lea fonotaga i le Maoana o Sina ma sa fa’atasia uma i ai fo’i a latou pa’aga galulue, lea sa latou soofa’atasi ma tapena le Tulafono ua mae’a fa’amalosia nei e taofia ai le ulaula tapa’a o so’o se ituaiga i nofoaga faitele, luga o ta’avale la’u pasese ma ua aofia ai ma fale fa’atali pasi.

Peita’i, talu mai le tausaga 2018, ua mae’a ai ona tapena ni toe teuteuga o lenei Tulafono e fa’asa ai le ulaula tapa’a i nofoaga faitele ma a’afia ai le soifua o nisi e le ulaula ona o le asu mai sikaleti. O nei suiga ua manatu ina ia ave fa’apoloa’iga fa’alaua’itele a le Kovana a le tatou Malo, ma o lo’o fa’apea la ona taoto ai lea taumafaiga, ua tatalia pea le sainia e Kovana Lolo Moliga ina ia fa’amalosia fa’alaua’itele ai.

I le fonotaga o lenei tolu masina ua tuana’i, ua toe fa’afofogaina ai e sui iloga uma o lea Komisi, pitola’au ma sao o pa’aga ta’itasi o lo’o fa’atino mo le faatinoga o galuega fai a le Koalisi.

O nei pa’aga e aofia ai le DPS mo le fa’amalosia o le Tulafono ma molia nisi ua solituina lea Tulafono; le vaega a le MCH a le DOH, o tautua eseese mo tina ma fanauiti ua ofoina mai e le Matagaluega o le Soifua Maloloina; DHSS le matagaluega fo’i latou te galulue fa’atasi ina ia mataituina le soifua maloloina ma le tausiga lelei o tagata uma e ala i mea’ai paleni, ma le tausiga lelei o latou soifua laulelei i o latou aiga e aunoa ma le ulaula poo nisi lava ituaiga o fuala’au fa’asaina ma vaila’au o’ona.

Le vaega a le Land Grant i le Kolisi Tuufa’atasi o i latou e fa’amalosia mai le agaga o e faifa’atoaga ina ia to’a’aga e toto fa’aeleeleaga inau a tagolima le atunuu, ma tausasami i latou lava i fua o fa’aeleeleaga na latou totoina. O le isi fa’amalosi ua lipotia mai e Autagavaia Albert Peters, o lo ua fa’amalosia tagata ia faia togala’au o fuala’au ‘aina mata ina ia le toe to’atele e maua ile ma’i suka.

O lo ua galulue malosi fo’i le vaega o fa’amaumauga o fa’ama’i pipisi ma isi uma e ono a’afia ai le mamalu o le atunuu ua mae’a maua i le ma’i suka ma ma’i fatu. Lea fo’i na latou fa’ailoa ai le latou matafaioi e fa’atino i lea komisi. 

Na fofogaina fo’i le lipoti o fa’ama’i pipisi ma ua latou fiafia e fa’aalia, “E ui ina faigata i nisi taimi le taofiofi mamau i le fa’asa, ae o lo’o ausia pea lava le sini poo le mau a le DOH, ia taofia le ulufale mai o le Coronavirus i le atunuu.”

O le isi itu malosi o lo’o galulue fa’atasi pea ma le Koalisi e Tete’e i le Ulaula, o le vaega lea a le Ma’i Suka, O i latou nei e galulue fa’atasi i lea koalisi ina ia mautinoa ua matua fesoasoani i tagata uma ia le maua i lea gasegase, aua e te maua ai loa e tumau. O Loata Sipili o lo’o fa’auluulu i ai lea auaunaga ma o ia lava fo’i ua matele ina 

Ua soso’o fa’atasi fo’i galuega uma a le Koalisi lenei ma le itu tau suesuega o le gasegase o le Kanesa o so’o se ituaiga i tina ma tamaitai fa’apea ma ali’i i totonu o le tatou falema’i tele, ma le matagaluega fo’i o le Soifua Maloloina. O le taumafaiga lenei, ia matua vave ona maua i latou ua a’afia i le Kanesa ma amata loa togafitiga e lavea’ia mai ai i latou. 

O mataupu na fa’atulaga mo le fonotaga lea a le Koalisi o le Ulaula Tapa’a ma le Gasegase o le Suka a le Matagaluega o le Soifua Maloloina, sa muamua ai ona fa’alauiloa mai le latou Laulauafono fou e galulue i lenei tausaga 2020-21. 

Lea ua tofia ai nei le susuga Meauta Mageo o le Taitaifono, Sui Taitaifono ua tula’i mai ai Clarence Crichton, le Teutupe ua nofoia lea e Ropeti Lesa ma le tofiga Failautusi ua tula’i mai ai Leua Aiono.

I le fonotaga fo’i lea ua suia ai le Loia fou mai le ofisa o le Loia sili ale tatou Malo, e se’ei i lea lava fo’i komisi. Ua i ai nei le tamaitai Loia mai Niu Ioka ua tau’avea mataupu a lea Komisi, Julia Furlong. “O le a ou taumafai ina ia fa’amae’a nisi o galuega e le’i fa’ataunuuina a le tatou Koalisi nei, ina ia mautinoa ua mae’a fa’aulu suiga toe teuteu o le Tulafono e fa’asa ai ulaula i nofoaga faitele  lalo o faleie ma isi nofoaga e le o i totonu o se fale poo se pa puipui. O se Tulafono matagofie tele lenei, ma e fa’afetaia fo’i le galulue maumauai o nisi sui loia sa fa’aaogaina e le Koalisi lenei muamua.”

TOE TATALA FAITOTO’A O FALETIFAGA I LE NUUULI PLACE AUKUSO 21, 2020:

O le afiafi o le aso Faraile na te’a nei sa fa’ato’a toe va’aia ai le fa’alauiloaina mai o ata tifaga fou ua fa’alauiloa i lumafale o le fale tifaga i le Nuuuli Place ma sa va’aia le fiafia o nisi ua toe tatalaina lea tautua.

O le toe po lava na tatala ai le faletifaga lenei a’o le’i amatalia le fa’asa mo le Covid-19, o le afiafi o Mati 16, 2020, ma sa to’atele lava i latou na fia talosia ia toe tatala vave lea tautua, e tau maua ai fo’i se isi mea e aga’i i ai, aua ua umi o nofofale le fanau talavou. Peita’i o lea fa’ato’a mautinoa fo’i e lea pulega, ua alagatatau ona tatalaina le latou auaunaga, ia usita’ia ai lava aiaiga o le fa’asa o lo’o fa’amalosia i le atunuu ona o le fa’ama’i pipisi o le Coid-19.

Ua fa’ailoa mai e le pulega le susuga Isala Pa’u’u, “O le toe tatala ai o faitoto’a o lenei tautua mo le mamalu lautele, ua faia lava ae ua i ai fo’i ona tamau e ao ina usita’ia, ona o aiaiga o le fa’asa o le Covid-19. Ua mafai ona maimoaina e le na’o le 42 lava tagata e nonofo valavala fo’i i totonu o le faletifaga e tasi, aua o aiaiga lea ua tuuina mai. O le to’atele e Masani ona fa’atumulia ai nofoa uma o le faletifaga a’o le’i fa’amalosia le Covid-19 o le 140 tagata”

Ua fa’ailoa mai e le pulega, “I le taimi na tapunia ai le tautua ona o le Covid-19, ua toe fa’aola atu se tasi o masini vili ata ua le ola, o lo’o mana’omia la se galuega toe fa’aleleia o lea masini vili ata ma e to’ai taunuu mai totoga o lo’o okaina i le va’alele a le Cargo i le afiafi lava o le aso Faraile na te’a nei.”

O le a fa’atautaia uma potu tifaga e lua, pe a mae’a ona toe fa’aleleia le isi masini vili ata lea o lo’o mana’omia ona lipea.Ua na’o le to’afitu fo’I latou tagata faigaluega ua fa’atulaga mo lenei toe tatala o le tautua, sei vagana ua toe tatala ma fa’aaliga I le isi potu lona lua o le tatou faletifaga. 

O le isi lea pisinisi na matua tapunia motu lava le tautua talu ai le Covid-19, ma ua alagatatau fo’i ona tagata faigaluega ona maua le alagatupe mo le PUA pe afai o le aufaigaluega o tagata sitiseni ma nesionale o Amerika po’o i latou fo’i o galulue ae ua i ai Green Card.

E to’a 10 lava tagata faigaluega a lea fo’I pisinisi i le tatou nei malo i le taimi na tapunia ai faitoto’a ona o le Covid-19.