Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA

 

TAOFIA LE TUMAU AUMAIA FETILAISA - IULAI1 - TESEMA 1, 2020

 

Ua taofia le tumau le toe fa’aulu maia o ni fa’alelei eleele i Amerika Samoa mai ia Iulai 1 e o’o atu ia Tesema 2020, e tusa ai ma se fa’atonuga tusitusia a Kovana Lolo Matalasi Moliga. 

 

I lea vaitau atoa ua taofia ai so’o se ituaiga o fetilaisa mai le ulufale mai i le atunuu, ua faatulaga ai se suesuega auiliili a le ASEPA e tusa o le a’afiaga o le eleele ma le soifua lautele o le atunuu, e afua ona o fetilaisa po’o fa’alelei eleele.

 

Fa’ailoa e le kovana i lana poloaiga, “O fetilaisa ua so’ona fa’aaoga ina ia lelei le eleele mo fa’ato’aga, ua oo mai ina toe fa’aleagaina ai le soifua maloloina o tagata lautele o le atunuu, ona ua le fuafua tatau le fa’aaogaina, ae ua soona fai. Ua matele ina fa’ateleina ai le sapalai o le nitrogen ma le phosphorus ua toe oo i le suavai o lo’o pamu a’e mo le fofoga taumafa.”

 

“Ua silafia e le Malo o Amerika Samoa ua so’ona fa’aulufale mai lava le tele o fa’alelei eleele ma ua le va’aia toto’a le fa’aaogaina tatau o nei fa’alelei eleele i fa’ato’aga i le atunuu. Ua so’ona tuu atu lava i le faitalia o le faifa’ato’aga ae ua le taua’aoina ni fa’atonuga o le fa’aaogaina o nei fa’alelei eleele, ma le tele fo’i e ao ina fa’aaogaina i taimi e lulu ai.”

 

O le ala lava latou sa sau a’i le totoina o fa’ato’aga ma le fa’aolaola maia ia fua lelei, o le a le taofia ma ua taumafai atili le tatou malo e toe fa’afo’i i ai le gagauina o le vao. Peita’i, ua fa’atula’ia fo’i se Komiti Fa’apitoa o le Nutrients Management Committee ina ia latou mata’i ma fa’amalosia le so’ona fa’aaoga o fa’alelei eleele ina ia tumau pea le paleni o le eleele e olaola lelei ai tatou fa’aeleeleaga, po’o le ma’umaga se’ia oo i togafa’i se’ia oo i fuala’au ‘aina mata ma fuala’au aina e fa’avela.

 

“O le komiti o le a latou nafa ma le tu’ufa’atasia o se fuafuaga fa’ataoto mo le fa’aaoga tatau o fetilaisa mai fafo, le toe fa’afo’i o faifa’ato’aga e fa’aaoga faiga sa o mai ai tatou tua’a ua mavae, ma ia aluga lelei mea uma, ia lelei le suavai e pamu a’e i le eleele o Amerika Samoa mo le fofoga taumafa o ona tagata.”

 

“O le komiti fa’afoe lava lea e tasi, e latou e tusia ma aiaia maia se tulafonp tau fa’aulu a le faigamalo, e fa’ataoto ai lea fuafuaga tamau mo le fa’aaogaina o faalelei eleele i fa’ato’aga o so’o se ituaiga i totonu o le atunuu,” o se vaega lea o le fa’atonuga tusitusia a le kovana. 

 

O lenei komiti tofia ua fa’atulaga e ta’ita’ia lea e le ali’i fa’atonu o fa’ato’aga fa’atasi ai ma le ali’i fa’atonu o le ASEPA, ma sui tofia mai le Kolisi i lona vaega o Tautua Eseese mo le Laufanua po’o le Land Grant, Ofisa o Tuite, Ofisa of Mataupu Tau Samoa, ma le Ofisa o le Loia Sili.

 

FA’AAUAU TAOFIA MALAGA HAWAIIAN AIR O’O IA AUKUSO 31

 

Ona o lo’o va’aia pea i fa’amaumauga ua aga’i pea i luga le aofai o i latou ua maua i le fa’ama’i pipisi o le Coronavirus i Amerika, ae maise Hawaii, o lea ua toe talosagaina ai e Kovana Lolo Moliga le fa’asa o femalaga’iga i le va o Honolulu ma Pago Pago a le Hawaiian Airlines se’ia oo ia Aukuso 31. 

 

I lo’o lipotia e le Matagaluega o le Soifua Maloloina a Hawaii le silia ma le 1,200 i latou ua maua i le COVID-19 ae 24 i latou ua maliliu i lea setete.

 

I le tusi a Kovana Lolo Moliga i le peresetene o le Hawaiian Air ma le latou CEO i Hawaii, Peter Ingram, sa fa’ailoa atu ai e Kovana Lolo lona agaga fa’afetai tele i le tele o tausaga o lo’o tula’i mai pea le Hawaiian Air e tali mana’oga o Amerika Samoa e ala i femalaga’iga i le ea.

 

E ui lava fo’i ina fitaituga le auaunaga i lenei vaitau ona o le sofa’i mai o le Coronavirus i atunuu uma o le lalolagi, ua fa’ailoa lava le agalelei o le Kamupani i lo latou talia mai o se fanoga ina ia taofia femalaga’iga ona ole taga’i ile soifua ma’ale’ale o Amerika Samoa, ma ua mafua ai pea ona saogalemu lenei teritori mai lea fa’ama’i. Peita’i ua va’aia le si’i maualuga o le aofai o tagata e a’afia i le setete o Hawaii ma isi fo’i setete tetele i Amerika ona ua fa’amatu’u ese nisi vaega o le fa’asa e o latou ta’ita’i.

 

“Ona ua matauina le si’itia pea o le aofai o i latou e a’afia i Hawaii ma isi setete uma, o lea ua ou manatu ai, ina ia taofia pea femalagaiga i lp tatou va se’ia oo i le toe aso o Aukuso 2020. Ou te mautinoa e le taugalemu lea fa’aiuga i nisi o lo’u malo o lo’o taofia ai i Hawaii ma isi setete uma o Amerika ona ua toe fia fo’i mai. Peita’i o se matua fa’afetaia lou talia mai o lenei fanoga taua ia Amerika Samoa ma ona tagata.”

 

Ua fa’afetaia fo’i e Kovana Lolo le talia maia e Ingram o le malaga mai o le latou va’alele ina ia avatua ai le malaga togipau a le Medicaid Office mo tagata gasegase o Amerika Samoa e fia togafitia i Hawaii, atoa ai ma nisi o lo’o taofia fo’i iinei, ua tatau ona toe taliu atu i Hawaii.

 

(O le po nanei e fa’atauu’uina ai le malaga togipau lea a le malo o Amerika Samoa e totogia e le Medicaid Office mo i latou e malaga i Hawaii.)

 

“Fa’afetai tele ina ua e taliaina lenei talosaga ma lou agaga alofa ina ia fa’atumauina le soifua laulelei o tagata o Amerika Samoa mai lenei fa’ama’i pipisi,” o se toe upu lea o le tusi a Kovana Lolo i le Hawaiian Air. 

 

O le tusi lenei a Kovana Lolo na fa’alauiloa ina ua talosagaina e le  Hawaiian Air se latou avanoa e fa’ataunu’u ai le tautuaina o lea mana’oga tupito o Amerika Samoa e tautuaina ai ona tagatanuu o fa’agasegasea e ala i ma’i tuga o le tino, ma ua fa’alautele ai le latou laisene ina ia mafai ona tautuaina Amerika Samoa i malaga togipau mo pasese mai le matagaluega o le USDOT. O lo ua talia lea talosaga se’ia oo ia Iulai 31, 2020 mo le Hawaiian Air, peita’i o nisi suiga i lea talosaga e fa’ato’a toe maua mai i se isi taimi o lumana’i.

 

E ui lava ina tele ni vala’au i le Ofisa o le Kovana ona o i latou e fia taliu mai i aiga, ae ua toe fa’amauina fo’i le fa’asa e fa’ato’a toe iloiloa lea ia Aukuso 31, 2020. Na taofia mai malaga nei a le Hawaiian Air mai ia Mati 26, 2020.