Pago Pago, AMERIKA SAMOA - 

69 ‘AU FA’AU’U A’OGA MAUALUGA MATATA ESEESE - NUUULI VOC-TECH HIGH

O se fa’au’uga uiga ese na fa’atulaga ma fa’ataunuu i le Aoga Maualuga Matata Eseese (Nu’uuli Voc-Tec High) i le taeao o le aso Lua na te’a nei. Na fa’atulaga ai le polokalama e amatalia lava i le savalia e le fanau o le latou ala fa’apitoa ua tapena, e amata i le fa’aulaga o i latou, soso’o ai le pu’ega o latou ata ae fa’ama’ea i le taua’aoina o latou fa’ailoga fa’apitoa ma oo ane ai e savalia le latou Kapeta lanumumu.

I le fa’asologa o le vasega fa’au’u na oo ane ai i le atali’i o le ali’i Tineiafi ua maliu a’o fa’atino tiute, Capt. Mike Tipoti, le ali’i talavou o Malachi C. G Tipoti, ma sa matua tau le mafai ona savali atu o ia e taua’aoina ona fa’ailoga i le tagi. Na savali lava o ia ma le fa’ailo o si ona tama, ae ua fa’ae’e uma pu a le vaega a le Tineiafi a le Matagaluega o le Puipuiga o le Saogalemu Lautele i lea taimi atoa, e fa’ailo ai le tautua a lona tua’a ua tu’ua fa’afuase’ia ai le mafutaga mafana i le aiga, ae maise fo’i i le atalii ma lona fa’amoemoe.

Na tutula’i sui o le vaega a le Tineiafi ina ia latou taua’aoina nisi o latou fa’aulaga ua tapena mo le atalii fa’au’u, ma o se mea na fa’afiafiaina ai fo’i o ia i lea taimi.

Na i ai se taimi nofo filemu ai mea uma ae talosia le ootiaga o lo’o feagai ai ma lea atali’i, le tina ma le aiga, ona o le tu’ua fa’afuase’ia o le mafutaga a le tama, ua le aulia ai lenei aso fa’amoemoeina o Malachi.

I le taua’aoina ai o tusi pasi, o le togisilia o le tamaitai o Peralina Terry Mose ma le tamaitai tulaga lua o Ivoga Sefika. O le sui fa’au’u ua ausia le togisilia i le SAT o Varina Miracle Va’a ma le sui ua avea le Tama Togisilia i le Matata Eseese ua maua lea e Joe Faipule Savaii.

O le sui tamaitai o le vasega fa’auu ua mauaina le Tamaitai Togisilia o Ivoga Sefika ma le Tama Ta’alo Lelei o Nathaniel Fosi Maea ma le tamaitai Ta’alo lelei o Charity Leama.

I le mae’a ai ona taua’aoina o fa’ailoga ma tusi pasi, na toe pikia i latou uma i le fa’asologa o latou ta’avale mai luma o le faleie i totonu o le lotoa sa latou alaalata’i ai.

FA’ATELEINA CORONAVIRUS I HAWAII - FA’ALETONU FUAFUAGA MALAGA

Ona o le toe oso i luga o le faitau aofai o i latou ua maua i le Coronavirus i le setete o Hawaii ua toe talanoaina ai e le Komiti Fa’afoe o le Coronavirus a le tatou malo  ma le afioga le Kovana, ailoga o le a fa’ataunuu ona faia se malaga mai a le Hawaiian Air i le amataga o le masina o Iulai, 2020.

O lea mataupu sa talanoaina i le fonotaga i le aso Sa ua te’a, lea sa tima’i ai Lolo Matagaluega o le Soifua Maloloina, ia matua tulimata’ia lava le suiga o le pipisi o le fa’ama’i lea i Hawaii ina ia faia fuafua tatau i ai le toe tatala o femalag’aiga i le tatou va.

O le lipoti mulimuli fo’i ua fa’ailoa mai  e tusa o le toe aumaia o tatou tagata mai  Samoa ua fa’ailoa ai na amatalia lea i le aoauli ananafi, ma o lea fuafuaga o lo’o fa’atautaia mai e le Samoa Airways ma le Talofa Airways. 

Ua saunia fo’i nisi o lo’o ua fia fo’i i Samoa e malaga ai i le toe fo’i o nei va’alele i Samoa. O nisi o i latou nei o loo umia lava latou pepa malaga mai le tele o masina o fa’atalia se avanoa e toe fo’i ai i Samoa. O i latou nei o lo ua fa’ailoa mai e Toe Loia o le Samoa Airways e vala’au atu i le latou Ofisa i le Malae Va’alele, poo maua so latou avanoa e malaga ai i nei malaga e sau a va’alele e fa’afo’i mai tagatanuu Amerika Samoa.

O nei avanoa o le a fa’aavanoa lava na’o i latou ua toe fia fo’i, ae o le a le malaga ai se tasi e alu ona o se fa’alavelave poo isi mea fa’apena. Ua fa’ailoa mai fo’i o le taimi lava e uma mai ai pasese o e o Amerika Samoa o lo’o talosaga mai e fia fo’i mai, o le taimi fo’i lea e le toe fa’aauauina ai nei malaga i Samoa.

O le ala lea o le le mafai ona malaga ai nisi o fia o i ni fa’alavelave, aua e le toe malaga nisi va’alele e aumaia nisi tagata mai Samoa mulimuli ane, e muta ai lava i nei malaga e tolu ua tapena nei mo i latou o lo’o taofia i Samoa ona o le fa’asa.

Ua fa’amaonia mai fo’i e le  Talofa Aiways o lo ua i ai fo’i le latou malaga ua fa’atulaga e aumaia ai nisi o tagata Amerika Samoa mai le malo tuto’atasi  ma ua i ai fo’i latou malaga mai i Amerika Samoa mo Samoa.

FA’AMALOSIA AUMAGA TULAFONO O LE FA’ASA I AFIO’AGA

Ua fa’ailoa mai ua tu’u atu nei se sao i le vasega o aumaga uma i afio’aga ima ia latou fa’amamaluina tulafono uma o le fa’asa e pei ona fa’amalosia mai nei e le Malo, ma o se fesoasoani fo’i i le vasega o Leoleo a le malo, lea o lo’o nafa nei ma lea tulaga i totonu o afio’aga ma so’o se vaipanoa o le atunuu, latou te va’aia ai ua solituina tulafono o le fa’asa ona o le Coronavirus.

Ua le gata la i tulafono fa’amamaluina o le fa’asa o le Coronavirus, ae ua fa’apea fo’i ona fa’amamaluina e i latou ma tulafono uma tau le tagofia o fuala’au fa’asaina ma vaila’au oona i totonu o latou nuu ta’itasi.Pau le latou vaega ia lipotia mai nei faiga fa’asolitulafono ona oo atu lea o Leoleo a le malo e fa’amalosia a’ia’i la’asaga mulimuli mai o le fa’ao’o i le tulafono o nei faiga i latou afio’aga.

Ua fa’ailoa e le Komesina o leoleo Le’i Sonny Thompson, i lana saunoaga i le Komiti Fa’afoe a le Coronavirus, ua mae’a fa’atulaga fo’i fonotaga fa’atasi a ta’ita’i o aumaga a afio’aga tetele e aofia ai Nuuuli, Pago Pago, Leone, Faleniu ma Mesepa i le aso Gafua ina ia talanoaina ai nei suiga o le tautua o le a latou faia.

Ua toe fa’amanatu atu e Kovana Lolo Moliga i le mamalu o lea lava fonotaga, “Ia manatua e ao ina fa’ataunuu uma lava isi faiva uma e le aumaga, ia leoleoina latou afio’aga ia mautu le saogalemu o tagata uma ma pisinisi o fa’atautaia ai i taimi uma mai so’o se ituaiga o soligatulafono e a’afia ai.”

Ua ia saunoa fo’i e tusa o se amataga fou ua faia nei i totonu o Vaitogi ma Fagasa, ua toe fa’amamalu atili ai le faiganuu ma ua tele se sao o le Aumaga i Leoleoga o latou afio’aga ua fa’amalosia fa’atasi atu ai.

Ua toe fa’amanatu fo’i e le kovana, “Manatua aso ua tuna’i a’o le’i fa’atula’ia mai le vasega o Leoleo, o le saogalemu lava o afioaga Samoa latou e nafa ma aumaga.”

Sa ia saunoa foi, e tatau ona fai se sao o le US Army Reserve i le taumafaiga e malu puipuia le atunuu i le fa’asa o fa’amamaluina ae maise lava i le Malae Va’alele. Peita’i ua fa’ailoa i le saunoaga a le Komesina o Leoleo, ua fa’ailoa mai e le Taitai o le USArmy Reserve ua le fa’atagaina le vaega o fitafita fa’aagaaga mo tofiga nei i le taimi nei.

E tusa ai ma se manatu faaalia o le kovana, o le afuaga lea ona fa’atula’ia o le USArmy Reserve i le tatou teritori nei, ina ia mafai ona fesoasoani i le fa’amalosiga o tulafono e puipuia ai le saogalemu lautele o le atunuu.