Ads by Google Ads by Google

Tala I Vaifanua


[ata: SN]

Pago Pago, AMERIKA SAMOA - 

 

VA’ALELE US NAVY MALAGA ESE MA LE 46 PASESE

 

O le aso Lua o le vaiaso lenei sa taunu’u ai i le malae va’alele i Tafuna le va’alele a la US Navy ma lana pasese e to’alima e aofia ai le faipule o Amerika Samoa i le Konekeresi, Aumua Amata, sui e toatasi o le FEMA, ma le au faigaluega a le militeri.  O lea malaga sa fa’atulagaina e le FEMA.

 

O le pasese na malaga mai sa ave’esea sa’o atu lava e le Matagaluega o le Puipuiga o le Soifua Maloloina o le tatou malo, ma ua tatou iloa lelei fo’i, o lo ua fa’atino o latou tiute tau le puipuiga malu o le atunuu mai le fa’ama’i o le Coronavirus. Ua le uia mai e i latou uma na malaga mai e to’alima le ala e masani ai ona kilia mai ai le pasese i le malae va’alele. 

 

E na’o le tasi lava le itula na tu ai ae toe masi’i ese atu i lana malaga toe fo’i, ma le to’a 46 o le pasese e aofia ai le to’a 26 o i latou ua malaga i fafo mo talavai ma sui e tausia i latou, sui o le militeri ma sui foi o le FEMA sa faigaluega iinei, fa’atasi ai ma se aiga Samoa e nonofo i Alaska. 

 

Fa’ailoa e Aumua, “Ua ou fiafia tele ua ou oo mai i le tatou atunuu, e fa’afetaia ai le Atua ona o lenei avanoa lelei ua ou maua ou te oo mai ai e fa’atasi ma outou a’o tatou lutia ai i le fa’asa ina ia tete’e ese atu le Coronvirus mai le tatou teritori.” 

 

“O le fa’afetai ia Kovana Lolo Moliga, ona o lona tu malosi e fa’atautaia le fa’asa lenei, fa’atasi ai ma le Komiti Fa’afoe na fili fa’apitoa mo tiute nei e fa’atino uma, ia tete’e pea le Coronavirus mai le ulufale mai i o tatou motu laiti. Ua le gata i lana Komiti Fa’afoe ae ua ia tofia fo’i ma le Komiti Galulue mo lea laa fa’amoemoe lelei.”

 

“Ua ou iloa lelei le tatou atunuu, e ui lava ina sa’i ae ua outou lava papale ma usita’i i aiaiga uma o le fa’asa, ua tele mea e masani ai i tatou ona fai, ua taofia uma, ona o le naunau e galulue fa’atasi ma tatou ta’ita’i, ia saogalemu Amerika Samoa mai le fa’ama’i pipisi ma e vave tele ona oo mai ai le oti.”

 

“Ua va’aia fo’i le toe fo’i vave mai o le fiafia o le tatou atunuu e toe fa’atasi ina ua tatala nisi o aiaiga o le fa’asa. Ua fa’apea fo’i ona toe amatalia ona tau toe fa’afo’i Amerika atoa i le mea sa masani ai, ae ua itiiti lava se avanoa ua tatala lemu ai mea uma mo tagata lautele i le taimi nei, ae ua va’aia le agaga fa’afetai mo nei avanoa.”

 

“Ou te iloa fo’i o lo’o to’atele nisi o si o tatou atunuu a oti i le fia oo mai i le tatou atunuu ma aiga, peitai ua onosa’ia nei lagona uma, se’i fai se sao matagofie i le taumafaiga e tete’e pea le fa’ama’i, aua lava ne’i lutia ai le atunuu ma o latou pelega uma o alaalata’i ai.”

 

“E ui ina ua ou maua lenei avanoa ou te oo mai ai i le tatou atunuu, ae ou te lagonaina, o se mea fo’i lea o momo’o i ai le to’atele o tatalia le toe tatala o femalaga’iga, ina ia oo mai ma le manuia i le malu o latou aiga i Samoa nei.”

 

“Ona o le popolega lava ina ia mautinoa o lo’o o’u malaga mai ma le manuia e le o maua i lenei fa’ama’i pipisi, ina ne’i lutia le atunuu ona o lo’u naunau e fia oo mai, sa faia ai a’u suega e lima a’o le’i tu’ua le Laumua. O taimi uma lava e faia ai lenei suega, e tali mai lava i le tali fiafia, e le o maua i le Covid-19. Ou te matua fa’ailoa atu ia Amerika Samoa le atunuu pele, Ou te matua sapaia lava le fa’asa o lo’o fa’amamaluina nei i le tatou atunuu ona o le taumafaiga atili, ia le ulufale mai le Coronavirus i o tatou laufanua, ma a’afia ai nisi e to’atele o tatou pelega.”

 

“Ua fa’atulaga lenei taimi avanoa i fonotaga fai i le Konekeresi e le Fofoga fetalai o Pelosi, ina ia fo’i mai ai sui faipule i o latou itumalo, e asia i latou ma soo tau’au ma ta’ita’i i le fa’amoemoe lelei, ia tineia le coronavirus i totonu o Amerika. O le to’atele o sui faipule ua leva ona oo i latou aua e na’o sina umi lava e tietie ta’avale poo va’alele ai oo, peita’i o lea ua fa’ato’a tulaueleele la outou auauna fa’atauva’a i o tatou laufanua lafulemu ma le mama mai le Coronavirus.”

 

“Fa’afetai i le Pulega a le FEMA mo le avanoa o le latou va’alele na malaga fa’apitoa mai mo latou galuega fai, ua maua ai so’u avanoa e oo mai ai. I latou uma sa galulue ia maua lenei avanoa mo lo’u sui fa’atauva’a, fa’afetai ua maua ma ua ou fiafia e oo mai i Amerika Samoa a’o tatou fusu e tete’e atu i le Covid-19. O le fa’afetai e ao ina sii lava i le Atua, ua taulau o le fa’amoemoe.”

 

ALAMANUIA MO TAGATA FAIGALUEGA - E LE MO TAGATA UMA

 

O le to’atele ua a’afia galuega ona o le Coronavirus, ua mautinoa e le o aofia i e maua fa’amanuiaga poo le alamanuia ua mae’a toina mai mo tarata faigaluega na vaea, fa’aitiitia itula faigaluega, pe tapunia fo’i latou ofisa faigaluega ma ua leai ai ni avanoa e faigaluega ona o le fa’asa o le Coronavirus.

 

O loo aofia fa’atasi le Malo ma Kamupani i lenei alamanuia, peita’i ona o le aiaiga tau le tagatauu ua le mafai ai ona agava’a le to’atele o i latou i nei alamanuia.

I lalo o tulafono a le fetarale mo ia manuia, ua na o Sitiseni o Amerika, Nationale o Amerika, ma tagata nofo mau i Amerika e agava’a.  E le agavaa tagata mai fafo o lo’o nofo mau i Amerika Samoa. 

 

O le to’atele o i latou nei sa le mafai ona agava’a, ua lagona e i latou le tulaga ua fa’aituau lenei penefiti ma ua latou sailia ai le fesoasoani a le Faipule o Amerika Samoa i le Konekeresi, se’i ona toe fa’apupula atili le agavaa mo nei penefiti. 

 

O nisi sa auai i laina mo le talosagaina o nei penefiti, ua fa’ailoa mai, “Sa manatu lava o se ala lenei e mafai ona totogia ai nisi o ata nogatupe ua fa’afuase’ia lava ona le toe mafai ona ua tapunia nei avanoa faigaluega, peita’i o lo ua le agava’a ona o ita fo’i e sau mai le motu o Samoa.”