Tala I Vaifanua
FA’AU’UGA VASEGA FA’AIUASO MANUMALO ACADEMY
E to’a 12 le vasega fa’aiuaso a le Manumalo Academy i le fa’aiuga o lenei tausaga aoga, ma na fa’ataunuuina le fa’au’uga i le taeao o le aso Faraile ua te’a.
Na taitaia le sauniga e le fa’atonu o le A’oga i Manumalo Papali’i Lauli’i Alofa ma sa matagofie fo’i ma lana tautalaga na fa’afofogaina e una’ia ai le fa’amoemoe o le fanau e fa’aauau ona tausailia le atamai i avanoa ua latou maua e faaauau ai latou aoaoga maualuluga.
“Aua ne’i avea outou ma nisi e ulagia, ia avea oe ma se fa’ataitaiga lelei i nisi,” o se vaega lea o le saunoaga a Papali’i.
Evelini Vaiosina Sauni, na ausia e ia le togisilia i le teritori i le Suega o le ACT 31, ma le togisilia i le SAT 1400 ma ua maua fo’i e ia le tulaga lua i lona sikoa lea i le teritori atoa. O ia o le alo tamaitai e faasino ia Nuuausala ma Telesia Suani. O ia fo’i lenei o le Peresetene o le NHS i Manumalo. O lana GPA i ana mataupu uma na tau’ave e 3.99.
Tulaga lua i le vasega fa’aiuaso o Philip Jing Fu Liang, o se alo e fa’asino ia Guo Jung Liang ma Hong Ying Li. Ua ia ausia togi e 23 i le lana suega o le ACT ma togi e 1250 i lana suega o le SAT. O ia lenei o lo’o togisilia i lana poloketi na fa’atino mo le Fa’asaeanisi i le Vaega a e Physics ma ua avea fo’i ma sa aofia foi i le to’a sefulu maualuluga togi a latou galuega fa’atino fa’asaeanisi i le tausaga 2018. O ia fo’i o le totino o le NHS a le Manumalo Academy.
O Fetoloa’i Oliana Jueta Makalili Fua, o se alo e fa’asino ia Roy Alo Fua ma Kathryn Michelle Fua na ausia e ia togi i le ACT 19, ma le suega SAT e 1050. O ia o le sui o le NHS mai le tausaga 2019 - 2020; na auai fo’i i le GIS Day 2019 ma le auai i le fa’aaliga o Galuega Fa’atino Fa’asaeanisi ma le tauvaga a le National History Day.
O Dorvida Fonoifafo Gretalei Fuiava o le alo e fa’asino ia Seiuli Michael ma Dorothy Fuiava. Na ausia e ia le sikoa i le ACT 19 ma le Suega SAT 1160. O ia lenei o se tasi o fanau aoga a le teritori ua ausia togi e mafai ai ona ulufale i le United States Air Force Academy Prepatory.
O Jodesy Salamasina Sabrina Fuiava o se alo e fa’asino i le tamaitai o June Fuiava. O ia o se sui totino o le National Honor Society i le Laumua i Manumalo mai le 2019-2020. Ua ausia e ia togi ACT 16 ma le SAT 1110. Na tulaga lua o ia i le Islandwide Science Fair i le vaega a le Botany i lona toe tausaga i le a’oga i Manumalo.
O Marcus Benett Howard, o se alo e fa’asino ia Muniava Josefa Howard ma Mrs Bethel Muasau-Howard ma ua fa’au’u nei o ia ma ona togi i le ACT e 19 ma le SAT e 1000. Ua auai o ia i le lisi a le latou pule a’oga talu mai le level 10, 11 ma le 12. O lenei ali’i e matua lelei i ta’aloga ma ava o ia ma Junior Varsity ASHSAA 2017; ASHSAA Basketball 2018-2019 ma ua taua’aoina fo’i ia te ia le Fa’ailoga fa’apitoa mo le tama ta’alo lelei i le tausaga 2018 ma le 2019. Auai i le National. History Day ma le GIS day 2019.
O Lynell Lemala Mareko o se alo e fa’asino ia Linfield Mareko ma Gace Tulafono-Asi. O le totino fo’i o le NHS ma le lisi a le Pule Aoga i Manumalo Academy talu mai le tausaga 10, 11 ma le 12 o ana aoaoga i a laumua. Ua ausia e ia togi ACT 22 ma le SAT e 1230.
O Cherinalei Tilau Simanu o se alo e fa’asino ia Solomona ma Christina Simanu, ua fa’auu o ia ma ona togi ACT 19 ma le SAT 1050. O ia o le totino o le National Honor Society ma le Lisi a le Pule A’oga i le Manumalo Academy talu mai lona tausaga 9, 10, 11 & 12.
O Kutori Tamiano Temese o se alo o Semurana ma Rosa Temese ua fa’au’u o ia ma togi i le suega ACT 18 ma le SAT e 1080. O ia fo’i o le totino o le NHS a le Manumalo Academy ma o se sui i le lisi a le Pule Aoga mai le tausaga 9 se’ia pa’ia le 12 i Manumalo lava.
O Isaia Valentino Togia, o se alo e fa’asino ia Alofa ma Frances Togia. Ua fa’au’u nei o ia ma ona togi i suega a le ACT 26; ma le SAT e 1360. O ia se tamaititi ta’alo lelei ma ua avea o ia ma tama ta’alo a le ASHSAA Basketball 2018-2019. O ia fo’i o le totino o le NHS i le Manumalo Academy sa avea o se totino i le Lisi a le Pule A’oga mai le tausaga 10, 11 ma le 12 i lea lava Laumua.
O William Wei-Lin Zhu o se alo e fa’asino ia Jingi & Ye Qiong Liang ma ua fa’auu o ia ma togi i ana suega ACT 16 ma le SAT 1020. Na i ai lona igoa i le lisi a le Pule Aoga i Manumalo Academy i lona tausaga 10 ma le tausaga 12 o ana aoaoga i lea Laumua. O ia fo’i o se totino o le Varsity Basketball 2018-2019.
I le sauniga o le fa’auuga sa auai atu fo’i le afioga le Lutena Kovana Lemanu Peleti Mauga i lea sauniga ma molimauina ai le matagofie ma le puupuu o le latou polokalama na fa’atino ma e le’i taitai fo’i atoa le 150 o le faitau aofai o tagata na auai.
“Aua o a’u nei, ua ou iloa manatu ua ou manatu ai ia te outou, o manatu i le manuia, ae le o le malaia, o loo fetalai mai ai Ieova, e foa’iina atu ia te outou le iuga e i ai le fa’amoemoe.” Ieremia 29:11.
SAVALI FA’AALOALO E TAUALOA LE SOIFUA O ALI’I TINEAFI UA MALILIU
Na vala’auina le mamalu o pelega ma aiga o alii tineiafi a le tatou Malo na masoe a’o fa’atino tiute; Kapeteni Mike Tipoti ma Kapeteni Talofa Allen Velega ina ia auai fa’atasi mai i le savaliga na fa’atulaga mo le taeao po lava o le aso Toona’i na tea nei.
Na amata atu le savaliga lenei i le Malumalu LDS i Aua se’ia a’ea le mauga ma pa’ia le nofoaga tonu na tupu ai le fa’alavelave tau ta’avale afi tineimu ma maliliu ai nei tama o aiga, tama fanau pele a aiga potopoto ae o uso moni i le galuega.
Ae le’i malamalama lelei mai le taeao o le aso atofaina, ae ua tumutumu atu i latou ua mae’a la’eia le mitiafu mumu ua tusia ai le fa’amoemoe o le savaliga lenei. O le fa’amoemoe fo’i na matuaina mai i se tasi o tamaitai, o se tasi na aotau fa’atasi ma i la’ua ua masoe fai fai le faiva tautua faatineiafi, Talaleomalie Mortenson.
Lea ua ese le faiva ua tautua ai nei o ia, peita’i e le tu’ua e lona mafaufau tu ma aga e fa’amaise ai i latou sa tautua fa’atasi ma o lo’o tautua pea nisi, e taualoa le auaunaga taimua mai i galuega fa’aola o le mamalu lautele, pe a lutia i ni mu ma le afi a’asa.
O le fa’amoemoe ua tu’ufa’atasia e lenei tamaita’i ma le vaega o ali’i sa latou tautua fa’atasi i le Tinei Afi a le Matagaluega o le Puipuiga o le Saogalemu Lautele. Fa’atasi ai ma le susuga Ta’ase o le Pule A’oga i le Laumua i Fagaitua sa ao’oga ai nei ali’i Kapeteni ua amia fa’afuase’i e le malaga a le oti a’o auai e fa’atino faiva fa’atineiafi.
Na auai le mamalu o aiga o nei ali’i Kapeteni, le mamalu lautele o tupulaga ma soo se tasi o nofo fa’anoanoa ona o le amia fa’afuase’ia o i la’ua, ae maise fo’i o Uo mamae ma Aiga lautele.
E le’i faigofie le savaliga aua e a’e tele le ala, ae ua saunoa ai le afioga le Lutena Kovana Lemanu Peleti Mauga ina ua toina atu lona avanoa, “Afai ua tatou iloa nei le faigata ona a’ea o le mauga lenei, o le fitaituga fo’i lea e feagai ai ma ali’i tineiafi i taimi uma e fa’atino ai o latou tiute fa’atineiafi, lea ua i’u ina maumau ai le soifua, ma ua motusia ai mafutaga pele ma mamae ma aiga. Fa’amaise atu le agaga o le Atua ia te outou uma, o tina ma fanau ua tu’ua nei le mafutaga, ae maise le mamalu o aiga, uo ma aumea mamae.”
Na ilia le toe fa’ailo mo i la’ua, e fa’ailoa ai i le latou fo’i matata tau’ave, ua afemoe faiva o Kapeteni Velega ma Kapeteni Tipoti, o lo ua misia fo’i le mafutaga fa’aleuso i le galuega ma faiva na tofia ma a’otau ai i le tatou nei atunuu ma le Malo.
Na muai tutuina fo’i moli gao e i latou uma na auai ua maua i lea fa’asoa, ina ia fa’ailoa ai lo latou misia o le mafutaga mafana fa’aleaiga ae maise fo’i o le fa’auso i le galuega.
Mae’a fo’i ona tuufa’atasia ni meaalofa tupe na taua’aoina ma e fa’auia uma lava nei mea uma i le pa’ia o aiga pele Velega ma Tipoti. Sa saunoa fa’afetai fo’i le tamaitai o Mortenson e tusa o le auai ma le taualoaina o le fa’amoemoe mo nei ali’i Kapeteni aoga tele i le auaunaga fa’atineiafi i le atunuu.