Ads by Google Ads by Google

Tala I Vaifanua

FEAGAI LEOLEO FA’AFITAULI FA’AMOLISIA TULAFONO O LE CORONAVIRUS

 

I le fonotaga o COVID-19 a le malo se faia i le aso Faraile ua te’a, e pei ona talosagaina e le kovana, sa fa’ailoa ai e le Komesina o Leoleo Le’i Sonny Thompson, e le o faigofie i leoleo tulafono o le fa’asa ua i ai nei. Ua fa’atulafonoina ia le atoatoa le tautuaina o le atunuu e ala i feoa’iga i ta’avale la’u pasese, ia afa le pasese e malaga ma le pasi fa’apea ma le Taxi.

 

Ua le fa’asalaina se ave ta’avale o le a fa’ato’a maua, e fa’amatala ia te ia le tulafono, ae peita’i afai e maua fa’alua, ona fa’ato’a fa’asala lea ma taua’aoina i ai lana pepa e fa’ailoa ai lona aso i le fa’amasinoga.

 

Ma e to’alua ave pasi sa taofia ona o le le usitaia o tulafono ma tulai i le Fa’amasinoga Itumalo i le aso Faraile ua te’a.

 

“E mana’omia tele e tagata uma ona malamalama lelei i aiaiga o tulafono o le fa’asa ua tuu atu nei i le vasega o leoleo e fa’amalosia mo tagata uma ia latou usita’ia. E le o se galuega faigofie lona fa’amalosiga, ae ua mae’a tauto Leoleo o le Malo, ia latou faia o latou tiute, pe aiga pe leai,” o le saunoaga lea a Le’i

 

Ua talosagaina fo’i e le Komesina o Leoleo le talisapaia lelei e le mamalu lautele o nei tulafono uma ua fa’amamafa mai e le Malo ina ia nofo puipuia ai le atunuu atoa mai le Coronavirus.

 

“E i ai fo’i aiga o leoleo latou o lo’o fia mafuta i ai i latou ma le saogalemu pe a mae’a galuega o aso ta’itasi,” o sana tala lea.

 

“O pasi a le Kamupani I’a ua fa’atulaga mo latou tagata faigaluega, ua le taofia lea e leoleo, aua ua ese fo’i le ala ua fa’agafua ai nei pasi ma latou pasese i le aiaiga o le tulafono o fa’amamaluina nei. Ua fa’ataga pasi nei e ave latou pasese ma e fa’atumu lava latou pasese ona ua manava pe le’i amatalia fo’i latou galuega.”

 

E afua mai le 6:00 i le taeao se’ia oo i le 6:00 i le afiafi e la’uina ai pasese a pasi o lo’o nafa ma le toatele o le atunuu. O pasi a le Kamupani I’a e tatau ona latou la’uina pasese i le taimi lava e tatau ai ona oo atu tagata faigaluega i le Kamupani.

 

O le tulafono tau le ‘afa o le pasese a pasi e la’uina le mamalu o le atunuu, lea ua fa’amamaluina mo isi pasi uma lava. Peita’i, i le fonotaga lea, ua fa’atonuina ai e le afioga le Kovana le komiti fa’afoe o le Coronavirus, ina ia logo atu i le Kamupani, o le a totogia e le Malo nisi malaga a Pasi, ae ia usita’ia fa’atasi le tulaga, ia afa le pasese a le pasi.

 

TOE FA’ATAGA MAI LAVA LE VA’A TAIWAN I LE TATOU UAFU TELE

 

O le vaiaso ua te’a sa ulufale mai ai i Amerika Samoa vaa fagota FV Man Fi Tsai #88 ua toe faatagai e le kovana, ina ia fesoasoani atu i le ali’i fagota sa levea a’o i ai le va’a i luga o le sami. O le va’a fagota lenei a Taiwan e lesitala i le malo o Samoa.

 

Talu mai le aso Toonai lua vaiaso talu ai, sa fa’atalitali ai pea lenei va’a e tusa o le 20 maila i fafo atu o le tatou gataifale ina ia faatalia se tali atu i le latou mana’oga e fia afea i tatou ina ia fesoasoani i lea ali’iva’a ua manu’a ma e mana’omia lava le togafitiga i le falema’i.

 

I le aso Lulu o le vaiaso na te’a, sa fa’ataga ai le aufaigaluega e malaga atu ma ni vaila’au mo togafitiga mo lea sui e fa’amanu’alia. Peita’i sa tumau pea le faaiuga e le afea i tatou, ona o fa’aeteetega lava o le fa’ama’i o le Coronavirus ina ne’i a’afia ai le atunuu.

 

Ua faailoa mai e le ali’i ta’ita’ifono o le COVID-19, Iulogologo Pereira, “Ua toe faataga mai le va’a e sau i totonu se’i fai le togaifitiga o le ali’ivaa o lo’o fa’amanu’alia, ma o le a suesuea uma lava ali’i va’a o i ai i luga o lea va’a, e pei lava ona faia i i si pasese uma o va’alele ma va’a na afea i tatou.”

 

Ina ua mae’a la’u ese le i’a ma ua pipi’i mai fo’i le va’a i le uafu, ona avea loa lea o le ali’i va’a o lo’o manu’a i le falema’i mo lana talavai na mana’omia ona faia. “Ua mae’a ave’esea le matau sa mau i le lima o le ali’iva’a, ma sa fa’ailoa mai e na’o le 15minute na faia ai lea ta’otoga,” o se lipoti le ali’i ta’ita’ifono.

 

Ua mae’a toe tu’uva’a atu le va’a lea e taula mai e tusa o le 12 maila le mamao i fafo atu o le tatou Uafu, se’ia mae’a le toe va’aiga o le foma’i o le ali’i va’a ona fa’ato’a tuuva’a ese atu ai lea.