Ads by Google Ads by Google

Tala I Vaifanua


Lolo Matalasi Moliga, Kovana AS

MANA’O KOVANA TATALA PEA MALAGA A LE HAWAIIAN AIR

 

I le fonotaga a le Kovana ma  lana Kapeneta i le aso Gafua ua fa’ailoa ai lona mana’oga fa’apitoa ina ia fa’aauau pea lava se malaga mai Hawaii a le Hawaiian Air i vaiaso ta’itasi, ua le mafai ona manatu o ia e fa’amuta malaga uma e pei fo’i o le va o Samoa ma Amerika Samoa.

 

Ua faia lea mana’oga fa’apitoa, ae ua mautinoa lava e le ali’i Kovana, o lo’o ua mae’a i ai le Coronavirus i laufanua o Hawaii.

 

Ua manatu o ia e faia pea se malaga se tasi i le tatou va ma Hawaii ona e fuafua i talavai a matua matutua ma isi uma o le tatou malo e aofia ai fo’i ma ia, e ao ai ona malaga i latou mo talavai ma e i ai lava taimi e ao ai ina fa’aoo fa’avave atu nisi mo togafitiga ma ua tatau ai ona avanoa pea lea malaga.

 

Peita’i, ua ia fa’ailoa fo’i, “afai lava o le  a tetele ni fa’aletonu tau le puipuiga o le atunuu mai le fa’ama’i pipisi lenei, o le a tamau loa ma taofia malaga uma mai i totonu o le teritori.”

 

Fa’ailoa e Lolo, “Ua tatau ia i tatou uma ona usita’ia fa’atasi le fa’asa ua tamau nei mo femalaga’iga ma le lautele o tagata uma o lo’o ulufale mai i Amerika Samoa” ae tuma pea le malaga e tasi a le Hawaiian Air i le vaiaso.

 

Ua manaomia fo’i ona fa’ailoa atu i fanau uma a Amerika Samoa ina ia nonofo lelei i nuu ua i ai i le taimi nei ma aua le toe femalaga’i mai, se’i vagana ai o mea e tatau ai ona sau se tasi i Amerika Samoa.

 

LEOLEO FA’AMALOSIA LE TAPUNIA O PISINISI I LE 6:00PM

 

I le ulua’i aso ua fa’amalosia ai le tamau a Amerika Samoa ina ia taofiofia le pipisi mai o le Coronavirus ma a’afia ai le to’atele i Amerika Samoa, ua va’aia ai le vasega o leoleo ua tula’i mai latou te fa’amalosia le tapunia o faitoto’a o pisinisi i so’o se tautua i Amerika Samoa.

 

E ese mai i lea, ae ua va’aia le faaitiitia o pasi i luga o alatele, ua vavamamao le taimi e te maua ai se fesoasoani mai lea fo’i tautua pe afai o le a fia malaga nisi e faigaluega ma toe taliu mai i aiga, po’o le taumafaiga fo’i e malaga atu e totogi pili ma fe’au masani i faletupe ma tautua e le mafai ona tu’ua.

 

I fale’aiga tetele ua va’aia le tapunia o faitotoa ae maise lava i tulaga o fale’aiga mo mea’ai vave saunia, lea e pei o le McDonalds ma le Carls JR i totonu o le Laufou, ua tapunia le a’ai faatasi ai o le mamalu lautele, ae ua tatala na’o le faitoto’a mo i latou e oka mai i ta’avale ma piki le mea’ai i le fa’amalama.

 

I se talatalanoaga ma nisi ua a’afia galuega, na fesiligia ai i latou poo fa’apefea mai i latou i lenei fa’asa ma ua va’aia ua le tatalaina faitoto’a o le latou fale’aiga, aua e le o se fale’aiga e faia ai ni oka, ae ua tatala mo loe nonofo lelei i latou o tagata ma tausamia latou mea’ai na oka.

 

I le Milovale, ua fa’aauau ona tapena latou mea tausami masani ma ua gasolo atu tagata e fa’atau ai latou ti i le taeao ma le aoauli, ae tapunia lava faitoto’a i le taimi ua fa’atulaga, le 6:00 i le afiafi.

 

Ua amata mai lava i pamu kesi se’ia oo i faletagamea, o tautua e masani ona tatala pea se’ia o’o i le 12:00 i le vaeluaga o le po, ua tapunia uma lava i le itula e 6:00 i le afiafi, ua fa’apea fo’i i faleoloa uma o so’o se ituaiga.

 

O nisi o ta’avale sa latou laina atu ina ia utuina mai e pamu kesi, na i’u lava ina te’ena mai lea tautua. Peita’i, o le fa’afesili, ae fa’apefea pe afai e le au ai lea aiga i le fale i se kesi ua i le ta’avale?