Ads by Google Ads by Google

Tala I Vaifanua

5 TAOFIA MO SUESUEGA MALAGA MAI HAWAIIAN AIR ASO GAFUA

 

E toalima i latou na malaga mai i le faigamalaga a le Hawaiian Air i le afiafi o le Aso Gafua ua taofia nei i le falema’i mo suesuega faapitoa i Leone e fa’atautaia ai suesuega mo le Coronavirus.

 

Fa’ailoa e Motusa Tuileama Nua, le fa’atonu o le Soifua Maloloina, o le isi toalua, o le ulugalii o nisi sa malaga i Filipaina, le isi fo’i malo ua oo i ai le Coronavirus. O le isi o le tagata Samoa e malaga mai Seattle, Washington, le setete ua i ai fo’i le Coronavirus.

 

O le isi o le tina Samoa foi e malaga mai San Francisco, o isi a’ai o lo’o latalata ane fo’i i ai le Coronavirus. Ma le to’atasi o totoe o se turisi e tele na’ua atunuu sa i ai, ma o ituaiga tagata na e faigata ona kilia mai suesuega nei.

 

Fa’ailoa e Tuileama, “E umi na’ua le taimi e fa’ataunuu ai le kiliaina o le pasese i le taimi nei, ae ao ina fa’ataunuu mea tonu uma ua mae’a fa’atulaga mo lenei taua tau le soifua maloloina lelei o le atunuu.”

 

Ua ia fa’ailoa mai na mafua foi ona umi lea taumafaiga, ona o lea fo’i malaga e le’i tofusia le pasese ma le pepa fa’atumu tau le soifua maloloina lea ua fa’aopoopo i pepa o le va’alele e fa’atumu e ana pasese femalaga’i, ma o le isi lena mea ua fa’ato’a fa’atumu nei pepa ina ua to’ai taunuu le pasese i le fa’amalama e tautuaina ai i latou e le Ofisa o Femalaga’iga.

 

Ua fa’ailoa fo’i e le Motusa, ”Se’i vagana lava ua i ai se suiga mai se faaiuga tuusa’o mai le Kovana, e le toe mafai ona vave malaga mai se tasi mai isi malo e fia ulufale mai i Amerika Samoa, se’i vagana ua mae’a nofo ai i Hawaii mo le 14 aso ma saunia fo’i se kilia i lena setete, ona o le malo o malaga mai ai o se malo ua i ai le Coronavirus.”

 

TIUTE LEOLEO MALAEVA’ALELE FA’AMALOSIA SUESUEGA

 

Ua tiute nei le vasega o leoleo ua tofia i le Malae Va’alele i taimi uma e tulaueleele ai faigamalaga a le Hawaiian Air ina ia mautinoa o lo’o ua gasolo lelei suesuega uma ua tatau ona faataunuu i pasese femalaga’i, ina ia mautinoa le saogalemu o le atunuu mai le Coronavirus.

 

O le afuaga o lea fa’amalosiga ona ua talanoa sa’o mai Kovana Lolo Moliga i le tatou komiti fa’afoe mo le Coronavirus, ia fa’amalosia tulafono uma ua mae’a fa’atulaga mo e uma e gasolo mai i totonu o le atunuu i so’o se ala lava. Ia mautinoa e leai se tasi e faatalatu i lea tamau ua fa’amalosia i malae va’alele ma uafu.

 

Fa’amaonia e le ali’i sui fa’atonu o le Port Administration Christopher King lea fa’amalosiga o tulafono uma mo e ulufale mai i malae va’alele ma uafu ma ua fa’atulaga ai le vasega o Leoleo mai le Matagaluega o le Puipuiga o le Saogalemu e pei ona fa’ailoa e le kovana.

 

O lo’o i ai pea sui mai le Matagaluega o le Soifua Maloloina i le malae va’alele i Tafuna e siaki i latou e ulufale mai pe o aafia i le coronavirus.

 

O le isi mea ua fa’amalosia nei, ia matua fa’amama mea uma i le malae va’alele, e oo lava i so’o se mea e ono tagofia e so’o se tasi i le malaeva’alele e ao ina i ai ma vai fa’amama ai a’ao o le mamalu lautele ia fa’atulaga i lea nofoaga faitele.

 

O le Kamupani a Nana’s Janitorial Services lea ua fai ma latou tiute lea fo’i vaega o le tautua, ma ua le gata la i fa’amama lima, ae ua fa’amamaina atoatoa le nofoaga atoa i le tele o taimi a’o le’i malaga mai so’o se pasese, ona o siama o lenei ma’i o le coronavirus e matua maua i so’o se mea e papa’i ai a’ao, ma afai ae le fafano leleia a’ao, o le a faigata ona mautinoa lou saogalemu.

 

Fa’ailoa e King, “Ua maea faatulaga uma lava aiaiga mo le fa’amamaina o le malaevaalele atoa i taimi uma”

 

Ua maea talosagaina fo’i le matagaluega o le Soifua Maloloina ina ia fa’atautaia a’oa’oga lelei mo i latou e fulufuluina ma fa’amama nofoaga uma i le malae vaalele i ala e tatau ona fa’amama ai le malae vaalee i taimi uma.

 

Ua le gata ai i le Malaeva’alele lenei galuega fa’amama ua faatulaga ma faia ai aoaoga, ae ua fa’asolo fo’i i aoga ina ia mautinoa ua nofouta fanau a’oga uma i tulaga o le mama a’ia’i e ao ina fa’atino e i latou, aua le taua ma le Coronavirus ua i ai nei.