Ads by Google Ads by Google

Tala I Vaifanua


O pepe fou, le masaga fa, soifua mai i le aso Faraile, 17 Ianuari, 2020. [ata foa’i]

O pepe fou, le masaga fa, soifua mai i le aso Faraile, 17 Ianuari, 2020. [ata foa’i]

FANANAU MASAGA FA - O TAMA’ITA’I UMA - I LE LBJ

 

Ua faamauina i fa’amaumauga a le falema’i o le LBJ i Fagaalu le soifua manuia mai o le tina i lana masaga 4 o tamaita’i uma lava i le aso 17 Ianuari, 2020 i le itula e 3:47 i le afiafi.

 

Na taoto lenei tina, aua sa muai manatu foma’i i le taimi o ana talavai, e tolu pepe o lo’o ua i lona manava. Peita’i o se mea e fa’ate’ia ai, e o’o i le taimi ua fanau ai, ae e to’afa pepe maloloina lelei ua tu’ueseeseina nei ma le tina.

 

O ia lea o Filomena Iole Sokimi ma le tama o le aiga o Sokimi Sokimi o Iliili. O lea fo’i aiga, a’o le’i fanau l masaga 4, ua i ai le to’afitu o la’ua alo.

 

O le mea sili ona fa’afiafiaina ai le tina ma le aiga atoa, ona ua soifua mai nei tama’ita’i masaga fa, e ta’i fa uma fo’i o latou pauna lo latou mamafa. 

 

“I le va’ai atu i nei tama’ita’i e loto fa’atasi i latou, ona e le o so’ona tele le sosia e soifua ai i se tasi pe to’alua o i latou, ae ua faga tutusaina i latou uma,” o se tala lea a le tina o nei pepe aulelei, ma ua si’i ae fo’i e i latou le fa’afetai i le Atua, aua o se mea muamua lea ua tupu mai i totonu o le latou fo’i aiga.

 

Ua fa’ailoa mai o lo’o manuia lava le tina fa’apea ma pepe uma nei, ae ua fa’ailoa mai fo’i e si tina matua, “Fa’afetai lava i le to’atele o uo ma e masani ae maise o nisi sa fa’amanuia mai e ala i upega tafa’ilagi a le Facebook, ua i ai nisi ua o mai ma fa’amomoli, ona o le fia fesoasoani i le tausiga o nei ma’ataua ua fa’amanuiaina ai le fanau.”

 

Ua le gata i lea ae ua sagisagi fiafia le tina matua, o le a ia tausia lelei si ana fanau teine, ma o le a taumafai fo’i e fa’atutusa uma a latou tifiga e fa’ailoa ai lo latou agaga fa’afetai ona o se meaalofa taua mo i latou uma i le li’o o le latou aiga, i lenei tausaga.

 

TATALA LE FALETA’ALO FOU LAULI’I ELEMENTARY SCHOOL

 

O le aso Faraile ua te’a, Ianuari 17, sa tatala aloaia ai le Fale Ta’alo Fou a le aoga tulaga muamua i Lauli’i.

 

“E ui ina tau fa’asoasoa le eleele i totonu o le Laumua, ae faafetai ua mafai ona fausia ma pasia lelei lenei faletele, e aoga fo’i mo fa’au’uga o le fanau, ma mea uma e ao ina poto ai le mamalu o le Laumua ma faia’oga fa’apea ma matua i a latou fa’atasia taua i le tausaga nei ma fa’asolo atu i le lumana’i,” o se tala lea a le susuga Laloniu, o se sui o le PTA i Lauli’i Elementary, o ia fo’i o le pulenu’u i le afio’aga.

 

E afua ona saunoa fa’apea o ia, ona o le fausaga o le faleta’alo lea, e iloga ai ona ese mai le tele o faleta’alo. O le tulimanu e tasi o lea faleta’alo e le fa’atafafa lelei, ae fausia e fuafua i le tulutulu o le isi falea’oga, ae ua fa’aaogaina lava le avanoa ua maua, ia fa’amalu lelei mo potopotoga a le aoga ma ta’aloga.

 

O le kamupani a le FTK Construction lea e fa’atautaia e le afioga le Senatoa Fa’amausili Mau Mau Jr ma le faletua sa fa’akokekarate mo le galuega. O lenei kamupani sa latou faataunu’uina le galuega o le fale fou o le Ofisa o le A’oga, e aofia ai ma le potu fa’apitoa mo masini komipiuta ma le Faletusi lea na umusaina i le fa’aiuga o le tausaga ua te’a.

 

O se tala mai le galuega na iloga ai, o le taumafaiga o lenei galuega sa le uia ai ala masani o galuega a le Malo, peita’i ua na’o na talosaga lava le susuga le Faipule mai Lauli’i, Gene Pen i le Kovana, soso’o ai ma le fa’atonuga, e soso’o mai lava le mae’a o le falefou o le Ofisa ma le amataga loa o le galuega o le Gymnasium.

 

O le tau o le galuega e sili lea ma le $60,000 ma o lo’o totoe sina vaega o lea tinoitupe.

 

I le saunoaga a Kovana Lolo Matalasi Moliga, sa ia fa’afetaia ai le tima’i a le ali’i faipule mo Lauli’i, “E lelei tagata le savali ma tuitui pea le faitoto’a se’ia o’o lava ina tatala mai se avanoa. Faafetai mo le galuega mae’ae’a lelei ua tapena mo alo nei o le atunu’u. Pe to’a 70 pe to’a afe tamaiti i se a’oga, e tatau lava ona tutusa lelei le va’ai i ai a le Malo. Ia fa’asalafa manuia uma mo fanau o tausailia atamai i so’o se mataupu tau’ave i a’oga.”

 

O le lona tolu ai lea o a’oga tulaga muamua ua mae’a o latou faleta’alo, ma o lo’o taumafai lava le malo, ia so’o a’oga uma tulaga muamua o maua faleta’alo mo a latou fa’atasiga. E le o toe mamao fo’i ae mae’a le faleta’alo o le Matafao Elementary i Faga’alu.

 

Na fa’apea fo’i ona saunoa fa’afetai le tama’ita’i Fa’atonu o A’oga, Dr. Ruth Matagi-Tofiga ma ia fa’ailoa, “O le pulunaunau lava e tu’itu’i ma saga tu’itu’i, e maua le tali lelei. Lea la ua mae’a le fale, ua fa’aleleia ma tapena.”

 

Ua ma’ea ona pasia e le Matagaluega o Galuega Lautele le faleta’alo.

 

2 LEOLEO FASIOTIA A’O FA’ATAUNU’U TIUTE I HONOLULU

 

I se lipoti mai Hawaii, o lo’o  fa’ailoa ai o se tama e 69 tausaga le matua ua mae’a fo’i ona fa’ailoa ia te ia o le a fa’atula’i esea mai le fale sa nofo ai i Diamond Head i Honolulu, ua ia tafaina leoleo ma maliliu ai le to’alua o i la’ua. O nei leoleo na o atu i lona fale ina ia tali i le vala’au mai mo se fesoasoani i le 911 i le aso Sa na te’a nei, ona o se tasi ua tuia i le naifi.

 

O leoleo tiute e to’alua ua maliliu o le tama’ita’i o Tiffany Enriquez ua atoa le lima o le tautua i le Matagaluega o Leoleo ma Kaulike Kalama ua atoa le 9 tausaga i le vaega a Leoleo i Honolulu.

 

O le ua mautinoa na tafanaina leoleo ua maliliu o Jerry Hanel, ma o ia fo’i lea ua na ia fa’amuina le afi ua sasao ma ua mu atoa ai le atufalega e fitu fale o lo’o ua mae’a fausia lelei ai.

 

O le tama’ita’i ta’ita’i leoleo PC Ballard ma sa iloga fo’i ona va’aia le tulaga gatete ia te ia a’o saunoa e fa’amatala le fa’aletonu ua amia ai ola o malu o le Malo a’o feagai ma tiute.

 

Ua faailoa i faila a leoleo, e le fa’atasi ona faia lea ituaiga o vala’au i le 911 e Jerry Hanel, ma o le tele o taimi e vala’au ae leai se solitulafono o a’afia ai se isi i le latou tuaoi.