FA’ATO’A TATALA DAY CARE VAIASO FOU

E ui ina sa mua’i fa’ailoa atu i le vaiaso ua te’a o le a a’e fa’atasi le fanau a’oga ma tatala atu ai ma nofoaga e tausia faapitoa ai fanau poo Day Care a le fanauiti i le atunu’u, i le vaiaso lenei, ae ua i ai se isi suiga.

“Ua toe fa’asalafa le taofiga o le toe tatala o Day Care Centers i le atunuu ona ua maea soalaupule le afioga le Kovana, Matagaluega o le Soifua Maloloina ma le matou fo’i vaega, ua toe faia ai le faaiuga ina ia tapunia pea nofoaga e tausia ai fanauiti se’ia oo i le vaiaso fou Ianuari 13, 2020. Ua faamalulu atu ai fo’i i le a’ai o finagalo, ona o lea suiga fa’afuase’i,” o se fa’amatalaga lea ma i lea foi itu o le tautua a le DHSS i le mamalu lautele o le atunu’u.

Manatua o lenei fo’i fa’atuai ona tatala o lea tautua, ua tatau ai ona toe taga’i toto’a fo’i le mamalu o matua i le fa’asologa o tui misela o le fanau, ia mautinoa ua mae’a faia, aua a leai, o le a faigata foi ona talia lou alo i le nofoaga e tausia ma va’aia lelei ai a’o e faigaluega.

Pe afai e tatala Day Care Centers ua fa’ataga na’o le fanau e 6 masina se’ia o’o i le 13 tausaga e mafai ona tausia i nei nofoaga fa’apitoa. O le a le talia le pepe fa’ato’a fanau mai e o’o i le 5 masina le matutua ona manatu lava i le saogalemu a’ia’i o le fanauiti mai le misela pipisi, aua o i latou na e le o mafai ona faia ni tui puipuia o le misela.

Ua fa’atonuina fo’i le vasega o Day Care Centers uma ina ia latou vala’auina matua o lo’o laiti mai le 6 masina le matutua o latou fanau sa tausia pea i a latou Day Care, ina ia nofouta i lea suiga.

Ua o’o lava fo’i i le aufaigaluega o lo’o galulue i le tausiga o fanauiti, o le a na’o i latou ua mae’a faia tui puipuia, ova ma le 14 aso talu ona faia o latou tui MMR, e mafai ona o atu e faigaluega e tausia fanau i Day Care Centers pe a o’o ina tatala lea tautua i le vaiaso fou.

Ua fa’ailoa mai e 22 le aofai o Day Cares i le atunu’u, ae 21 o nei nofoaga mai lea 22 o lo ua agava’a e fa’atautaia le tiute o le tausia lelei o fanauiti a’o faigaluega matua.

O nofoaga la nei ua mafai nei ona tatala i le vaiaso fou ina ia tausia ai le fanauiti:
1. Airport (Tafuna) 2. Boys & Girls Clubs of AS (Tafuna) 3. Blessings (Leone)
4. Catelaya’s (Tafuna) 5. Christmas (Leone) 6. Ds Matu’u
7. Ds Leone 8. Hope House (Tafuna) 9. Jacey’s (Nu’uuli)
10. Jayce’s (Nu’uuli) 11. Kana’s (Vaitogi) 12. Kiki & Sam’s (Tafuna)
13. Lanialofa (Pavaiai) 14. Levalasi (Nu’uuli) 15. Manumalo (Malaeimi)
16. Miracle (Malaeloa) 17. Munchkins (Iliili) 18. Noa’s (Onesosopo)
19. Slickers (Pago Pago) 20. Sunbeam (Auto) 21. Victory Chapel (Pavaiai)

O le a logoina fo’i Matua uma o lo’o tausia a latou fanau i le tasi o day Care i Vailoa pe afai e maea pasia lelei i latou e fa’atautaia le tautua i le vaiaso a sau nei.

Ua fautuaina fo’i matua uma e le’i taua’aoina lava pepa tui o latou alo ina ia mae’a pasia mo le tausiga i so’o se Day Care ua lisia i luga, ina ia mua’i o’o ane i le Child Care Services Division a le DHSS e kilia ai pepa o tou alo mo lea tautua.

TAUNU’U FOMA’I MANU - DR RILEY E FA’ATAUTAIA SIAKIGA FAGAFAO:

Ua fa’ailoa e le “Sosaiete Alofa Mo Meaola” o le a o’o mai le Foma’i Manu ua mae’a latou fa’atulagaina mo i tatou ma ua tatau ona fa’atonu mai se avanoa o lau fagafao i le taimi nei.

O le tama’ita’i foma’i manu Dr Kathleen Riley mai Boston, ua i ai nei i le atunu’u. Ma ua amata fo’i ona pisi o ia i le faiga o taotoga o meaola, ma ua mae’a fa’atulaga fo’i nei taotoga e le Sosaiete Alofa Mo Meaola. O lo’o fa’atautaia mai uma nei taotoga i le falema’i o meaola a le Matagaluega o Fa’ato’aga i Tafuna.

Ua fa’ailoa e Mona King o le Alofa mo Meaola, “Na ona taunuu mai lava o Dr Riley, e le’i fa’atali lava ua amata faia le taotoga o nai meaola. Ua fa’atulaga Dr Riley e nofo lava mo le masina atoa o Ianuari, peita’i, ua matua atoa uma aso o lenei masina ma taotoga ua mae’a fa’atulaga e faia ai.”

O lona uiga pe afai lava e fia va’aia lau fagafao e le tama’ita’i foma’i manu lenei, e ao ina onosa’i mai e aumai lau fagafao i le Ofisa o Foma’i Manu i le Matagaluega o Fa’ato’aga, e fa’atalitalia ai sou avanoa pe a mae’a taotoga ua fa’atulaga i aso ta’itasi.

Ua le muta ai lava le taumafaiga a le Alofa mo Meaola mo nisi foma’i manu e toe fia maua mai e soso’o fo’i le auaunaga. Ua fa’ailoa mai fo’i ua toe fa’afeso’ota’ia le Coconut Mutts ina ia toe malaga mai fo’i le ali’i foma’i manu o Dr Kirsten ma isi fo’i foma’i manu o i ai i lena so’otaga i le vaiaso lona lua o Fepuari 2020.

Peita’i ona o lea ua maua nei foma’i manu alolofa ma malaga mai, ae ua mana’omia e le Alofa mo Meaola nisi e ofo mai o latou taimi e fesoasoani ai i galuega fai i taimi a’o tiute lenei foma’i manu e togafitia ma faia taotoga o tatou fagafao i le atunu’u.

Afai la o maua sou avanoa e leai fo’i se mea o faia i le fale, ua talosagaina lou fa’afeso’ota’i mai o le 699-9445.

83 TAGATA MALILIU I LE MISELA I SAMOA

Ua si’itia le faitauga o tagata i Samoa ua maliliu i le misela i le 83, o lona uiga mai ia Tesema 29 se’ia o’o mai ia Ianuari 5, 2020, ua to’alua isi ua maliliu i le misela i Samoa ma o i latou nei o lo’o tausia fa’apitoa i le ICU i le falema’i tele i Samoa.

Mai fa’amaumauga ua fa’amaonia mai e le Ministry of Health a Samoa ua fa’amauina le 5,697 tagata na maua i le misela ma sa o’o ane mo ni togafitiga i falema’i eseese uma i Samoa.

I le taimi nei ua va’aia le suiga tele ua fa’asolo aga’i i lalo ua na’o le 30 nisi fou ua lipotia mai ua o’o ane mo togafitiga o le misela i falema’i, talu mai Tesema 29, 2019.

Ua fa’ailoa mai e na’o le 16 i latou ua taofia i le Falema’i tele i Moto’otua talu mai Tesema 29, 2019 e o’o mai i le itula 8:30 i le taeao o Ianuari 5, 2020.

Ua fa’ailoa pea o lo’o i ai lava tamau o lo’o taofia ai femalaga’iga i le va o malo o Samoa ma Amerika Samoa, fa’apea fo’i ma isi malo uma e aga’i atu ma ulufale i Samoa.

Ua le o toe i ai ni tamau mo i latou e fia malaga mo Ausetalia ma Niu Sila fa’apea ma Hawaii, ae le uia ai Amerika Samoa.

Ua na’o i latou e fia malaga mai i Amerika Samoa nei, o lo’o matua fa’amamalu lava le i ai o le fa’amaoniga o lou mae’a faia o le tui puipuia o le misela, atoa lelei fo’i le 14 aso talu ona faia lou tui lea fa’ato’a e malaga mai ai i Amerika Samoa nei.