Ads by Google Ads by Google

Tala I Vaifanua


O le MOU po’o le Feagaiga Maliliega Fa’atasi a i latou uma ua mautu le latou fa’aiuga e galulue fa’atasi mo le tautuaina o Tamaita’i ua A’afia i Sauaga Fa’aleituaiga, lea ua tula’i le susuga le Loia mai le Legal Aid Falefatu Ala’ilima e sainia le latou vaega o lea feagaiga ia aluga lelei auaunaga a le Poloketi “Taiala O Alo Tama’ita’i.” [ata: Leua Aiono Frost]

EPIC - POLOKETI “TAIALA O ALO TAMA’ITA’I” SAUAGA TAMA’ITA’I

 

O le poloketi fa’atautaia e le Empowering Pacific Island Communities (EPIC), ua fa’aigoaina o le “Ta’iala O Alo Tama’ita’i” ua fa’atutu lea ina ia aoga mo tama’ita’i ua a’afia i fa’ataumao’iga fa’aleituaiga, e fa’aaogaina ai se vaega tupe mai le Ofisa o le Criminal Justice a le tatou Malo.

 

“Ona o le tinoitupe e fa’amoemoe ina ia toe fesoasoani i tama’ita’i ua a’afia o latou tino ma le mafaufau, fa’atasi ai ma latou soifuaga ma’ale’ale ona o fa’atauma’oiga fa’aleituaiga, o lea ua galulue lava le Ta’iala O Alo Tamata’ita’i - TOA Tama’ita’i - ina ia faia tonu lea galuega. Ua le faia fo’i mo na’o tama’ita’i o Amerika Samoa ma le Iunaite Setete, ae ua faia le auaunaga mo so’o se tama’ita’i mai so’o se atumotu o le Pasefika,” o le saunoaga lea a Tasi Tuiteleleapaga, le Fa’atonu Sili o le EPIC.

 

E tolu vaega tetele ua fa’atulaga i ai le TOA Tama’ita’i. Vaega muamua lava o taiulu ia o le fa’amoemoega atoa o le TOA Tama’ita’i, le vaega e to’a 9 ua mae’a malilie fa’atasi ina ia latou tutu fa’atasi ma so’otau’au i le auaunaga a le TOA Tama’ita’i e ao ina fa’auia i so’o se tina e sulufa’i mai pe matauina e i latou ua mana’omia le latou tautua ma le fesoasoani.

 

Vaega lona lua, o le aotelega o le taumafaiga atoa ina ia o’o le auaunaga i so’o vaega o e o taumafaia le auaunaga mo le i latou ua a’afia i sauaga faaleituaiga i le atunuu. O sui e aofia i lea vaega o i latou o so’o se tasi e fia auai e aofia i ekalesia, o isi foi fa’alapotopotoga ma sosiaete ua auga a latou tautua i le tautuaina, faufautua ma fesoasoani i tama’ita’i ua fa’atauma’oia i afaina o le tino ma le mafaufau ona o sauaga fa’aleituaiga.

 

Vaega lona tolu, o le SART po’o le vasega o i latou nei e tala fa’auto atu i tua e fa’atino galuega su’esu’e, faufautua, tausailia mai i latou ua afaina, fa’ao’o se auaunaga ia soloia malie tiga o sui ua a’afia, ma o i latou nei e mafai ona galulue fa’atasi i taimi uma e soalaupule a latou pitola’au tau’ave i le taumafaiga e maua mai i latou ua a’afia, ma fa’ao’o i ai le auaunaga, ma toe faufautua i ni mea e mafai ai ona toe fa’aleleia atoatoa mafaufauga, uiga ma amio ia toe tula’i mai i latou o se Tama’ita’i TOA.

 

E to’alua sui na malaga mai fafo mo feutaga’iga ma le TOA Tama’ita’i, ma la’ua va’ai toto’a fo’i i le fa’atinoga o le fa’avae o le TOA Tamaita’i lea na sainia ai le latou feagaiga fa’apa’aga galulue i le fa’amoemoe ua autasi i ai e fa’atino mo tama’ita’i ua a’afia i sauaga fa’aleituaiga.

 

E i ai fo’i taimi ua fa’atulaga i le vaiaso atoa lenei, ina ia fa’asoa mai ai fo’i se tasi o sui na malaga mai, e tusa o lana fo’i fa’atautaiaga o lea polokalama i le setete o lo’o fa’atuina ai lana poloketi, o le ituaiga lava e tasi.

 

E faia lea fonotaga faaleaoaoga i le USArmy Reserve Center i le aso Lua o le vaiaso a sau i le itula e 4-6:00 i le afiafi. E lua aso ua lautogia mo lea fonotaga faaleaoaoga ma e mae’a i le aso 28 Aukuso, itula e 2:00-4:00pm.

 

AFEA AUMALAGA “US SENATE” AMERIKA SAMOA

 

Ina ua tolopoina le malaga a le Konekeresi sa foufou e o’o mai i Amerika Samoa i le vaiaso nei, ae le’i mailoa ai, o le a fa’aauau mai se malaga a le US Senate, i le teritori e toe siaki le va’a ma utu lona Kesi. E tusa ma le 90minute na maua e le faipule o Amerika Samoa i le Konekeresi, Aumua Amata e feiloa’i ai ma le to’alima o ali’i senatoa o le US Senate, ma sa fa’ailoa lo latou fiafia tele ina ua talanoa fo’i ma Aumua e tusa o le mamao mai i Saute o Amerika Samoa.

 

E le gata i lea, ae ua fa’aofi atu fo’i i ai e Aumua nisi o mataupu ogaoga o lo’o mana’omia ai le latou fesoasoani, ina ia fa’aleleia atili ai le soifua o tatou tagata i le tatou teritori sili ona mamao mai i saute o le pulega ale Iunaite Setete o Amerika.

 

“O le malaga e le’i fuafua e aofia ai Amerika Samoa, peita’i ona o tulaga lava o le saogalemu o le faigamalaga, e afea ai i tatou e toe siaki le va’a ma va’ai lona kesi faasoa mo le malaga ia to’ai taunu’u ma le manuia. Ae o lo’o fa’aauau le malaga lenei i Niu SIla mo fonotaga o lo’o ua fa’atulaga e faia ai. O nisi vaega o le malaga e le mafai ona fa’ailoa, aua o lo’o i ai mataupu ma le saogalemu fo’i o le malaga lenei e le mafai ai ona fa’asalalauina fa’alaua’itele atunuu ole a afea i lenei malaga ma le mafuaga fo’i o le malaga mai,” o se tala mai lea Aumua.

 

MAE’A SAILIGA - LEILOA PEA 2 TAMA TALAVOU I LE SAMI - UTUMEA SISIFO

 

O le aoauli o le aso Gafua na taofia ai le sailiga a le Matagaluega o Leoleo ma isi uma na fesoasoani i le tau toe sailiga mai o Anthony Leota ma Alex Peric lea na tafefea ma ua le toe maua tino, mai le sami i Utumea i le aoauli o le aso To’ona’i na te’a nei.

 

O le o’o o nei talavou mai o latou aiga i lea itu o le motu, ona o se tafaoga a le Autalavou o le Ekalesia a le Cornerstone mai Malaeimi na faia ma sa to’atele talavou sa ta’e’ele uma lava i le sami.

 

O le to’alua lea ua tafea, e to’atasi o i la’ua na tafea, ma ua oso atu le isi ona tausoga e tau lavea’i mai, ae ua tafea uma atu ai lava, lea ua mae’a le 72 itula e fa’atulaga mo sailiga a le Malo, ae ua ‘seuga tali i seu’ ona toe maua o la’ua tino.

 

E tusa ai ma se saunoaga a le ali’i Ta’ita’i Leoleo, PC Fo’ifua, “E ui lava ina ua mae’a fo’i itula fa’atulaga mo sailiga a le Malo i ona matagaluega uma e fa’atautaia nei fesoasoani mo se sailiga i le sami o i latou e tafefea, ae e le o muta ai le asiasi pea i lena itu o le gataifale o le tatou motu, pe a mai, pe toe va’aia i la’ua.”

 

E tausoga i la’ua ua leiloa ina ua tafefea i le sami, ae o la’ua fo’i sa malaga i le aumalaga a le JPS Football Teams i Hawaii.

 

Ua va’aia pea le tiga alofa o matua ma aiga, ae maise le mamalu o le afio’aga ma e masani, ua le utuva le gasolo atu ma tima’ia le gataifale, pe le toe va’ai tasi atu i o la’ua tino.

 

Ia fa’amaise le Atua i Matua ma Aiga, ae maise fo’i o la’ua autalavou ma le Ekalesia ona o le tu’ua o le mafutaga mafana ona o lenei tulaga.