Ads by Google Ads by Google

Tala I Vaifanua

SUESUEGA O LE ALITITAI FA'ATAUTAIA - DR BALLARD & VA'A SUESUE 'EV NAUTILUS:'

 

O le aso Tofi na fa'atasi ai le to'atele o fanau a'oga ma nisi o sui matutua o i latou na latou iloa le fa'asalalauga o le a mafai ona talanoa ma le ali'i Suesue o le Alititai ta'uta'ua lava i le lalolagi, Dr Robert Ballard, lea ua o'o mai ina ia suesu'ea ma fa'amaumau fo'i le alititai o le tatou atunu'u, ae maise ai lava le va'alele o le "Clipper" a le Pan Am lea na toe fo'i mai lana malaga ua le mafai ona fa'aauau ma toe pa'u mai i le tatou Uafu Tele i le Taulaga.

 

I le fa'atasiga lenei, ua avea ma avanoa e talanoa mai ai le ali'i suesue lenei ma se tasi o lana aumalaga e faigaluega na te fa'amaumauina uma a latou suesuega o so'o se mea latou te sailia i le alititai o le moana sausau.

 

Na faia mai lenei feso'ota'iga a'o fa'atautaia galuega a Bob Ballard ma lana aufaigaluega i le gataifale o Ta'u, Manu'a i luga o lona va'a suesue "EV Nautilus." Sa ia fa'ailoa mai uma i le fanau a'oga lona fiafia e matamata i le tele ma le anoanoa'i o i'a o le gataifale. Manu'a ua maua ane i a latou ata o lo tapu'ea e fa'aaogaina ai le latou Mea Pue'ata i lalo o le sami po'o le ROV e igia ia "Ben."

 

"E matua matagofie i'a o le Manu'atele, ua i ai nisi i'a e le'i matou va'aia muamua i a matou suesuega, ae ua matou maua a'e ai ma se isi mea matagofie lava. Ua i ai se fa'aputuga oneone ua iloga mai o se motu au afuafua ona alia'e i le ogasami o le Manuatele, ma o se tala fiafia i nei suesuega, po'o le isi augatupulaga o le a soifua a'e pe a mae'a mavae atu i latou o soifua mai i lenei vaitau, o le a fa'amanuiaina i lea fo'i motu fou."

 

I sana lipoti e tusa o ana galuega i le tatou nei malo, ua ia manatu ai e toe taliu mai i le tausaga 2021,  ina ia toe fa'amae'a lelei suesuega lea e faia i le taulaga i le tatou Uafu, ma ia fa'amautu nisi o mea sa latou mua'i va'aia ina ia atoatoa lana lipoti fa'amaumau o a latou suesuega.

 

Peita'i o mea uma nei ua ia sailia i le taimi nei, atoa ai ma le fa'amauina o le faafanua o le Apitagalu o Ta'u, o le a latou fa'aalia lea ia Oketopa 2019 i se fa'alauiloaga o le a faia e le Nationa Marine Sanctuary a le tatou Malo.

 

O le tele o le va'a lea o le EV Nautilus e 111futu le umi ma ua aofia i totonu o so'o se ituaiga o masini tetele e mafai ona fealua'i solo i lalo o le sami o le gataifale o le moana sausau e tusa ma le 5,000futu le loloto. E i ai isi e mafai ona fa'aaogaina i isi ogasami e 1,500futu le loloto, ma o le afuaga lea ua vala'auina fa'apitoa ai lenei ali'i suesue na te fa'atautaia le tatou suesuega lea e mana'omia mo le tatou atunu'u, ona sa mua'i o'o mai le "EV Okeano" ae le'i mafai ona fa'atautaia a latou suesuega i ogasami e loloto atu nai lo le 1,000futu. O lea na tu'ua ai e i latou lea suesuega ina ia fa'aauau e le EV Natilus ma le ali'i foma'i o Bob Ballard.

 

O le a maua le taimi umi mo Amerika Samoa e maimoaina ai luga o lenei va'a suesue alititai pe a toe taliu mai i latou i le sailiga lea o le a fa'atotope atu e fa'atino i le Gardner Islands o le pasefika lava e sailia ni toega o le Va'alele na malaga ai le tama'ita'i o Amelia Earhart, lea e latalata lava i Kiripati i le vasa pasefika. A maea lana galuega lea, ona taliu mai lea e fa'aauau sailiga i le alititai o Amerika Samoa. O Ballard ma lana aufaigaluega, sa latou mauaina toega o le Titanic i le tausaga 1985.

 

TOTOGI E LE MEDICAID MEA E FA'AAOGA E TAGATA MAMA'I:

 

I le taimi nei ua faailoa mai ua mafai ona totogia e le Medicaid mea uma e fa'aaoga mo le tausiga fa'apitoa e tagata mama'i. O mea nei e aofia ai Moega Fa'apitoa mo gasegase e tausia fa'apitoa i moega ma ua tumau fo'i afaina o latou tino, e tatau ai ona fa'apitoa latou moega e taooto ai.

 

O nofoa fa'ata'avalevale, o to'oto'o ma crutches po'o te'e mo i latou e afaina o latou vae, atoa ma isi sapalai e mo'omia ona tausia lelei ai gasegase nei i tua i latou aiga.

 

Pau le mea e mana'omia o le fa'atonuga mai le foma'i e iloa ai mea o lo'o mana'omia e tausia fa'apitoa ai gasegase nei i o latou aiga, ona fa'ao'o lea i le itu o le sapalai a le tatou Falema'i Tele LBJ Medical Center, mo le toina ane ia i latou o sui fa'apitoa o aiga o lo'o tausia gasegase nei.

 

O lo ua gafatia ona va'aia foma'i i tua i falema'i fa'aitumalo e aofia ai Leone, Tafuna, Amouli, Manu'a ma Faga'alu i le LBJ Med Center.

 

Ole susuga le Pule Sili o Falema'i Fa'aitumalo a le tatou Matagaluega o le Soifua Maloloina, Kenneth Kuaea ma le ali'i Foma'i mo Talavai i Falema'i Fa'aitumalo Dr. Sai Fuimaono, ua mafai ona e fa'afeso'ota'ia fo'i i le Falema'i fa'aitumalo i Tafuna pe afai o le a i ai se isi mea e te fia malamalama atili ai ona o lenei fo'i alagamanuia.

 

Ua fa'afetaia fo'i le galulue malosi o le tama'ita'i Fa'atonu o le Medicaid Sandra King Young fa'apea fo'i le sao o le tama'ita'i Faipule i le Konekeresi a le Malo Tele mo Amerika Samoa, ona ua mafai ona a'e manumalo lea fo'i taumafaiga mo le mamalu lautele o le atunu'u, ua latou talavai i falema'i fa'aitumalo i le atunu'u.

 

Afai e le'i maua se nofoa fa'ata'avalevale i le taimi nei mo so'o se tasi ua tausia fa'apitoa i tua i aiga, o le taimi lenei e faia ai loa sau talavai ma fa'atalosaga loa i le foma'i o va'aia fa'apitoa lau gasegase, ina ia maua sona nofoa fa'ata'avalevale mo ana feoa'iga.

 

FA'ALAUILOA  TOLOPOINA SI'ITGA TOTOGI O TAUTUA A LE OFISA FEMALAGA'IGA:

 

O le aso Aukuso 1, 2019 na mua'i fa'alauiloa e le afioga le Loia Sili ina ia si'itia ai le totogi fa'ae'e i tautua eseese a le Ofisa o Femalaga'iga fa'atasi ai ma nisi tautua o lo'o fa'atino e le Ofisa o le Loia Sili.

 

Peita'i ua ese le fa'aaliga ua toe fa'alauiloa mai nei, ua tolopoina le fa'amamaluina o nei si'itaga uma, ae ua le fa'atulaga mai se aso e fa'amalosia ai, peita'i ua i ai ma isi si'itaga fa'aopopo i isi tautua sa le si'ia mai le fa'aaliga muamua.

 

O lona uiga ua maea iloilo e lea Matagaluega o le Malo a latou si'itaga, ma faia i ai suiga, atoa ai ma le suiga tele, ua le amatalia ona fa'amalosi se'ia toe logo mai se taimi

 

Ua le mailoa le afuaga o le toe fa'aleaogaina o le fa'aiuga na faia muamua, peita'i sa i ai se fonotaga a le Komiti Faapitoa mo Femalaga'iga sa manatu ina ia faia fa'atasi ma le ali'i Loia, ina ua taga'i i latou i le maga o lea suiga, ua le toe mana'omia ai se saini a le Pulenu'u ma le Sa'o o le Aiga fa'apea ma le Kovana Itumalo pe o sona sui, o le a le toe fa'aaogaina i pemita sa faatulaga fa'atasi mai ai a lea si'itaga o totogi o tautua eseese.

 

"Pe afai o le a mae'a ona fa'aofi nai suiga nei i aiaiga o lea si'itaga o le totogi mo nei tautua, fa'atasi ai ma le suiga fou o le ave'esea lea o saini a Matai o Aiga ma isi fo'i o le Ofisa o Mataupu Tau Samoa, ona toe tu'uina mai lea mo le silafia o le mamalu lautele o le atunu'u. E i ai le fonotaga fa'alaua'itele e toe faia ina ia mautinoa o lo ua fa'aalia fo'i lagona o le mamalu lautele e tusa o nei suiga i totogi ma le aiaiga o pemita talosaga ai le ulufale mai i totonu o le atunu'u. Ona fa'ato'a fa'atulaga ai lea o se isi taimi e fa'amamalu ma fa'amalosia ai lea si'itaga."

 

Ua fa'ailoa mai fo'i e le ali'i Loia Sili, "Ua tele lava manatu tusitusia ua taua'ao mai i le matou Ofisa, o nisi fo'i ua latou fa'ailoa mai o latou finagalo fa'aalia pe a fetaui i le ala, ma e fa'ailoa lava i ai e o'o mai i le fonotaga fa'alaua'itele e fa'alauiloa atu le nofoaga e fai ai, ina ia fa'aalia o latou lagona e tusa o lea si'itaga i le totogi o tautua a le Ofisa o Femalaga'iga. O le isi lea vala ua toe va'ai toto'a ai i nei suiga i ala o le tautua, e ao ina toe fa'aofi i aiaiga fou ua fa'atulaga nei, ao le'i toe faia lea fonotaga fa'alaua'itele ma le fa'amoemoe e pasia mulimuli ane e fa'amamalu e le mamalu lautele."