TAMA TUAI MALISI MO LE AOGA FA'ASAO MARIST - 2 POTU AOGA FA'AFOU

Ua maea fo'i ona taua'aoina aloaia le meaalofa na fa'afao i ai a'ao o Tama Tuai a le Malisi lea o lo'o fa'ailogaina le atoaga o le latou 50 tausaga talu ona fa'atuina mai le latou a'oga maualuga i le teritori o Amerika Samoa.

O le meaalofa o Potu A'oga e lua ua mae'a lelei ona toe lipea, vali lelei ma fa'aleleia nofoa ma laulau. o le potu suesue fa'asaeanisi a le Fa'asao Marist High i Lepuapua. O le taimi ma le galuega atoa na fa'atupe lea e le vasega o tama tuai uma a le Malisi ma ua latou potopoto fo'i i le aso ananafi mo le fa'amoemoe e avatu fa'apitoa le galuega ua latou fa'amae'aina e fa'aaoga e le vasega o fanau a'oga o lo'o soloa'i atu i le a'oga mo le sailiga o le malamalama lautele.

O le fa'atupega o meafale o lenei potu a'oga suesue fa'asaeanisi, ua fa'atupe lea i le foa'i a le Bluesky Amerika Samoa lea na latou taua'aoina ai le $3,000. mo Fa'asao Marist e ala i se poloketi e fa'aleleia atili ai tomai i le STEM /STEAM.

"O le fa'afetai ona ua mafai ona fa'atupe lea galuega matagofie i le fesoasoani fo'i na fa'ailo ai le atoaga o le 20 tausaga o le matou Kamupani a le Bluesky Amerika Samoa. O lo'o aofia i aiaiga o nei foa'i sa ofoina atu mo fanau a'oga maualuluga e fa'atauva ona talosaga mai i ai ma fa'ailoa mai latou poloketi, o lea ua i ai nei la le fa'atupega o meafale mo le potu suesue fa'asaeanisi a le Fa'asao Marist. O le fiafiaga tele fo'i lea o le Bluesky." O se tala lea a le tamaita'i sa fai ma sui o le Buesky i le tatalaga o lea meaalofa taua a Tama Tuai o le Maisi i le taeao o le aso Faraile na te'a nei.

Na talia aloaia lea meaalofa e le afioga Epikopo Peter Brown ma le vasega o faia'oga ma le Pulega a le Fa'asao Marist.

"O le fa'afetai lava i lenei galuega alofa, e so'o se mea e taua'aoina ma agalelei, e suamalie lea, ae sili ona fua mai le agaalofa pe a o'o ina fa'aaogaina e le fanau talavou o a'oa'oina i le Fa'asao Marist, ma ua va'aia fua ua popoto fanau a le atunu'u,” o se tala lea a le afioga Epikopo Peter Brown.

MALOLOGA A LE FONO FAITULAFONO TOLU VAIASO

Ua fa’atulaga se malologa pu’upu’u a le Fono Faitulafono mo le tolu vaiaso mo le nofoaiga lenei, lona 36 a le Fono.

O lo’o fa’atagaina mai e le Fa’avae o Amerika Samoa, e mafai ona faia malologa a le Fono, ae tatau ona pasia e maota a lua peafai e sili atu ma le tolu aso.

O lo’o fa’ailoa mai i le iugafono malilie fa’atasi a Maota e lua, mo le malologa, e fa’apea, “ona ua ma’ea le vaega tele o galuega sa fa’ao’o mai il e Fono Faitulafono, ma, ona o le fia fa’asaoina ma le fa’aaogaina tatau o aso fono, o lea ua talafeagaigai ona fa’amalolo le Fonomo se taimi le tumau ia lava saunia mo galuega i nisi mataupu e toe fa’aopoopo mai i lana kalena.”

O le mea lea, o le a malolo le Fono - mo le tolu vaiaso - i le ma’ea ai o galuega i le aso Faraile, Iulai 26, se ia toe tauaofia i le aso Gafua, Aukuso 19.

O le mataupu tupito i le Fono pe a toe taliu mai lana malologa o le tupe fa’asoasoa a le malo o Amerika Samoa mo le tausaga fa’aletupe 2020 - lea a amata ia Oketopa 1, 2019.

E le o mautinoa pe o afea e tuuina atu ai e le kovana le tupe fa’asoasoa i le Fono Faitulafono.

FA'AMAONIA FA'AMASINOGA FETERALE  FA'ATAUGA "MV WISE HONEST" A KOREA MATU

Ua fa'amaonia e le Fa'amasinoga Feterale i New York, le talosaga a le vasega o Loia a le itu tagi, ina ia fa'atau ese atu le MV Wise Honest, le va'a la'u pusaoloa a le Malo o Korea i Matu.

O le tala mai se tasi o lipoti fa'asalalau a Amerika ua fa'aigoaina o le "Voice of Amerika" ua fa'ailoa ai lenei mana'oga faapitoa ua fa'aulu i le fa'amasinoga na faia ia Iulai 20, 2019.

Ua le maua mai se tali i le taimi nei a le malo o Korea i Matu i lenei taimi, ae ua tatalia nei se toe tali mai, aua e pau lava le mana'oga o lo'o aumaia mai Korea i Matua e tusa o le latou va'a lea e taula i le gataifale o Amerika Samoa, "o le toe fa'afo'i atu."

O le fa'aiuga na fa'amau ma fa'asalalauina ia Iulai 19, 2019 na faia lea e le ali'i Fa'amasino P. Kevin Castel, o le fa'amasino o le Fa'amasinoga fa'aitumalo i Southern New York, na ia fa'atagaina ai le fa'atauga o le MV Wise Honest, ina ia usita'ia ai se feagaiga na malilie fa'atasi i ai ma matua ma le aiga o le ali'i Fitafita o Otto Warmbier.

Na maliu lenei ali'i fitafita talavou o Otto Warmbier ina ua mae'a ona fa'apagotaina mo se taimi umi i Korea i Matua, ma sa toe tatala mai i le Malo o Amerika ona fa'ato'a maliu ai lea o ia, ae ua matua le toe aoga lava lona mafaufau ma lona tino i se mea. O le tala mai, ua latou te tu'uaia Pyongyang ua mafua ai ona o'o le oti i lo la'ua alo, fa'atasi ai ma fa'asalaga sa faia ia te ia, ua vaivai ai lona tinoa ma ua leaga ai fo'i lona mafaufau.

Ina ua maea fo'i e le Fa'amasinoga lea ona fa'atulaga le sala tupe e $500miliona e totogia atu e le Malo o Pyongyang Korea i Matu i matua ma le aiga o Otto Warmier, peita'i o le va'a lea o Korea i Matu, ua talafeagai ona fa'atau ese ao totogia ai se vaega o lea fo'i sala.

O le va'a fo'i lea o le MV Wise Honest, ua fa'atulagaina lona tau aofai e nisi ua mae'a suesuea, ua na'o le $1.5 miliona i le $3miliona lona tau aofa'i o i ai i le taimi nei.

Peita'i, e le o le ala lea na mafua ai ona toso mai le MV wise Honest e le Malo o Amerika. O le mafuaga ona ua le toe mana'o le Malo o Indonesia e toe taula i o latou gataifale le va'a lenei, sa taofia ai e le UNO ona o lo ua fa'ailoa mai o lo'o fela'ua'i ai Koale i le va o Malo o Asia i saute. Na taula le MV Wise Honest i Indonesia, ae toso mai ai e Amerika ona o le fanoga o Indonesia e ave ese mai, ma ua aumaia ai e Amerika i Amerika Samoa e latalata atu i Indonesia.

O le masina Me 09, 2019 na o'o mai ai le va'a lea i le Uafutele i Fagatogo, Amerika Samoa. E na'o le lima aso na soso'o ai, ae fa'auia mai e le Malo o Korea i Matu se latou fa'amatalaga ma ua saunia mai e le latou sui fesootai fa'avaomalo, ma ua fa'ailoa mai, "Ua sopoia e Amerika nisi o tulafono fa'avaomalo, ua tusa le latou mea ua fai ma le ave fa'agaoia o mea totino, ma ua tatau ona toe fa'afo'ia mai le matou va'a i se taimi vave. O lea fo'i mea ua faia e Amerika ua latou le usita'ia ai nisi o aiaiga o le matou galulue fa'atasi ai na mae'a sainia ia Iuni 12, 2019, lea na malilie fa'atasi ai i ni faiga feso'ota'i lelei i va o matou malo e lua."