O le taeao ananafi na to'ai taunu'u loa le malaga a le afioga le Palemia o Samoa, Tuilaepa S. Malielegaoi i Utulei i le fonotaga fa'atasi ma le kovana ma le kapineta.

Na amata lava i le saunoaga fa'afeiloa'i a Lolo, ma ua fa'atulaga ai le fuafuaga o le taeao,  ua na'o se 'ava fa'afeiloa'i ona saunoa lea o le afioga le Palemia e tusa fo'i o le fa'amoemoe ua masi'i mai ai.

"Ua na'o se agaga fa'afetai ua o'o mai e fa'ailo aua ua outou talisapaia se fa'atoga mo se fesoasoani mo le tatou Manu Samoa, o le au lava ua saunia e i matou i le la itu, o i tatou uma lava lea. O le tapua'iga fo'i e le toe masalosalo, aua e so'ototo lava i ta'ua. O le fa'aaloalo fo'i o le a ma'au i ai le mamalu o le atunu'u  ae maise, i lau afioga le Kovana, sui kovana ma le faigamalo i ta'ita'i o ona matagaluega ta'itasi, se ou te fa'afetai atu. E iloga uso i taimi fa'apenei, aua ua savalia le ala o le mativa ona o le fa'amoemoe fa'avaomalo."

"Ua tatou le toe faitaua, ae ua tatou tau i le malosi fa'aletino ma le tomai i fa'agatama e tatou fanau talavou. O le ala lava lea o le apaapa i mea maualuluga ae faigata lava ona ua le 'au'au le fa'asoa."

I le sua fa'afeiloa'i a le afioga le Palemia ma le aumalaga masi'i mai na aoina ai le 'ava tupe ma maua ai le aotelega e $2,462.00. O le sua fa'aaloalo fo'i mo le afioga le Palemia o Samoa na mua'i faia le sua ta'i i ona tulaga mua, molita'i i le teutusi e $5,000. ufitai i le Ie o le Malo, ma le Ietoga tele o lona lafo."

I le fa'aaloalo na saunia lelei mo le Manu Samoa sa tauaaoina ai fo'i le Sua Ta'i i ona teuga uma. O le teutusi e $100,000. ufita'i i le ietoga tele ma le 200 pusa tuna e fa'amomoli, ma le ie tele ua saunia e le fa'atina o le Malo ma le fanau. O lana aumalaga e to'a lima i latou na tofusia ma meaalofa tupe e $400. ua aofia ai ma le Leoleo fa'apitoa a le afioga le Palemia.

O le a toe tu'u fa'atasia le aotelega o lenei Manu Samoa Radiothon i le itula e 5:00 i le afiafi ananafi ma maua ai se aotelega atoa o le fesoasoani a Amerika Samoa atoa.

FONOTAGA KOVANA & KAPENETA I UTULEI

O le fonotaga a le Kovana Sili Lolo Moliga, ma lana kapineta sa faia i le aso ananafi Malae o le Suigaula a le Atuvasa i le taeao ananafi. O le nofoaga foi lea o le fonotaga a le kovana ma le palemia o Samoa i le aso ananafi.

Mataupu muamua o le Tulaga o le fonotaga o tapenaga o Falea'oga lea o lo'o tausia fa'apitoa e matagaluega ta'itasi.

"O lenei galuega alofa ua mae'a fa'amamafa lona taua ia i tatou uma lava. E le o i ai se fuafuaga e fa'ataoto lea galuega lelei, ae maise o lo'o faia mo se lelei o tatou fanau uma lava o lo'o a'oa'oina i potu a'oga o a'oga uma ua mae'a ona fa'atulaga matagaluega ta'itasi e fesoasoani i ai e fa'aleleia latou falea'oga, fale'ai ma umukuka ma latou lotoa. Fa'amolemole Fa'atonu ma o outou sui fa'atonu ae maise o le aufaigaluega atoa a le Malo, e tatau ona tatou pulunaunau e fa'atino lea galuega lelei, a'o le'i a'e le fanau a'oga ia Aukuso 29, 2019,” o se tala lea a le kovana.

I lana saunoaga sa ia fa'ailoa fo'i ma sona lagona fa'anoanoa, "Ua ou va'aia lava ua leai ma se matagaluega ua i ai le loto fuatia ifo lelei ina ia tula'i ma amatalia ona fa'atino lea fo'i galuega lelei sa tatou fiafia e amatalia. Aua e le o tu'ua, toe fa'amalosi atu lea, fa'aaoga i ai tupe a tou matagaluega, a leai, ua le lava, fa'aaoga i ai ma tupe a outou fa'atonu sili ma tou sui, a uma ona tu'u lea pe alofa atu Lemanu e toe fa'atumu atu i lea tausaga fou fa'aletupe."

Mataupu lona lua na saunoa i ai o tulaga o Tagata Faigaluega a le malo, "E ao lava ona fa'amuamua tagata, o le tatou manulauti lena sa fa'atu mai le amataga. E ao ina tou iloa, e le faigofie se olaga faigaluega o se tasi pe afai o le a  leai se totogi. Afai e tuai ona fa'aulu atu pepa o au tagata i le Ofisa o le DHR, iloa lelei ua mae'a ona fa'ailoa i lea matagaluega, e toe fa'afo'i mai aua ne'i faia, ae a o'o la ina e fesiligia pe aisea ua le faia ai le galuega a le DHR, e fa'auia atu lo'u Ofisa e te fa'afesili atu i ai pe aisea e fa'amalamalama mai ai oe, ma ua e silafia la le mea e te lua feagai ona ua le faia lou tiute."

O lana toe tima'i, "Aua le faia mo i tatou mea uma, e leai o le faiga o le mea, e tautua tagata, aua e fa'amuamua e i tatou tagata lautele nai lo o i tatou, e lelei ai mea e fai. Alofa vave ona fai pepa faigaluega o tagata faigaluega fou ina ia vave maua o latou totogi. E leai se faigofie o se lagona o se tasi e faigaluega mo le fia masina ae leai se totogi. Fai la outou galuega e tatau ma le tofi ua ia te outou."

Mataupu lona tolu na talanoaina o le Fonotaga a Ta'ita'i o Malo Polenisia o le Vasa Pasefika lea sa tatau ona tatou talimalo ai. "O lo'o ua tofia le susuga le Sui Kovana Lemanu Peleti Mauga e malaga fa'apitoa ai, fa'atasi ma nisi o le a latou malaga fa'atasi, ae le'i filifilia i le taimi nei. O le a malaga i latou, ae a fo'i mai le aumalaga lea, e tatou te talimalo i le fonotaga a le Komiti Fa'afoe a lea Sosaiete o Ta'ita'i o Malo Polenisia o le tatou atuvasa. O le fonotaga lenei ua le mafai ona tatou talimalo ai, peita'i lea ua taua'aoina atu ia Tuvalu, ma o le a malaga ai Lemanu ma le aumalaga, ia manuia fo'i na fonotaga taua o le a latou auai."

Mataupu lona fa ua fa'ailoa mai, o le Mataupu lea tau le fa'amoemoe o le Manu Samoa na talosagaina mai le Palemia a Samoa sina fesoasoani tupe mo le Manu Samoa.

O lipoti mai le LBJ Medical Center ma le Lipoti mai Poloketi uma lava a le ASPA o lo'o fa'atautaia, o matagaluega na e lua na faia folasaga mo le fonotaga atoa, ae ua taoto uma isi matagaluega ua le tolaulauina latou galuega.

Mai le Falema'i ua iloga ai, "O le a tatou talimalo i le aumalaga a le Veterans Affairs ma le latou Failautusi fou ua mae'a pasia le tatou Malo. E fia iloilo toto'a e i latou mea uma o lo'o tautuaina ai e le tatou falema'i tele le vasega o Fitafita Tuai uma lava.  O lea taligamalo e faia ia Iulai 31, 2019 ma e 10:30 i le taeao lava e to'ai taunu'u ai lea asiasiga tele i le tatou falema'i.”

O le susuga le CEO o le ASPA Wallon Young, "Sa ia tu'uina mai se fa'amatalaga auiliili e tusa o galuega a le ASPA ae maise i le fa'aletonu Eletise lea na a'afia ai le tautua mo le sapalai o le Eletise i le Manu'atele. Ua toe fa'aleleia ma ua mae'a lelei lena galuega. O nisi o galuega o lo'o fa'agasolo lelei uma lava, ae maise i le poloketi mo le fa'amama atili o le Suavai Taumafa mo le mamalu lautele. Ua mae'a le isi vaega muamua o lea poloketi ae ua fa'agasolo atu i le vaega lua ina ia fa'atuina le isi pamu tele e fa'amama atili ai le suavai ae maise i vaitau o timuga ma lologa, e a'afia vave ai le suavai manino mo le fofoga taumafa o le atunu'u."

I se toe fa'apa'i atu a le Kovana ia Young, sa ia fa'ailoa atu ai, "Talu ona ou tu mai i lenei tofiga, o taumafai atu ina ia fa'aitiita le totogi o le eletise i le mamalu lautele. Peita'i i le taimi nei o lo'o tula'i mai i le .33sene i le kilouati, ae ou te le'i tu'ua la lenei nofoa o le ta'ita'i o le tatou Malo, ou te mana'o ia toe maua e le mamalu lautele le pa'u o le eletise i le na'o le .15sene i le Kilouati."