Ads by Google Ads by Google

Tala I Vaifanua

MATAITUINA FA'ALAPISI MAI TA'AVALE FEOA'I - VA'AI E TOTOGIA LAU SALA

 

Ua mautinoa lava, o le tele o le lapisi i autafa o le alatele i so'o se vaipanoa, ona o le fa'alapisi o tagata o lo'o feaoa'i i o tatou alatele. I le taimi nei ua mataituina e ali'i ma tamaita'i Leoleo o le Matagaluega o le Puipuiga o le Saogalemu Lautele, afai ae mautinoa ua va'aia oe o togi sau atigiapa inu, pepa i'ila sa i ai sau mea'ai, poo se atigifagi o so'o se ituaiga ma le muli sikaleti, e tusia lava lau sala, ma e fa'ailoa atu ia te oe, ia totogia lau sala lea.

 

I le taimi nei, ua tusia le sala a le ave ta'avale o le ta'avale lea e tietie ai le pasese ua fa'alapisi.Ua faia lea ina ia fa'atonu e le ave ta'avale lana pasese ia le tia'ia se otaota mai lana ta'avale, a leai aua le oso i luga o lana ta'avale.

 

Fa’ailoa e Marian McGuire, loia a le ASEPA, "Ua taumafai lava i matou i lenei matagaluega e muamua lava ona ave'esea le tonu lava le pogati o le fa'alapisi lea i ai nei i Amerika Samoa. O se tasi lea o 'auga ua fa'ailoa mai mai."

 

"Afai ua avatu sau pepa fa'ailo o sau sala, ona totogia lea sala, aua le tu'u umia ina ne'i galo ia te oe. E i ai taimi e toe mana'omia ai ona fa'afou laisene ave ta'avale ma isi mea e pei o ID o iina la e maua lelei ai e le'i totogia lau sala lea o le fa'aotaota ma le lafoa'i sese o le otaota.”

 

O lo'o laiti ai lava sala e totogia mo le fa'alapisi i le taimi nei ma ua lisia uma nei tulafono i lalo o le Keep American Samoa Beautiful Act. Ua ia te oe fo'i le ua molia i lea tulafono o le fa'aotaota, pe e te tete'e pe ete taliaina le sala ua tusia ai lou suafa, ae totogia lau $60 i le fa'amaoniga o lau solitulafono fa'aotaota e tasi.

 

TAOTO A'O SE I'A E IVIIVIA LE MV WISE HONEST - MATAITUINA E KOREA I MATU

 

"E fasa lava le vale ae taunu'u!" O nisi fuaitau a le atunu'u. Peita'i ua iloga nei i tala tusia ma fa'asalalau e le Siufofoga Fa'asalalau ma nusipepa a le Malo o Korea i Matu, o lo'o ua latou mataituina mai le taofiga o le latou va'a o le Mv Wise Honest lea e i o tatou gataifale.

 

Ua fa'aalia fo'i taofi o le to'atele e ala i fa'amatalaga tusia i laina o feso'ota'iga fa'ainiteneti, lea e afua ai ona manatu le mamafa nisi i le taoto mai a le Va'a i o tatou gataifale, ae anoa talanoaga o lo'o faia ai aga'i mai i le Iunaite Setete ma lona fa'auluuluga.

 

O le ali'i Emepasa o Korea i Matu i le Li’o o Malo Aufa’atasi, Kim Song, ua faailoa mai lona taofi, "Ua solitulafono Amerika i le latou avea fa'amalosi o le matou va'a o le Wise Honest ma ua latou taulaina nei i Amerika Samoa ma ua iloga ai ua fa'aaoga e Amerika le malosi o le latou pule fa'alemalo, ae le o faia fa'ale Malo Aufa'atasi lea fa'aiuga. O lo'o mata'i mai Pyongyang Amerika i le taimi nei."

 

"Ua le kea lava Amerika i tulafono fa'avaomalo, ae ua latou aumaia fua le matou va'a sa taula i Indonesia, ma le tu'uaiga na fa'aaoga le matou va'a e la'u ane ai le Koale mai le matou malo i Indonesia i le tausaga 2018.Ua mae'a ona ave'esea le uta o le Koale ae ua taofia ai le va'a i Indonesia e le UNO,” O se fa'amatalaga lea a Kim Song.

 

"Ua tatau ona toe vave aumaia e Amerika le matou va'a. O se faiga fai to'atasi e Amerika lea ua fa'ataunu'u nei,” o lana toe tima'i mai lea.

 

VAIASO FA'ATAUA VA'A LA'U PASESE & VAA FAGOTA MA ISI VA'A UMA

 

Ua fa'amanatu mai fo'i e le US Coast Guard, o lenei vaiaso ua fa'ataua ai le fo'i feoa'iga ma fela'ua'iga o uta i luga o le sami ma vaituloto ma vaitafe e fa'aaogaina ai va'a oloa ma va'a folau la'u pasese, ae maise o va'a fagota.

 

O le vaiaso atoa e ao ina toe tima'ia ai i latou uma o tautai folau ma latou auva'a, ina ia mautu lelei le tapenaga mo le saogalemu o latou va'a, fa'autagia uma tulafono tau feoa'iga i le vasa ma fela'ua'i uta, oloa ma pasese, aemaise fo'i i latou fo'i e faigaluega i o latou va'a.

 

Ua le gata i lea ae ua faaaogaina fo'i ma le avanoa lelei e tima'ia ai i latou e ta'a'alo i fa'agatama i le tai, e pei o tu'uga a'au, hand ball i le sami ma vaituloto, fagota ma isi uma faiva fa'apena e fa'atauva ai le to'atele pe fa'amalositino ai fo'i mo le soifua maloloina lelei.

 

O le taumafaiga ia mautinoa le saogalemu o i latou uma o fa'aaogaina le sami ma vaituloto poo vaitafe fo'i. Aua ne'i tutupu mai ni fa'alavelave to'atuga e a'afia ai se ola o se tasi pe a'afia tumau ai fo'i lou olaga i le lumna'i.

 

Ua fa'ataua lava le taumafai o matua ia a'oa'oina lelei fanau ia iloa ona a'au ia fa'asaoina ai latou ola, pe afai e mafuli se va'a ona o galu malolosi a'o i ai i luga i latou. O le a'uupega numera muamua lea e ao ina iloa e le tagata folau i le va'a, ia iloa ona a'au pe fa'aopeopea ina ne'i fa'aletonu se va'a, pe mu fo'i i luga o le vasa, a'o mafai ona fa'asaoina le soifua.

 

Ua fa'ailoa mai e le susuga Louis Solaita o le Coast Guard Auxillary, "O lo ua i ai nisi fa'apitoa e mafai ona talosaga ai e matua so latou avanoa e ave i ai fanau e a'oa'o ai le a'au, ma o se tomai lava e mana'omia mo le fanau mai le laiti pe a'o talavou le soifua."

 

SAILIA SE TAMA SAMOA SOLITULAFONO I HAWAII

 

O lo’o tau sailia se ali’i Samoa i Hawai’i ma o ia lea o Mavaega Mavaega, e 32 tausaga o lona soifua.

 

Fa'ailoa e le vaega o Leoleo i Honolulu e lua pisinisi sa osofa'ia e lea ali'i i Kalihi ia Me 7, 2017.

 

Ua fa'ailoa fo'i e le vaega a le Crime Stoppers, na ulufale atu le ali'i lea i le pisinisi a le tama'ita'i i Kalihi ma ia fa'afefe ia te ia ma mana'o fo'i e avane ia te ia le tinoitupe. Peita'i e le'i mana'o le tama'ita'i faipisinisi e tu'u i ai tupe o lana pisinisi ma sa fa'amalosia loa e le ali'i lenei le tama'ita'i ma ave uma ana tupe sa i ai.

 

Na saisaitia Mavaega i le Gaoi numera lua ma ua ua mae'a tatala fo'i i tua ae ua le usita'ia e Mavaega aiaiga o lana nofo va'ava'aia. Ua fa'ailoa e matele ina va'aia o ia i Ewa Beach, ma ua fa'atalosagaina le mamalu lautele, i se tasi o lo'o iloaina le mea o alaala ai Mavaega, fa'amolemole e valaau le Crime Stoppers i le [808] 955-8300.