Ads by Google Ads by Google

Tala I Vaifanua


O le tolaulauina o le tala'aga o le soifua fa'apa'aga a le Hope House ma le SOFIA i nei tausaga e tele, sa tu'uina lea i le isi fo'i sui o le Laulauatofi a le SOFIA, Athena Mauga. [ata: Leua Aiono Frost]

FOA'I SOFIAS $10,000 MO LE HOPE HOUSE

 

O le aso ananafi sa oo ai le Sosaiete O Fa'afafine I Amerika Samoa [SOFIAS] i le Maota o Fa'amoemoega - Hope House - i Fatuoaiga e foa’i le $10,000.

 

"O lenei foa'i o le a aoga tele, aua o lo'o i ai ni vaega o le Maota o Fa'amoemoega o lo'o taumafai e fa'aleleia atili ina ia fa'atele ai le nofoaga mo le auaunaga lenei. O lenei vaega tupe o le a aoga tele, aua afai e mae'a galuega ia, ua to'atele atu nisi o talosaga mai e fia tausia fa'apitoa i le Hope House e mafai ona matou tausia,” o se fa'amatalaga lea ma le agaga fa'afetai na saunoa i ai lana afioga le Bishop Peter Brown.

 

I le foa'i sa tulai ai le tama'ita'i Tasha, o se tasi o faufautua a le laulauafono a le SOFIAS i lenei tausaga, ma sa ia fa'ailoa ai le latou foa'i, ae maise o le Tausala 2019-2020, Vanessa Simanu Ta'amu.

 

"O lenei meaalofa tupe ua taua'aoina mo le Hope House o le aotelega lea o le taumafaiga sa tau sailia i le matou Tauvaga Tausala, i lenei tausaga. Ua le tu'ua se mea e tasi o le aotelega na maua, ae ua aumaia, ina ia fa'aaoga tatau mo le tausiga lelei o outou tina ma tama matutua, ae maise i latou ua fa'agasegasea tumau, ma ua sili lo outou mana'omia mo tausiga fa'apitoa, e tau ina ia ofo atu ai le agaga alofa mo outou.”

 

Ina ua mae'a le fa'alauiloaga o le foa'i a le SOFIAS, ona se'e mai lea Tasha ona tutula'i lea o Athena Mauga mo le tala'aga o le soifua galulue fa'apa'aga a le SOFIAS ma le Hope House.

 

"Talu mai le tausaga e 1987, ua faia pea lava lenei foa'i a le SOFIAS i le Hope House, ma o se foa'i e fiafia tele i matou uma e lagolagosua ina ia mautu ma ia faia pea. O se taumafaiga e matou te iloa lelei ai, ua faia so matou aoga i le atunu'u lautele ae maise lava o matua matutua o lo'o ua sili lo latou mana'omia i le tausiga fa'apitoa o latou tino augase. Fa'afetaia fo'i le avanoa i tausaga ta'itasi, e faia ai pea lenei foa'i ma le loto."

 

I le fa'aiuga fiafia o mea uma o lea taeao, na sausaunoa ai loa le Tausala filifilia o lenei tausaga ina ia fa'anofo filemu ai le mafutaga ma le fa'amavaega ma i latou uma o nofoia le Hope House i Fatuoaiga.

 

I le sauniga amata mo le feiloa'iga, na tutula'i ai le Sui Taitaifono o le Komiti Fa'afoe o le Hope House ma ia fa'ailoa aloa'ia mai le tu'ua le galuega e le susuga le Ta'ita'ifono Ta'afano Joe Tavale, o lea sa tutula'i uma i latou na aofia i lea taeao mo le fa'amoemoe e fa'ataunu'u lea foa'i taua, ma latou fa'aalu le lua minute e talosia ma fa'afetaia ai le galuega sa tauavea e lea fo'i tama aoga tele i galuega fai a le Hope House, ae maise fo'i le Pule'aga Samoa Pago Pago. Ofoina fa'atasi atu ai fo'i ma le fa'amaisega i le tausiali'i Luana Tavale, ona o le tu'ua ai le mafutaga mamae e le tama o le aiga.

 

MALO LE PACIFIC HORIZONS FA'AILOGA JUNIOR SOLAR AOGA TULAGA MUAMUA

 

E 15 'au a a'oga tulaga muamua na fa'aulu a latou taumafaiga i le tauvaga Junior Solar Sprint i lenei tausaga, peita'i ua fa'amauina ai le malo mai e le Pacific Horizons.

 

O lenei polokalama fa'atauva na fa'atulaga mo le fanau a'oga e i vasega 5 se'ia o'o i le vasega 8, ma ua lu'ia i latou ina ia fausia se taavale sili ona saoasaoa, i ai nisi ana galuega e fa'atino po'o ni ana fegi e fa'atino, ae fa'aaogaina ai le ma'a solar e avea ma sapalai o lona malosi'aga.

 

O le tasi lea tauvaga sa fa'atino e le polokalama a le STEAM Discovery Week, i le vaiaso ua te’a ma o se tasi fo'i o polokalama fa'atautaia mai e le ASPA, le tasi o totino o le Amerika Samoa STEAM.

 

O lenei taumafaiga a le ASPA e fa'aosofia ai le fanau e su'esu'e ma taumafai i mataupu e mafai ai ona feso'ota'i vave ma tomai fa'apitoa e agava'a ai i galuega tau le eletise, inisinia, saeanisi suesue ma atisi fo'i.

 

O ituaiga polokalama fa'atauva nei e atina'e atili ai mafaufau o fanau ina ia fausia ni masini, saili aoga o mea eseese po'o totoga ta'itasi o nei masini, ma fa'aosofia ai lo latou iloa lautele o aoga o nei totoga ta'itasi e mafai ai ona fa'agaoioi masini ma afi o masini, pei o ta'avale afimoli eletise, ma so'o se mea e maua ai le malosi'aga.

 

O le feso'ota'i o lesona e a'oa'oina i potu a'oga, ma galuega e talafeagai ona fa'atino e i latou pe a mautu a'oa'oga nei i o latou mafaufau, o le sini lena o nei polokalama fa'atauva o una'ia e fa'atino nei.

 

Ua fa'atauva lea polokalama fa'atino, ona ua i ai fo'i le avanoa e malaga ai i Washington DC le a'oga o le a manumalo a'ia'i. Lea ua tula'i mai o le a'oga Pacific Horizons o le a malaga mo lea fa'amoemoe i lenei tausaga.

 

O a'oga nei ua lautogia i tauvaga sa faia mo le STEAM:

 

• Fausaga o le Ta'avale Solar: 1. Pacific Horizons; 2. Manumalo Academy; 3. St. Theresa; 4. Coleman Elementary

 

• Tu'uga ta'avale Solar: 1. Afono Elementary; 2. Pacific Horizons; 3. Manumalo Academy

 

• Aotelega ma A'oga ua Manumalo i Togi Aofa'i: 1. Pacific Horizons; 2. Manumalo Academy; 3. St. Theresa.

 

FOA'I $1,500 TAEBO DEFENSE TEAM - TAMA O LO'O A'AFIA I LE "PARKINSONS"

 

O le susuga le ali'i Faia'oga Atisi Iosua Toafa na fa'amanuiaina i le foa'i taua a le Taebo Defense Team, le  sosaiete loto tetele ma le tino lelei o lo'o fa'atautaia e le tofa Apulu Veronika Mata'utia Mortenson, ona o lo'o a'afia o ia i le gasegase tumau o le Parkinsons.

 

"O lea taumafaiga ina ia fa'aosofia le agaga taumafai pea o i matou e tausia lelei le soifua maloloina e ala i fa'amalositino, tausami paleni ma ia to'aga e fa'aafu ma foa'i mo i latou ua fa'apo'ia i gasegase faigata ona tau'ave, ae le o fo'i ai."

 

O le tapenaga sa fa'atulaga ai e savavali pe tamomo'e fo'i nisi, ae faia foa'i mo i latou ina ia taua'aoina se meaalofa tupe mo le tausiga o Toafa.

 

Na mua'i faia a latou talanoaga fa'apitoa i auga o lea gasegase ma ona foliga mai. O lea vaega o le fa'alauiloaga na faia lea i le masina o Aperila i le vaitaimi e faia ai latou fa'amalositino Taebo i taeao ta'itasi.  Ua latou fa'alauiloa fo'i i latou na maua i lea gasegase fita, ma sa latou toe fa'amanatu i o latou soifua tautua, ae na fa'apu'upu'uina ona o lea gasegase.

 

O Toafa sa faia'oga i le Samoana, Fagaitua ma Tafuna High ao le'i fa'agasegasea, ma o se tasi e matua lauiloa i ana ata tusia ma vali, o lana lea taleni ua lauiloa ai o ia i atunu'u uma o le vasa pasefika.